KPT+

បុរសមានលក្ខណៈប៉ុន្មានចំណុចនេះ ទោះមិនសូវសំបូរទ្រព្យ ក៏នារីៗប្រាថ្នាចង់បាន

បានផុស

២ years មុន

នៅ

ថ្ងៃពុធ ២២ កុម្ភៈ ២០២៣

ដោយ

មនុស្សមួយចំនួនតែងតែគិតថា សឹងគ្រប់ស្ត្រីតែងតែស្រលាញ់បុរសដែលមានលុយច្រើន ឬ សំបូរទ្រព្យ ការគិតបែបនេះ មិនត្រឹមត្រូវទាំងស្រុងនោះឡើយ។ មនុស្សស្រី មិនដូចគ្នាទាំងអស់នោះទេ។

មនុស្សប្រុសដែលនារីៗប្រាថ្នាចង់បាន ទោះមិនសូវសំបូរលុយកាក់ ឬ ទ្រព្យធន រួមមាន៖

១–ជាក់លាក់ចំពោះដៃគូស្នេហា

ស្ត្រីមិនត្រូវការបុរសដែលមាននាងហើយ តែបែរជារាយមន្តស្នេហ៍ដាក់នារីគ្រប់គ្នានោះទេ។ នាង ត្រូវការបុរសប្រាកដប្រជាទៅលើរឿងស្នេហា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដូច្នេះហើយ បុរសដែលមានភាពជាក់លាក់ចំពោះដៃគូស្នេហា គឺមិនរាយមាយ និងមិនរាយមន្តស្នេហ៍ដោយចេតនាដាក់នារីគ្រប់គ្នានោះទេ។ បុរសទាំងនោះ មិនច្របូកច្របល់ជាមួយដៃគូស្នេហាច្រើន «ស្រលាញ់មួយដឹងមួយ ឬ ស្រលាញ់មួយ ស្មោះមួយ»។

២–ទំនាក់ទំនងដោយបើកចំហ

មនុស្សប្រុសដែលហ៊ានប្រកាសប្រាប់អ្នកដទៃ ឬគ្រួសារពីទំនាក់ទំនងគេជាមួយដៃគូ គឺជាបុរសដែលនារីៗត្រូវការ។ ការមិនលាក់បាំងមនុស្សជុំវិញខ្លួនពីទំនាក់ទំនងនេះ នឹងធ្វើឲ្យនារីជាដៃគូ កាន់តែជឿជាក់ និងទុកចិត្ត ព្រោះថាបុរសទាំងនោះមិនមែនជាមនុស្សបោកប្រាស់ ឬលាក់លៀមក្នុងក្រៅឡើយ។

ទំនាក់ទំនងដែលមានសុខភាពល្អ នឹងរីកចម្រើនពេលមានភាពច្បាស់លាស់។ ភាពស្មោះត្រង់ នឹងមិនធ្វើឲ្យនរណាម្នាក់សង្ស័យអ្នក។

៣–សុចរិតភាព

មនុស្សមានភាពសុចរិត ជាបុគ្គលដែលគួរឲ្យគោរពបំផុត។ គ្រប់មនុស្សតែងតែចង់បានបុគ្គលដែលមានភាពសុចរិតមកនៅក្បែរខ្លួន។ ទន្ទឹមនោះ នារីៗ ក៏ប្រាថ្នាបុរសបែបនេះដែរ ដោយសារមនុស្សប្រុសប្រភេទនេះ គឺមានភាពស្មោះត្រង់ មិនកុហក និងមិនបោកប្រាស់ អាចឲ្យដើរផ្លូវរួមគ្នាបានទៅថ្ងៃអនាគត។

៤–ទំនួលខុសត្រូវ

មនុស្សប្រុសមានទំនួលខុសត្រូវ ជាមនុស្សមិនក្បត់ពាក្យសន្យាសូម្បីតែរឿងបន្តិចបន្តួច។ ពួកគេតែងតែគោរពពេលវេលា និងសំដីរបស់ខ្លួន។ ពួកគេ ហ៊ានធ្វើ គឺហ៊ានទទួលខុសត្រូវ ប្រភេទមនុស្សប្រុសបែបនេះ នារីៗត្រូវការបំផុត។

៥–ភាពចាស់ទុំ

មនុស្សប្រុសដែលមានភាពចាស់ទុំ មិនសំដៅលើអាយុឡើយ។ ភាពចាស់ទុំក្នុងន័យនេះ សំដៅលើចិត្តគំនិត អាកប្បកិរិយា មិនឈ្លើយ មិនបំពានអ្នកដទៃ និងចេះគិតពីអនាគត មិនមែនរស់មួយថ្ងៃគិតតែមួយថ្ងៃនោះទេ។

៦–មិនដ្រាម៉ាលើបណ្ដាញសង្គមជ្រុល

មនុស្សប្រុសដ្រាម៉ា ឬបញ្ចេញអារម្មណ៍អវិជ្ជមានដាក់អ្នកដទៃនៅលើបណ្ដាញសង្គមហ្វេសប៊ុកជ្រុល ហួសហេតុ នារីៗ មិនត្រូវការឡើយ។ នាងយល់ថា បុរសបែបនេះ មិនចេះរក្សាតម្លៃខ្លួន និងគ្មានអាថ៌កំបាំងសោះ។ មួយថ្ងៃៗ បង្ហោះតែរឿងអវិជ្ជមាន សូម្បីតែរឿងគ្រួសារមានជម្លោះបន្តិចបន្តួច… មិនដែលបង្ហាញទៅអ្នកដទៃពីការអភិវឌ្ឍខ្លួនសោះ។

៧–មិននិយាយដើមអ្នកដទៃ

បុរសមិននិយមនិយាយដើមអ្នកដទៃ ឬ មនុស្សជុំវិញខ្លួន ជាទីចាប់អារម្មណ៍របស់នារីៗ។ ប្រការនេះ បានបង្ហាញពីអត្តចរិតថ្លៃថ្នូររបស់មនុស្សប្រុស។ ចំពោះមនុស្សប្រុសដែលចេះនិយាយដើម មិនសូវមាននារីៗណាចូលចិត្តទេ។ មនុស្សប្រុសដែលចូលចិត្តនិយាយដើម ឬវែកញែកពីរឿងអ្នកដទៃឥតល្ហែ គេហៅថា ប្រុសចរិតស្រី។

៨–ចេះគោរព និងផ្ដល់តម្លៃដល់មនុស្សជុំវិញខ្លួន

ជារឿយៗ រាល់ពេលមានកិច្ចការ ឬ និយាយការងារអ្វីមួយ មនុស្សប្រុសប្រភេទនេះ តែងតែផ្ដល់តម្លៃ និងស្ដាប់យោបល់អ្នកជុំវិញខ្លួនជានិច្ច។ មនុស្សបែបនេះ ក៏ជាគោលដៅសំខាន់សម្រាប់ស្រីៗដែរ។ នាង ត្រូវការបុរសទាំងនេះ មកនៅក្បែរខ្លួន ព្រោះពួកគេយល់ការរាក់ជ្រៅ។

៩–កតញ្ញូ

បុរសមានភាពកតញ្ញូចំពោះឪពុកម្ដាយ ឬអ្នកមានគុណ គឺជាមនុស្សដែលគួរឲ្យស្ងើចសរសើរ និងគោរពបំផុត។ មនុស្សស្រីត្រូវការបុរសប្រភេទនេះខ្លាំងណាស់ ពេលអនាគត នាងក៏ចង់សាងជីវិតគូជាមួយពួកគេដែរ។

«មិនមែនទាល់តែអ្នកមានលុយស្ដុកស្ដម្ភ អភិជន ឬ សម្ភារៈនិយម ទើបនារីៗ ចាប់អារម្មណ៍ទាំងអស់ឡើយ មនុស្សមិនដូចគ្នាទេ»៕

អត្ថបទ ៖ ពិសី