អាកាសយានដ្ឋានអន្តរជាតិភ្នំពេញកើនឡើងជើងហោះហើរជាង ៣០០ជើង​ក្នុង១សប្តាហ៍

អាកាសយានដ្ឋានអន្តរជាតិភ្នំពេញ ទទួលបានជើងហោះហើរចំនួន ៣១៧ជើង ក្នុងមួយសប្តាហ៍ សម្រាប់ការហោះ​ហើរឯកទិស ឬស្មើនឹង ៣៦៤ជើង ក្នុងមួយសប្តាហ៍ សម្រាប់ការហោះហើរទ្វេទិស។ នេះបើតាមការបញ្ជាក់របស់លោក ស៊ីន ចាន់សិរិវុត្ថា រដ្ឋលេខាធិការ និងជាអ្នកនាំពាក្យអាកាសចរស៊ីវិល នៅរសៀលថ្ងៃទី ២៣ មិថុនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ីន ចាន់សិរិវុត្ថា បានឱ្យដឹងថា គិតត្រឹមរយៈពេល ៥ខែ ឆ្នាំ ២០២៣ មានក្រុមហ៊ុនអាកាសចរណ៍អន្តរជាតិចំនួន ២៦ ក្រុមហ៊ុន បានតភ្ជាប់ជើងហោះហើរឡើងវិញដែលកំពុងហោះហើរចេញ-ចូល គឺស្មើនឹងជាង ៥០ភាគរយ នៃឆ្នាំ ២០១៩។ ដោយនៅឆ្នាំ២០១៩ មានក្រុមហ៊ុនអាកាសចរណ៍ចំនួន៤៣ ក្រុមហ៊ុន ដែលធ្លាប់បានធ្វើការហោះហើរ។ 

សម្រាប់អ្នកដំណើរ មានចំនួនជាង ២ លាននាក់ (២,១០៩,៦១២) រយៈពេល ៥ខែ ឆ្នាំ ២០២៣ បានកើនឡើង​ជាង៣០០% បើធៀបទៅនឹងរយៈពេលដូចគ្នា នៅឆ្នាំ២០២២ ។ ចំណែកចំនួនជើងហោះហើរមានជាង ២ ម៉ឺនជើង (២០,៧៣៩) មានការកើនឡើង ជាង១៦០%​ (១៦៦%) បើធៀបទៅនឹងរយៈពេលដូចគ្នា នៅឆ្នាំ២០២២។

វិស័យអាកាសចរស៊ីវិល កាន់តែមានដំណើរការល្អប្រសើរជាលំដាប់ ពី ១ខែទៅ១ខែ។ នេះជាការបញ្ជាក់របស់លោក ស៊ីន ចាន់សិរីវុត្ថា។ ក្រៅពីព្រលានយន្តហោះអន្តរជាតិភ្នំពេញ លោក វុត្ថា បានលើកឡើងថា អាកាសយានដ្ឋាន​ខេត្តសៀមរាប ទទួលបានជើងហោះហើរចំនួន​ ៩៨ ជើង​/សប្តាហ៍ ​(ជើងហោះហើរឯកទិស/ Flight) ឬស្មើនឹង១៩៦ ជើង/សប្តាហ៍​(ជើងហោះហើរទ្វេទិស​/Flight Movements)។ រីឯខេត្តព្រះស៊ីហនុទទួលបាន ជើងហោះហើរចំនួន ១១ ជើង​/សប្តាហ៍ ​(ជើងហោះហើរឯកទិស/ Flight) ឬស្មើនឹង​​ ២២ ជើង/សប្តាហ៍ (ជើងហោះហើរទ្វេទិស/Flight Movements)។

បើតាមលោក ស៊ីន ចាន់សិរិវុត្ថា សម្រាប់ផ្លូវហោះហើរ​ដែលនាំមុខគេ នោះគឺ ជើងហោះហើររវាង ភ្នំពេញ-បាងកក-ភ្នំពេញ និងភ្នំពេញ-សឹង្ហបុរី-ភ្នំពេញ និងភ្នំពេញ-កូឡាឡាំពួរ-ភ្នំពេញ។

លោកមានការរពឹងទុកថា ក្នុងពេលឆាប់ៗនេះ នឹងមានការកើនឡើងផ្លូវហោះហើរ​ រវាង កម្ពុជា-ចិន បន្ថែមទៀតនាពេលខាងមុខផងដែរ៕