ជំងឺអាថ៌កំបាំងស្រដៀងកូវីដ សម្លាប់មនុស្ស២១នាក់ នៅ អាហ្វហ្គានីស្ថាន

ប្រព័ន្ធផ្សព្វផ្សាយក្នុងស្រុកបានអះអាងថា មនុស្សចំនួន២១នាក់ ត្រូវបានសម្លាប់ដោយសារ ជំងឺអាថ៌កំបាំង នៅក្នុងប្រទេសអាហ្វហ្គានីស្ថាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ករណីទាំងអស់ ត្រូវបានកត់ត្រានៅក្នុងតំបន់ជួរភ្នំ Wakhan ភាគខាងជើងឆៀងខាងកើត មានព្រំប្រទល់ជាប់ប្រទេសតាហ្ស៊ីគីស្ថាន និងប៉ាគីស្ថាន។

ពេលនេះ ​ប្រធាន​សុខាភិបាល ​ត្រូវ​បាន​បញ្ជូន​ទៅ​តំបន់​នោះ ​ដើម្បី​ស៊ើបអង្កេត។

ប៉ុន្តែបើតាមការចុះផ្សាយរបស់កាសែត Afghanistan Times, ក្រុមមន្ត្រីបានពណ៌នាថា ជំងឺនេះមានលក្ខណៈស្រដៀងទៅនឹង កូវីដ១៩។ កាសែតនេះ​អះអាង​ថា ការ​ស្លាប់​ទី១ ​បាន​កើត​ឡើង​កាលពី២​សប្តាហ៍​មុន​។

គួរបញ្ជាក់ថា នាពេលថ្មីៗនេះ ប្រទេសអាហ្វហ្គានីស្ថាន ក៏ត្រូវរងគ្រោះដោយសារការផ្ទុះឡើងនៃជំងឺអាសន្នរោគ និងជំងឺគ្រុនស្វិតដៃជើងផងដែរ។

រឿងនេះកើតឡើង ចំពេលទីភ្នាក់ងារព័ត៌មាន Bakhtar ដែលគ្រប់គ្រងដោយក្រុមតាលីបង់ កាលពីសប្តាហ៍មុនបានរាយការណ៍ថា កុមារយ៉ាងតិច៥០នាក់បានស្លាប់ ដោយសារជំងឺផ្លូវដង្ហើមក្នុងរយៈពេលត្រឹមតែមួយខែ នៅខេត្ត Baghlan ភាគខាងជើងប្រទេសអាហ្វហ្គានីស្ថាន។

យោងតាមទីភ្នាក់ងារនេះ មន្ត្រីមន្ទីរពេទ្យ Baghlan បានបញ្ជាក់ថា កុមារប្រមាណ១០០០នាក់បានឆ្លងជំងឺផ្លូវដង្ហើមនៅក្នុងខេត្ត សម្រាប់រយៈពេលមួយខែចុងក្រោយនេះ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ ជំងឺអាថ៌កំបាំង សម្លាប់សិស្សសាលាវៀតណាមម្នាក់ ខណៈជាង ៧០០នាក់ធ្លាក់ខ្លួនឈឺ