សម្ដេចតេជោ ហ៊ុន សែន ៖ ស្មារតី «ភាពរួបរួមគ្នា» នៅក្នុងឆ្នាំនេះ អាស៊ានអាចដោះស្រាយ និងទប់ស្កាត់បញ្ហាប្រឈមជាច្រើន

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានអាស៊ានឆ្នាំ ២០២២ បានលើកឡើងថា ស្មារតី «ភាពរួបរួមគ្នា» បានធ្វើឲ្យអាស៊ានអាចដោះស្រាយ និងទប់ស្កាត់បញ្ហាប្រឈមជាច្រើន។

ការលើកឡើងខាងលើនេះ គ្រាដែលសម្ដេចតេជោ ហ៊ុន សែន បានអញ្ជើញជាអធិបតីក្នុងពិធីបិទកិច្ចប្រជុំកំពូលអាស៊ានលើកទី ៤០ និង៤១ និងកិច្ចប្រជុំកំពូលពាក់ព័ន្ធ និងពិធីផ្ទេរតំណែងប្រធានអាស៊ានជូនឥណ្ឌូណេស៊ី នារសៀលថ្ងៃទី ១៣ ខែវិច្ឆិកា ឆ្នាំ ២០២២នេះ។

សម្ដេចតេជោ ហ៊ុន សែន បានថ្លែងដោយសង្កត់ធ្ងន់ថា “មជ្ឈភាពអាស៊ាន” គឺជាកម្លាំងចលករចម្បង សម្រាប់កិច្ចសន្ទនា និងកិច្ចសហប្រតិបត្តិការជាមួយនឹងដៃគូខាងក្រៅ តាមរយៈយន្តការដែលដឹកនាំ ដោយអាស៊ាន។ ប្រធានអាស៊ានឆ្នាំ ២០២២ បានថ្លែងបន្តថា ទោះបីជាស្ថិតក្នុងស្ថានការណ៍ណាក៏ដោយ អាស៊ានត្រូវរក្សាឯកភាពអាស៊ាន ដើម្បីអត្ថប្រយោជន៍ខ្ពស់បំផុតសម្រាប់តំបន់ទាំងមូល។

សម្ដេចតេជោ ហ៊ុន សែន បានលើកឡើងទៀតថា «ការលើកកម្ពស់សាមគ្គីភាព និងឯកភាព នឹងនៅតែជាអាទិភាពកំពូលរបស់យើង នៅក្នុងឆ្នាំបន្តបន្ទាប់ទៀត។ ជាសក្ខីភាពជាក់ស្ដែងនៃស្មារតី «ភាពរួបរួមគ្នា» នៅក្នុងឆ្នាំនេះ យើងអាចដោះស្រាយ និងទប់ស្កាត់បញ្ហាប្រឈមជាច្រើននៅក្នុងតំបន់យើង ដែលនាំឱ្យយើងមានលទ្ធភាព ក្នុងការរក្សានូវសន្តិភាព វិបុលភាព និងសុខដុមរមនា សម្រាប់គ្រួសារអាស៊ានរបស់យើង»។

ជាមួយគ្នានេះ សម្ដេចតេជោ ហ៊ុន សែន បង្ហាញជំនឿយ៉ាងពេញលេញថា សាធារណៈរដ្ឋឥណ្ឌូណេស៊ី ដែលក្លាយជាប្រធានអាស៊ានប្តូរវេនបន្ទាប់ទៅនេះ នឹងបន្តដឹកនាំអាស៊ាន ដើម្បីសម្រេចបាននូវគោលបំណងចម្បង គឺសហគមន៍អាស៊ាន ប្រកបដោយសុខសន្តិភាព ភាពធន់ និងបរិយាបន្ន៕