រដ្ឋកាលីហ្វ័រញ៉ាណែនាំឲ្យផ្អាកចាក់វ៉ាក់សាំងកូវីដក្រុមហ៊ុន Moderna ក្រោយមានអ្នកប្រតិកម្មអាឡ័កស៊ីធ្ងន់ធ្ងរ

ក្រុមហ៊ុន Moderna មជ្ឈមណ្ឌលគ្រប់គ្រង និងបង្ការជំងឺ (CDC) និងរដ្ឋបាលចំណីអាហារ និងឪសថអាមេរិក (FDA) កំពុងធ្វើការពិនិត្យឡើងវិញ បន្ទាប់ពីមនុស្សប្រហែល ១០ នាក់បានទទួលរងនូវប្រតិកម្មអាឡ័កស៊ីធ្ងន់ធ្ងរ ។

យោងទៅតាមនាយកដ្ឋានសុខភាពសាធារណៈរដ្ឋកាលីហ្វ័រញ៉ាបានឲ្យដឹងថា វ៉ាក់សាំងកូវីដរបស់ក្រុមហ៊ុន Moderna លេខ 041L20A ត្រូវបានគេសង្ស័យថាបណ្តាលឲ្យមានផលអាក្រក់ជាងធម្មតា ហើយគួរតែត្រូវបានរៀបចំទុកដាក់ មុនពេលការស៊ើបអង្កេតត្រូវបានបញ្ចប់ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រីវេជ្ជបណ្ឌិត Erica S. Pan អ្នកសិក្សាស្រាវជ្រាវផ្នែករោគរាតត្បាតបានឲ្យដឹងថា ឧប្បត្តិហេតុនេះហាក់ដូចជាកើតឡើងនៅគ្លីនិកសហគមន៍មួយដែលត្រូវបានគេរាយការណ៍ថាបានបិទអស់រយៈពេលជាច្រើនម៉ោង បន្ទាប់ពីមានប្រតិកម្មមិនល្អ ។ សរុបទៅវ៉ាក់សាំងចំនួន ៣៣០,០០០ ដូសត្រូវបានចែកចាយដល់អ្នកផ្តល់សេវាចំនួន ២៨៧ កន្លែងនៅទូទាំងរដ្ឋ ប៉ុន្តែនេះជាលើកដំបូងត្រូវបានគេរាយការណ៍ថាមានប្រតិកម្មអាឡ័កស៊ីចំពោះវា ។

ប្រតិកម្មអាឡ័កស៊ីធ្ងន់ធ្ងរត្រូវបានគេរាយការណ៍កាលពីមុននៅទីក្រុង Boston កាលពីខែធ្នូ បន្ទាប់ពីគ្រូពេទ្យបានទទួលការចាក់វ៉ាក់សាំងរបស់ក្រុមហ៊ុន Moderna ។ ទន្ទឹមនឹងនេះអាជ្ញាធរវេជ្ជសាស្រ្តអាមេរិកក៏កំពុងស៊ើបអង្កេតករណីជាច្រើននៃប្រតិកម្មធ្ងន់ធ្ងរចំពោះវ៉ាក់សាំងកូវីដរបស់ក្រុមហ៊ុន Pfizer/BioNTech ។

បើយោងតាមសាកលវិទ្យាល័យ Johns Hopkins បានឲ្យដឹងថា រដ្ឋកាលីហ្វ័រញ៉ាគឺជារដ្ឋដែលរងគ្រោះខ្លាំងជាងគេនៅអាមេរិកដែលមានអ្នកឆ្លងប្រហែលជា ៣ លាននាក់ (១ លាននាក់នៅទីក្រុង Los Angeles) និងមានមនុស្សស្លាប់ជាង ៣៣,០០០ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ឱសថការីអាមេរិកបំផ្លាញវ៉ាក់សាំងកូវីដរាប់រយដូស ព្រោះហេតុផលនេះ

ចុចអាន ៖ វ៉ាក់សាំងកូវីដរបស់ក្រុមហ៊ុន Moderna អាចបណ្តាលឲ្យអ្នកកែសម្ផស្ស ហើមមុខ