គម្រោងវិនិយោគវារីវប្បកម្មបែបធម្មជាតិ កសិ-ទេសចរណ៍ និងអេកូទេសចរណ៍ នៅខេត្តកោះកុង

គម្រោងវិនិយោគវារីវប្បកម្មបែបធម្មជាតិ កសិ-ទេសចរណ៍ និងអេកូទេសចរណ៍ នៅលើផ្ទៃដីជាង ៧ ពាន់ហិកតានឹងលេចចេញជារូបរាងនៅខេត្តកោះកុងនាពេលឆាប់ៗខាងមុខនេះដែលនឹងជួយទាក់ទាញភ្ញៀវទេសចរទៅកម្សាន្តនៅខេត្តជាប់សមុទ្រមួយនេះកាន់តែច្រើនបន្ថែមទៀត។

នៅក្នុងឱកាសដឹកនាំក្រុមការងារខេត្ត និងមន្ទីរជំនាញចូលរួមជាមួយប្រតិភូក្រសួងបរិស្ថានដើម្បីចុះពិនិត្យមើលទីតាំងគម្រោង នៅថ្ងៃទី២៦ ខែឧសភានេះ បណ្ឌិត អ៊ុក ភ័ក្រ្តា អភិបាលរង នៃគណៈអភិបាលខេត្តកោះកុង បានមានប្រសាសន៍ថា ទីតាំងស្នើសូមវិនិយោគវារីវប្បកម្មបែបធម្មជាតិ កសិ-ទេសចរណ៍ និងអេកូទេសចរណ៍ លើផ្ទៃដីទំហំ ៧ ១២៦,៩៣ ហិកតា ស្ថិតនៅ ៥ទីតាំង ក្នុងឧទ្យានជាតិបុទុមសាគរ និងតំបន់ប្រើប្រាស់ច្រើនយ៉ាងដងពែង ភូមិសាស្ត្រឃុំតានូន ឃុំថ្មស និងឃុំអណ្ដូងទឹក ស្រុកបូទុមសាគរ ខេត្តកោះកុង។

លោកអភិបាលរងខេត្ត មានប្រសាសន៍បានបន្តថា ជាលទ្ធផលនៃការចុះពិនិត្យជាក់ស្តែង និងតាមរយៈកិច្ចប្រជុំ ក្រុមការងារទាំងអស់បានសម្រេចគាំទ្រជាគោលការណ៍លើគម្រោងវិនិយោគរបស់ក្រុមហ៊ុន។ ប៉ុន្តែត្រូវធ្វើការសិក្សាទីតាំងជាក់ស្តែងឡើងវិញ ដោយមានការសហការរវាងក្រុមហ៊ុន ក្រសួងបរិស្ថាន និងអាជ្ញាធរដែនដី ហើយត្រូវផ្ញើរបាយការណ៍លទ្ធផល នៃការសិក្សាទីតាំងមកក្រសួងបរិស្ថាន ដើម្បីពិនិត្យលទ្ធភាពស្នើសុំជួលដីវិនិយោគ និងផ្តល់ទិន្នន័យ និងផែនទីនៃការកាត់ដីវិនិយោគជូនក្រុមហ៊ុន ដើម្បីបានជាមូលដ្ឋានក្នុងការសិក្សាដីដែលនៅសល់ដើម្បីស្នើសូមវិនិយោគ៕

អត្ថបទ៖ សំអឿន