ជីវិតកម្សាន្ដ

វ៉ាង ស្រីណូ ប្រកាសចូលរួមបច្ច័យបុណ្យសពគ្រួសារក្មេងៗរងគ្រោះក្នុងឧបទ្ទវហេតុលិចទូក ម្នាក់ ១០០ ដុល្លារ

បានផុស

៤ years មុន

នៅ

ថ្ងៃចន្ទ ១៧ តុលា ២០២២

ដោយ

តារាស្រី វ៉ាង ស្រីណូ បង្ហាញអារម្មណ៍រន្ធត់ចិត្ត និងប្រកាសចូលរួមរំលែកទុក្ខដ៏ក្រៀមក្រំជាមួយក្រុមគ្រួសារក្មេងៗរងគ្រោះ ក្នុងឧបទ្ទវហេតុលិចទូកដចម្លង ព្រមទាំងចូលបច្ច័យបុណ្យគម្រប់ ៧ ថ្ងៃ ចំនួន ១០០ ដុល្លារ សម្រាប់គ្រួសារអ្នកស្លាប់ និងមួយចំនួនទៀតដល់ប្អូនៗដែលរួចផុតពីគ្រោះថ្នាក់។

តារាស្រី វ៉ាង ស្រីណូ បានរៀបរាប់ខ្លឹមសារដូច្នេះថា អាណិតអាសូរពន់ពេកណាស់។ គ្មានការជួបណាមិនបែកនោះទេ តែការបែកចេញរបស់ក្មួយៗទាំង ១១ នាក់ ដោយមិនបានលា និងមិនបានត្រៀមចិត្ត ពិតជាបានបន្សល់នូវទុក្ខសោកសង្រេងរកទីបំផុតគ្មានសម្រាប់ឪពុកម្ដាយ និងក្រុមគ្រួសារទាំងមូលរបស់ក្មួយៗ ហើយមីងផ្ទាល់ ក៏ទប់ទឹកភ្នែកមិនជាប់ យំតាមឪពុកម្ដាយក្មួយៗដែរ។

វ៉ាង ស្រីណូ បន្តថា នាងខ្ញុំ និងគ្រួសារ សូមសម្ដែងនូវសមានទុក្ខ និងសូមចូលរួមរំលែកទុក្ខដ៏ក្រៀមក្រំជាមួយក្រុមគ្រួសារសពក្មួយៗទាំង ១១ នាក់ ដែលត្រូវបាត់បង់កូនៗជាទីស្រលាញ់ ក្នុងឧបទ្ទវហេតុលិចទូកចម្លងនៅស្រុកលើកដែក ខេត្តកណ្ដាល កាលពីពេលថ្មីៗនេះ។ នាងខ្ញុំ ក៏សូមចូលរួមរំលែកនូវការលំបាក នៃគ្រួសារសពនីមួយៗ នូវថវិកាចំនួន ១០០ ដុល្លារ ដោយនឹងនាំយកថវិកាទៅប្រគល់ជូនដោយផ្ទាល់នៅថ្ងៃបុណ្យគម្រប់ ៧ ថ្ងៃខាងមុខនេះ។

តារាស្រីរូបនេះបានបន្ថែមថា មីងសូមឧទ្ទិសបួងសួងឲ្យវិញ្ញាណក្ខន្ធក្មួយៗបានទៅកាន់សុគតិភពកុំ បីឃ្លៀងឃ្លាតឡើយ ហើយបើមានជាតិក្រោយ សូមឲ្យក្មួយៗមានអាយុវែងកុំដូចជាតិនេះទៀត។ មីងស្រីណូ ពិតជាអាណិតអាសូរដល់ក្មួយៗណាស់៕

អត្ថបទ ៖ ចាន់រ៉ា

Related Topics:វ៉ាង ស្រីណូ