មេទាហានស៊ីឈ្នួល រុស្ស៊ី ប្រកាសគ្រប់គ្រងទីក្រុង Bakhmut បាន ៨០ ភាគរយ

ប្រធានក្រុមហ៊ុនទាហានស៊ីឈ្នួលរុស្ស៊ី Wagner Group បានអះអាងកាលពីថ្ងៃអង្គារថា ៨០ ភាគរយនៃទីក្រុង Bakhmut របស់អ៊ុយក្រែន កំពុងស្ថិតនៅក្រោមការគ្រប់គ្រងរបស់កងកម្លាំងមួយនេះ បើទោះបីជាការប្រយុទ្ធគ្នារវាងកងកម្លាំងទាំងពីរនៅតែបន្តក៏ដោយ ។

លោក Yevgeny Prigozhin បាននិយាយនៅក្នុងសេចក្តីថ្លែងការណ៍លើបណ្ដាញ Telegram ថា “យើងបានក្ដោបក្ដាប់ទីក្រុងរ៉ែអំបិលមួយនេះប្រមាណជា ៨០ ភាគរយហើយ ក្នុងនោះរួមមានទាំងរោងចក្រ ក៏ដូចជាមជ្ឈមណ្ឌលរដ្ឋបាលទាំងអស់របស់ទីក្រុងផងដែរ” ។

លោកបន្ថែមទៀតថា កងកម្លាំងក្រុមទាហានស៊ីឈ្នួលកំពុងបន្តប្រយុទ្ធដើម្បីដណ្តើមយកសង្កាត់នានានៅកណ្តាលទីក្រុងមួយ ហើយក៏បានព្យាយាមបណ្ដេញកងកម្លាំងអ៊ុយក្រែនទៅកាន់ជាយក្រុងភាគខាងលិចផងដែរ តាមរយៈការវាយលុយដោយ​កងកម្លាំងដែន​អាកាស​ ​។

កងកម្លាំងរុស្ស៊ីបានព្យាយាមអស់រយៈពេលជាច្រើនខែមកហើយដើម្បីដណ្ដើមយកទីក្រុង Bakhmut ដែលជាមជ្ឈមណ្ឌលដឹកជញ្ជូន និងជាច្រកផ្លូវដ៏សំខាន់នៅក្នុងតំបន់ Donetsk របស់អ៊ុយក្រែន និងជាតំបន់ដែលប្រជាជនភាគច្រើននិយាយភាសារុស្ស៊ី ។

គួរបញ្ជាក់ថា ជ័យជម្នះនៅទីក្រុង Bakhmut ដែលមានប្រជាជនមុនសង្រ្គាមប្រហែល ៧ ម៉ឺននាក់នឹងផ្តល់ឲ្យរុស្ស៊ីនូវរង្វាន់ធំទីមួយនៃការវាយលុករដូវរងា បន្ទាប់ពីបានកែនទាហានបម្រុងរាប់សែននាក់កាលពីឆ្នាំមុន ហើយវាក៏នឹងក្លាយជាជំហានមួយទៀតដើម្បីដណ្តើមយកតំបន់ Donbas ដែលជាគោលដៅសង្គ្រាមដ៏សំខាន់របស់រុស្ស៊ីផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ បែកធ្លាយ ចំនួនកងកម្លាំងពិសេសលោកខាងលិច កំពុងធ្វើ ប្រតិបត្តិការនៅ អ៊ុយក្រែន