ព័ត៌មានជាតិ
សម្តេចពិជ័យជំរុញដល់សមត្ថកិច្ចត្រូវបង្ក្រាបល្បែងស៊ីសងគ្រប់ប្រភេទ ការជួញដូរគ្រឿងញៀន និងផ្សព្វផ្សាយពីច្បាប់ចរាចរណ៍ដល់ពលរដ្ឋ
សៀមរាប ៖ សម្ដេចពិជ័យបានជំរុញដល់អាជ្ញាធរ និងសមត្ថកិច្ចខេត្តសៀមរាប ត្រូវបង្ក្រាបរាល់ល្បែងស៊ីសងគ្រប់ប្រភេទ ជាពិសេសការជួញដូរគ្រឿងញៀន និងត្រូវផ្សព្វផ្សាយពីច្បាប់ចរាចរណ៍ជូនប្រជាពលរដ្ឋ សិស្សានុសិស្ស ស្រទាប់យុវវ័យ ដោយគ្រោះថ្នាក់ចរាចរណ៍ គឺជាឃាតកបំបាំងមុខដ៏សាហាវបំផុត។
ការជំរុញបែបនេះ របស់សម្តេចពិជ័យសេនា ទៀ បាញ់ បានធ្វើឡើងនៅក្នុងឱកាសដែលសម្តេចបានអញ្ជើញជាអធិបតីភាពបិទសន្និបាតបូកសរុបលទ្ធផលការងារ ឆ្នាំ២០២២ និងលើកទិសដៅការងារឆ្នាំ២០២៣ របស់រដ្ឋបាលខេត្តសៀមរាប នៅថ្ងៃទី២៨ ខែមីនា ឆ្នាំ២០២៣នេះ។
សម្ដេចពិជ័យសេនា ទៀ បាញ់ បានលើកឡើងថា ក្រោមការដឹកនាំ របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានដាក់ចេញនូវការគ្រប់គ្រងដើម្បីឆ្លើយតបនៃវិបត្តិ បញ្ហាប្រឈមនានាប្រកបដោយសុខភាព ដើម្បីស្ដារផលប៉ះពាល់នានា របស់ប្រជាពលរដ្ឋដែលបណ្ដាលមកពីជំងឺកូវីដ១៩ គ្រោះទឹកជំនន់ និងវិបត្តិនានាជាសកល ធ្វើឱ្យសេដ្ឋកិច្ចជាតិងើបឡើងវិញយ៉ាងឆាប់រហ័ស ក្នុងអត្រាកំណើន ៧.២% នៅឆ្នាំ២០២២។
សម្ដេចពិជ័យសេនា ទៀ បាញ់ បានបន្តថា នៅក្នុងឆ្នាំ២០២២ កម្ពុជាក៏សម្រេចបានការរៀបចំការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ប្រកបដោយលក្ខណៈ សេរីត្រឹមត្រូវ និងយុត្តិធម៌ ស្របតាមច្បាប់ និងបទបញ្ជា ពីការបោះឆ្នោត ព្រមទាំងរក្សាការពារ សន្តិសុខសណ្ដាប់ធ្នាប់ និងសុវត្ថិភាព សម្រាប់ការបោះឆ្នោតយ៉ាងល្អប្រសើរ។ លើសពីនេះទៅទៀត ប្រទេសយើងមានតួនាទីជាប្រធានអាស៊ាន ដែលបានសម្រេចដោយជោគជ័យ និងជាប្រវត្តិសាស្ត្រ នៃការរៀបចំ ប្រជុំសភាអាស៊ាន លើកទី ៤០,៤១។
សម្ដេចពិជ័យសេនា បានថ្លែងថា ទន្ទឹមនឹងសមិទ្ធផលខាងលើនេះក៏បានកត់សម្គាល់ អំពីបញ្ហាប្រឈមនានា ដែលនៅសេសសល់ រួមទាំងកិច្ចការជាច្រើន ដែលត្រូវបន្តខិតខំពុះពារ និងអនុវត្តឱ្យបានល្អជាបន្តទៀត។ ក្នុងនោះដែរសម្ដេចពិជ័យសេនា ក៏បានកោតសរសើរ និងឯកភាព តាមរបាយការណ៍របស់អភិបាលខេត្តសៀមរាប ដែលបានគូសបញ្ជាក់អំពីខ្លឹមសារសំខាន់ៗ ដែលសន្និបាតយកទៅពិភាក្សាចំណុចទាំងនេះ ដោយផ្តោតទៅលើការងារសន្តិសុខ សណ្ដាប់ធ្នាប់សង្គម ការប្រយុទ្ធប្រឆាំងគ្រឿងញៀន និងការគ្រប់គ្រងដែនការពារអភិរក្សធនធានធម្មជាតិ ការដោះស្រាយទំនាស់ក្រៅប្រព័ន្ធតុលាការ ការរៀបចំក្រុងសៀមរាប ក្នុងការចូលរួម អនុវត្តគម្រោង ទីក្រុងវៃឆ្លាត និងការងារវឌ្ឍនភាព នៃការរៀបចំ សោភ័ណភាព សណ្ដាប់ធ្នាប់សាធារណៈ តាមទីប្រជុំជន និងក្រុង ស្រុក នៅទូទាំងខេត្តសៀមរាប។
សម្ដេចពិជ័យសេនា ទៀ បាញ់ ក៏បានចូលរួមគាំទ្រ និងឯកភាពតាមស្មារតីនៃអង្គសន្និបាតបានលើកឡើង ហើយសម្ដេចបានសង្ឃឹម និងជឿជាក់ថា បញ្ហាខាងលើនេះ រដ្ឋបាលគ្រប់ថ្នាក់តាំងពីថ្នាក់ខេត្ត ស្រុក ក្រុង ឃុំសង្កាត់ និងបន្តខិតខំអនុវត្តទៅតាមតួនាទី ភារកិច្ចរបស់ខ្លួនដែលបានកំណត់ដោយច្បាប់បទដ្ឋានគតិយុត្តិ ដែលរដ្ឋបាលនីមួយៗ មានការទទួលខុសត្រូវទៅតាមច្បាប់ជាធរមាន ហើយក៏ដូចជាចូលរួមគាំទ្រ ដល់កម្មវិធីនយោបាយរបស់រាជរដ្ឋាភិបាល កម្មវិធីការងាររបស់រដ្ឋបាលខេត្ត ហើយក៏ជឿជាក់លើក្រុមការងារ របស់យើង ក្នុងការគាំទ្របញ្ហានេះ។
សម្តេចក៏បានលើកផងដែរ អំពីបញ្ហាការឯកភាពគ្នា លើព្រំប្រទល់រដ្ឋបាលរវាងខេត្តសៀមរាប និងខេត្តឧត្តរមានជ័យ ដោយខេត្តសៀមរាប បានត្រូវកាត់ប្រជាពលរដ្ឋមួយចំនួនស្ថិតនៅក្រោមការគ្រប់គ្រងដែនសមត្ថកិច្ចដល់រដ្ឋបាលខេត្តឧត្តរមានជ័យ។
សម្ដេចក៏បានលើកនូវចំណុចសំខាន់ៗ ដែលត្រូវយកចិត្តទុកដាក់ លើកការអនុវត្តចំពោះមុខក្នុងឆ្នាំ២០២៣ មានទាក់ទងទៅនឹងការ រក្សាសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម នឹងត្រូវបន្តខិតខំថែរក្សាសុខសន្តិភាព ស្ថេរភាពនយោបាយ ការពារបូរណភាពទឹកដី អធិបតេយ្យភាពជាតិ ការពារព្រះមហាក្សត្រ ការពាររបបរាជានិយម អាស្រ័យរដ្ឋធម្មនុញ ការពាររាជរដ្ឋាភិបាលស្របច្បាប់ និងបន្តលើកកម្ពស់ លទ្ធិប្រជាធិបតេយ្យ សេរីពហុបក្ស និងការពារសិទ្ធិសេរីភាព របស់ប្រជាពលរដ្ឋជាដើម។ ម្យ៉ាងទៀតការរៀបចំទីតាំងថ្មី នៅតំបន់អភិវឌ្ឍន៍រុនតាឯក និងពាក់ស្នែង ជូនប្រជាពលរដ្ឋដែលស្ម័គ្រចិត្តរុះរើលំនៅឋាន នៅរមណីដ្ឋានអង្គរ ព្រមទាំងការងារកាត់ឆ្វៀលដីតំបន់៣ បឹងទន្លេសាប សំខាន់លើកិច្ចសហការល្អជាមួយអាជ្ញាធរអប្សរា ក្នុងការរៀបចំតំបន់អភិវឌ្ឍន៍ភូមិធម្មជាតិរុនតាឯកស្រុកបន្ទាយស្រី និងតំបន់ពាក់ស្នែង ស្រុកអង្គរធំ សម្រាប់បងប្អូនស្ម័គ្រចិត្តចាកចេញពីតំបន់រមណីយដ្ឋានអង្គរ ទៅរស់នៅទីនោះ ក្រោមគោលនយោបាយរបស់រាជរដ្ឋាភិបាល ក្នុងការបញ្ចៀសការដកចេញសម្បតិ្តបេតិកភណ្ឌជាតិចេញពីបញ្ជីសម្បតិ្តបេតិកភណ្ឌពិភពលោក របស់អង្គការយូនីស្កូ។
សម្តេចពិជ័យសេនា ទៀ បាញ់ ក៏បានបញ្ជាក់អំពីភារកិច្ចចំពោះមុខរបស់រដ្ឋបាលខេត្ត លើការទទួលស្វាគមន៍នូវខួប១០ឆ្នាំនៃព្រឹត្តិការណ៍អង្គរសង្ក្រាន្តឆ្នាំ២០២៣ ជាបុណ្យចូលឆ្នាំថ្មីប្រពៃណីខ្មែរ និងជាម្ចាស់ផ្ទះក្នុងការរៀបចំការប្រកួតកីឡាស៊ីហ្គេមលើកទី៣២ និងប៉ារ៉ាហ្គេម ២០២៣។
ជាមួយនេះដែរ សម្តេចពិជ័យសេនា ទៀ បាញ់ ក៏បានជំរុញដល់ប្រជាពលរដ្ឋដែលមានអត្តសញ្ញាណប័ណ្ណហួសការបរិច្ឆេទ ឱ្យទៅធ្វើអត្តសញ្ញាណប័ណ្ណ នៅតាមប៉ុស្តិ៍នគរបាលរដ្ឋបាលឃុំ សង្កាត់ ក្នុងមូលដ្ឋានខ្លួន ដើម្បីត្រៀមលក្ខណៈចូលរួមបោះឆ្នោតជ្រើសតាំងតំណាងរាស្ត្រ អាណត្តិទី៧ នៅថ្ងៃទី២៣ ខែកក្កដា ឆ្នាំ២០២៣ខាងមុខនេះ៕
ដោយ ៖ គឿនវេត
-
សេចក្ដីជូនដំណឹង១ សប្តាហ៍ agoក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា
-
ព័ត៌មានអន្ដរជាតិ៦ ថ្ងៃ agoអស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ
-
កីឡា២ ថ្ងៃ agoល្ងាចនេះ U19 កម្ពុជា ប៉ះ ថៃ វគ្គពាក់កណ្តាលផ្តាច់ព្រ័ត្រ ខណៈជួបគ្នាចុងក្រោយ ថៃ ខកចិត្តម្តងហើយ
-
ព័ត៌មានអន្ដរជាតិ១ ថ្ងៃ agoឥណ្ឌា តវ៉ាយ៉ាងខ្លាំង ចំពោះអាមេរិកដែលវាយប្រហារនាវាដឹកប្រេងបណ្តាលនាវិកឥណ្ឌា ៣នាក់ស្លាប់
-
ព័ត៌មានជាតិ១ សប្តាហ៍ agoកម្ពុជា ថោ្កលទោសយោធាថៃយ៉ាងខ្លាំងក្លាដែលដុតបំផ្លាញជណ្តើរឡើងប្រាសាទខ្នារ ទីតាំងបេតិកភណ្ឌវប្បធម៌
-
សន្តិសុខសង្គម៧ ថ្ងៃ agoចុះពិនិត្យរដ្ឋបាល អគារ The Bridge ខណ្ឌចំការមន រកឃើញជនបរទេស ៤ នាក់ ស្នាក់នៅខុសច្បាប់ និង ដកហូតគ្រឿងញៀនជាង ៦៥ គីឡូក្រាម
-
ព័ត៌មានអន្ដរជាតិ២ ថ្ងៃ agoអាមេរិក បើកការវាយប្រហារទ្រង់ទ្រាយធំជាថ្មី លើអ៊ីរ៉ង់ ខណៈទីក្រុងតេហេរ៉ង់ សងសឹកវិញ ហើយបិទច្រក Hormuz ទៀត
-
ព័ត៌មានអន្ដរជាតិ៣ ថ្ងៃ agoអាមេរិក បើកការវាយប្រហារអ៊ីរ៉ង់ ថ្មីទៀត ដើម្បីសងសឹក ចំពោះការធ្លាក់ឧទ្ធម្ភាគចក្រ Apache