ព័ត៌មានជាតិ

ចាក់សោផ្ទះទុកចោលនាំគ្នាចេញទៅធ្វើការអស់ ឆ្លងចរន្ដអគ្គិសនីឆេះខ្ទេច

បានផុស

៤ years មុន

នៅ

ថ្ងៃអង្គារ ១៩ មករា ២០២១

ដោយ

ផ្ទះរបស់ប្រជាពលរដ្ឋ១ខ្នង ត្រូវបានអគ្គិភ័យឆាបឆេះគ្មានសល់ ខណៈម្ចាស់ផ្ទះរវល់ចេញទៅធ្វើការ។

តាមរបាយការណ៍សមត្ថកិច្ចបញ្ជាក់ថា ហេតុការណ៍នេះ បានកើតឡើងនៅវេលាម៉ោង៤.០០នាទី ថ្ងៃទី១៨ ខែមករា ឆ្នាំ២០២១ ត្រង់ចំណុចភូមិអូរខ្ជាយ ឃុំវត្តតាមមឹម ស្រុកសង្កែ ខេត្តបាត់ដំបង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមត្ថកិច្ចបានឲ្យដឹងថា ផ្ទះដែលរងគ្រោះអគ្គិភ័យឆាបឆេះនេះ ជាប្រភេទផ្ទះតៀមជញ្ជាំងថ្មលាយឈើ មានទំហំ៩x៧ម៉ែត្រត្រូវបានខូចខាតទាំងស្រុង។

ម្ចាស់ផ្ទះមានឈ្មោះ ឈួន រីណា ភេទប្រុស អាយុ៣៥ឆ្នាំ និងប្រពន្ធឈ្មោះស៊ឹម សុម៉ាលីន អាយុ៣៣ឆ្នាំ រស់នៅក្នុងភូមិឃុំកន្លែងកើតហេតុ។

តាមការបញ្ជាក់របស់ម្ចាស់ផ្ទះបានឲ្យដឹងថា មុនកើតហេតុពួកគាត់ទាំងពីរនាក់ប្តីប្រពន្ធបានចាក់សោផ្ទះ ហើយចេញទៅធ្វើការងាររៀងៗខ្លួននៅខាងក្រៅ ។

សមត្ថកិច្ចឱ្យដឹងទៀតថា ករណីនេះមិនបង្កឲ្យមានគ្រោះថ្នាក់ដល់មនុស្សណាម្នាក់នោះទេ តែបានធ្វើឲ្យខូចខាតសម្ភារមួយចំនួនធំ ហើយសមត្ថកិច្ចបានសន្និដ្ឋានថា អាចបណ្ដាលមកពីឆ្លងចរន្តអគ្គិសនី ៕

អត្ថបទ ៖ សៅ សារិទ្ធ