ព័ត៌មានជាតិ

នាយករដ្ឋមន្ត្រី កោតសរសើរប្រជាជនកម្ពុជា

បានផុស

៣ years មុន

នៅ

ថ្ងៃចន្ទ ១៤ វិច្ឆិកា ២០២២

ដោយ

ខណៈកម្ពុជាដឹកនាំរៀបចំកិច្ចប្រជុំកំពូលអាស៊ានលើកទី ៤០-៤១ និងកិច្ចប្រជុំកំពូលពាក់ព័ន្ធ ដោយជោគជ័យ ស្របពេលតំបន់អាស៊ាន និងសាកលជួបវិបិត្តផ្ទួនៗមួយចំនួនដូចជា បញ្ហាកូវីដ-១៩ បញ្ហាផ្ទៃក្នុងមីយ៉ាន់ម៉ា បញ្ហាសមុទ្រចិនខាងត្បូង បញ្ហាកូរ៉េខាងជើង បញ្ហារុស្ស៊ី អ៊ុយក្រែន ជាដើម, សម្ដេចតេជោ ហ៊ុន សែន ក្នុងនាមជា នាយករដ្ឋមន្ត្រីនៃកម្ពុជា ជាប្រធានអាស៊ានឆ្នាំ ២០២២នេះ សូមកោតសរសើរប្រជាជនកម្ពុជា ដែលយោគយល់ ចូលរួមសហការរក្សាសណ្ដាប់ធ្នាប់បានយ៉ាងល្អ។

ថ្លែងនៅក្នុងសន្និសីទសារព័ត៌មាន នៅវិមានសន្តិភាព បង្ហាញលទ្ធផលសំខាន់ៗ នៃកិច្ចប្រជុំកំពូលអាស៊ាន លើកទី៤០ និង៤១ និងកិច្ចប្រជុំកំពូលពាក់ព័ន្ធ នៅល្ងាចថ្ងៃទី១៣ ខែវិច្ឆិកានេះ សម្តេចតេជោ ហ៊ុន សែន មានប្រសាសន៍ថា ជោគជ័យនេះជាកិត្តិយស និងមោទនភាពដ៏ធំធេងសម្រាប់ប្រទេស និងប្រជាជនកម្ពុជា ដែលបានធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ានលើកទី៤០ និងទី៤១ និងកិច្ចប្រជុំកំពូលពាក់ព័ន្ធ។

សម្ដេចតេជោ ហ៊ុន សែន មានប្រសាសន៍ថា៖ “ខ្ញុំសូមថ្លែងកោតសរសើរ និងអរគុណចំពោះប្រជាពលរដ្ឋនៅទូទាំងប្រទេស ពិសេសប្រជាពលរដ្ឋនៅរាជធានីភ្នំពេញ ដែលផ្ដល់ការយោគយល់ និងជួយសហការសម្រាប់រក្សាសន្តិសុខ សណ្ដាប់ធ្នាប់ ក្នុងរាជធានីភ្នំពេញ។ ខ្ញុំពិតជាមានការពេញចិត្តចំពោះកម្លាំងសន្តិសុខរបស់យើងដែលមានសមត្ថភាពគ្រប់គ្រាន់ការពារថ្នាក់ដឹកនាំពីចម្ងាយ មកប្រទេសរបស់យើងដោយសុវត្ថិភាព”។

ជាមួយគ្នានេះ សម្តេចតេជោ ហ៊ុន សែន បានកោតសរសើរដល់លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងមន្ត្រីពាក់ព័ន្ធដែលបានបំពេញកិច្ចការងារដ៏ល្អ ក្នុងនាមកម្ពុជាធ្វើជាម្ចាស់ផ្ទះនៃកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធទទួលបានជោគជ័យនេះ។

គួរបញ្ជាក់ថា ដើម្បីធានានូវការរក្សាសណ្ដាប់ធ្នាប់ និងសុវត្ថិភាពអំឡុងពេលនៃកិច្ចប្រជុំកំពូលអាស៊ាននេះ រដ្ឋបាលរាជធានីភ្នំពេញ បានសម្រេចបិទចរាចរណ៍ផ្លូវគោកក្នុងទីក្រុងភ្នំពេញចំនួន ៥ខ្សែ ដូចជា មហាវិថីសហព័ន្ធរុស្ស៊ី មហាវិថីព្រះនរោត្តម មហាវិថីព្រះមុនីវង្ស ផ្លូវជាតិលេខ៦ ដែលចូលទៅកាន់រាជធានីភ្នំពេញ និងវិថីឧកញ៉ាឃ្លាំងមឿង ជាដើម ព្រមទាំងបានហាមឃាត់ការធ្វើចរាចរណ៍ផ្លូវទឹកតាមដងទន្លេសាប ទន្លេមេគង្គលើ ហាមឃាត់ការបង្ហោះខ្លែង និងឧបករណ៍ថតដែលបំពាក់លើយន្តហោះបញ្ជា ឬដ្រូន ក្នុងភូមិសាស្ត្ររាជធានីភ្នំពេញ។ ជាមួយគ្នានេះ អាជ្ញាធររាជធានីភ្នំពេញ បានសម្រេចបិទក្លឹបរាត្រីក្នុងរាជធានីភ្នំពេញចំនួន ១៤ទីតាំង ជាបណ្ដោះអាសន្នរយៈពេល ៦ថ្ងៃ តាំងពីមុនកិច្ចប្រជុំចាប់ផ្ដើមមួយថ្ងៃ៕

អត្ថបទ៖ ច័ន្ទ វីរៈ