លោក Zelensky នឹងទៅ អាមេរិក ជាដំណើរចេញក្រៅប្រទេសលើកដំបូង ចាប់តាំងពីផ្ទុះសង្គ្រាម

សេតវិមានបានបញ្ជាក់ថា ប្រធានាធិបតីអ៊ុយក្រែនលោក Volodymyr Zelensky នឹងធ្វើទស្សនកិច្ចទីក្រុងវ៉ាស៊ីនតោន សម្រាប់កិច្ចប្រជុំជាមួយលោក Joe Biden និងថ្លែងសុន្ទរកថាទៅកាន់សភា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍បានឲ្យដឹងថា កិច្ចប្រជុំនៅសេតវិមាន អាចរួមមានសេចក្តីប្រកាសពីលោក Biden អំពីកញ្ចប់សព្វាវុធថ្មីសម្រាប់ទីក្រុង កៀវ រួមទាំងមីស៊ីល Patriot ផងដែរ។

សហរដ្ឋអាមេរិក គឺជាអ្នកគាំទ្រដ៏សំខាន់បំផុតក្នុងសង្រ្គាម ដោយបានផ្តល់ជំនួយសរុបប្រមាណ៥០ពាន់លានដុល្លាររួចទៅហើយ រួមទាំងជំនួយផ្នែកសន្តិសុខប្រហែល២០ពាន់លានដុល្លារផងដែរ។

ទន្ទឹមនឹងនេះ ប្រធានសភាអាមេរិក លោកស្រី Nancy Pelosi បានប្រាប់តំណាងរាស្រ្តនៅក្នុងលិខិតមួយកាលពីថ្ងៃអង្គារទី២០ខែធ្នូថា ពួកគេគួរតែចូលរួមនៅយប់បន្ទាប់។

លោក Zelensky ដែលបានតស៊ូរយៈពេល១០ខែក្នុងសង្រ្គាមជាមួយកងកម្លាំងរុស្ស៊ី បាននិយាយជាញឹកញាប់ទៅកាន់មេដឹកនាំ និងអ្នកគាំទ្រជុំវិញពិភពលោក ប៉ុន្តែត្រឹមតែតាមទូរស័ព្ទ និង Video Conference ប៉ុណ្ណោះ។

កាលពីថ្ងៃអង្គារ លោក Zelensky បានចុះទៅសួរសុខទុក្ខកងទ័ពអ៊ុយក្រែននៅទីក្រុង Bakhmut ដែលជាចំណុចកណ្តាលនៃការប្រយុទ្ធគ្នា។ នៅទីនោះ លោកបានហៅទីក្រុងដែលរងការវាយលុកដោយសង្រ្គាមមួយនេះថាជា “បន្ទាយជួរមុខ”។

ដំណើរ​​ដោយ​គ្មាន​ការ​បញ្ជាក់​ជាមុននោះ ​បាន​កើត​ឡើង​ខណៈ​វិមាន​ក្រឹមឡាំង​​ប្រកាស​ថា ប្រធានាធិបតីរុស្ស៊ី លោក វ្ល៉ាឌីមៀរ ពូទីន នឹង​ជួប​មន្ត្រី​យោធា​ជាន់​ខ្ពស់​នៅ​ថ្ងៃ​ពុធ ដើម្បី​ថ្លឹងថ្លែង​ការ​វាយ​លុករបស់​រុស្ស៊ី​ ​លើ​អ៊ុយក្រែន ហើយ​កំណត់​គោលដៅ​សម្រាប់​ឆ្នាំ​ក្រោយ៕

ប្រែសម្រួល៖ Vann Vann

ប្រភព៖ CNA

ចុចអាន៖ លោក Zelensky ថា អ៊ុយក្រែន នឹងដណ្ដើមយកឧបទ្វីបគ្រីមៀមកវិញដោយ ប្រើកម្លាំង