ជីវិតកម្សាន្ដ

ណុប បាយ៉ារិទ្ធ ជំរុញទឹកចិត្តក្មេងៗជំនាន់ក្រោយ ត្រូវចេះស្រលាញ់ ឲ្យតម្លៃ និងថែរក្សាវប្បធម៌ខ្មែរ

បានផុស

៣ years មុន

នៅ

ថ្ងៃព្រហស្បតិ៍ ២៥ ឧសភា ២០២៣

ដោយ

ក្នុងនាមតារាចម្រៀងរៀមច្បងមានឈ្មោះល្បីនៅក្នុងវិស័យសិល្បៈយូរឆ្នាំ លោក ណុប បាយ៉ារិទ្ធ បានចេញមកបំផុស ក៏ដូចជាជំរុញទឹកចិត្តដល់ក្មេងៗជំនាន់ក្រោយ ត្រូវចេះស្រលាញ់ ឲ្យតម្លៃ និង ចេះថែរក្សាវប្បធម៌ខ្មែរឲ្យបានគង់វង្សតទៅមុខទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងលោក ណុប បាយ៉ារិទ្ធ បានធ្វើការបង្ហោះរូបភាព ១ សន្លឹក បង្ហាញពីក្មេងប្រុសម្នាក់ សម្ដែងបានយ៉ាងល្អក្នុងតួអង្គហនុមាន ដោយភ្ជាប់ខ្លឹមសារថា «សិល្បៈ ពិតជាដើរតួយ៉ាងសំខាន់នៅក្នុងសង្គមខ្មែរតាំងពីយូរលង់ណាស់មកហើយ ហើយនឹងត្រូវបានបន្តថែរក្សាការពារពីមួយជំនាន់ទៅមួយជំនាន់ ដោយការចងក្រង ថែរក្សា បង្ហាត់បង្រៀនដោយលោកគ្រូ អ្នកគ្រូសាស្ត្រាចារ្យ ពីមួយជំនាន់បន្តទៅមួយជំនាន់»។

លោក ណុប បាយ៉ារិទ្ធ បានបញ្ជាក់ថា «ដូច្នេះក្នុងនាមជាប្រជាជនខ្មែរមួយរូប ខ្ញុំសូមចូលរួមចំណែកជំរុញទឹកចិត្តដល់ក្មេងៗ ជំនាន់ក្រោយ ត្រូវចេះស្រលាញ់ ឲ្យតម្លៃ និងចេះថែរក្សាវប្បធម៌ខ្មែរយើងឲ្យបានគង់វង្សតទៅមុខទៀត។ បើយើងជាម្ចាស់យើងមិនស្រលាញ់ យើងមិនថែរក្សាការពារ ថែរក្សា និងអភិរក្សនោះ គ្មានជាតិសាសន៍ណាផ្សេងមកស្រលាញ់ មកជួយថែរក្សាជួសយើងឡើយ»។

លោកបន្តថា «ខ្ញុំបានមើល Facebook ឃើញដោយចៃដន្យពីការផុសនៅរូបភាពក្មួយប្រុសម្នាក់នេះ សម្ដែងបានយ៉ាងល្អក្នុងតួអង្គហនុមាន កាយវិការ ទឹកមុខ ក្បាច់រាំ ក្មួយធ្វើបានល្អ សក្ដិសម ហាក់ដូចជាទទួលបាននៅការហ្វឹកហាត់ដិតដល់ពីមុនមកអ៊ីចឹង។ ជាមួយនឹងទឹកមុខស្នាមញញឹមរបស់ពុកម៉ែបងប្អូនដែលសម្លឹងមកពីក្រោយ ហាក់បង្ហាញនៅការសាទរស្ងើចសរសើរ និងហាក់ពេញចិត្តចំពោះទេពកោសល្យរបស់ក្មួយប្រុសម្នាក់នេះជាខ្លាំង»។

លោក ណុប បាយ៉ារិទ្ធ និយាយទៀតថា លោកសង្ឃឹមជឿជាក់ថា លោកគ្រូ អ្នកគ្រូ សាស្ត្រាចារ្យសិល្បៈនៅខេត្តសៀមរាប លោកនឹងជួយបណ្ដុះបណ្ដាលបង្វឹកក្មួយប្រុសម្នាក់នេះឲ្យកាន់តែរីកចម្រើន លូតលាស់នូវទេពកោសល្យរបស់គាត់ ឲ្យកាន់តែពូកែថែមទៀត។ ប្រសិនក្មេងប្រុសរូបនេះ បានហ្វឹកហាត់ដិតដល់តាំងពីតូចបែបនេះ ទម្រាំដល់ពេលចម្រើនវ័យពេញរូបពេញរាង ប្រាកដជាក្លាយទៅជាធនធានសិល្បៈផ្នែករបាំដ៏ពេញដោយសមត្ថភាពពិតប្រាកដ។ នោះហើយដែលបង្ហាញពីទំពាំងជំនាន់ក្រោយដ៏មានគុណភាព សក្ដិសមជាអ្នកបន្តវេនសិល្បៈវប្បធម៌មរតកដូនតាខ្មែរនៅថ្ងៃខាងមុខ៕

អត្ថបទ ៖ ចាន់រ៉ា

Related Topics:តារាខ្មែរ លោក ណុប បាយ៉ារិទ្ធ

សេចក្ដីជូនដំណឹង៦ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា