សម្ដេចធិបតី៖ការបើកសាកល្បងព្រលានយន្តហោះពោធិ៍ចិនតុង ជាមូលដ្ឋានវាយតម្លៃ ដើម្បីរៀបចំការងារមួយចំនួនប្រែក្លាយជាទីសាធារណៈឆាប់ៗ

សម្ដេច ហ៊ុន ម៉ាណែត គូសបញ្ជាក់ថា ការបើកឱ្យពលរដ្ឋចូលលេងកម្សាន្តនៅព្រលានយន្តហោះពោធិ៍ចិនតុងក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ក៏ជាមូលដ្ឋាននៃការវាយតម្លៃ ដើម្បីរៀបចំការងារមួយចំនួនបន្ថែមទៀតសំដៅប្រែក្លាយទីតាំងដែលធ្លាប់ភ្ជាប់ជើងមេឃកម្ពុជាទៅកាន់ពិភពលោក ឱ្យក្លាយទៅជាសួនសាធារណៈសម្រាប់ប្រជាពលរដ្ឋទូទៅចូលទៅកម្សាន្តពេញលេញនាពេលឆាប់ខាងមុខ។ សម្ដេច ហ៊ុន ម៉ាណែត លើកឡើងដូច្នេះ តាមរយៈបណ្ដាញសង្គមហ្វេសប៊ុក  នាល្ងាចថ្ងៃទី១៩ ខែមេសា​ ឆ្នាំ២០២៦។

ប្រមុខរាជរដ្ឋាភិបាលកម្ពុជា សរសេរលើទំព័រហ្វេសប៊ុកផ្លូវការដូច្នេះ៖«ការបើកសាកល្បងក្នុងអំឡុងពេលចូលឆ្នាំថ្មីនេះ ក៏ជាមូលដ្ឋានដែលក្រុមការងារយកធ្វើការវាយតម្លៃ ដើម្បីធ្វើការរៀបចំការងារមួយចំនួនបន្ថែម រួមទាំងការងារហេដ្ឋារចនាសម្ព័ន្ធ ការដាំដើមឈើ ។ល។ ក្នុងគោលដៅធ្វើឲ្យបរិស្ថានបរិវេណអាកាសយានដ្ឋាន អន្តរជាតិភ្នំពេញ កាន់តែប្រសើរឡើង សម្រាប់បើកជូនប្រជាពលរដ្ឋ ចូលលេងកម្សាន្ត និងហាត់ប្រាណប្រចាំថ្ងៃនៅពេលឆាប់ៗខាងមុខ តាមគោលការណ៍ដែលធ្លាប់បានបញ្ជាក់ជូនប្រជាពលរដ្ឋ៖១.មិនលក់អាកាសយានដ្ឋានអន្តរជាតិភ្នំពេញ (ពោធិ៍ចិនតុង) ឱ្យក្រុមហ៊ុនឯកជនណានោះទេ។ ២. រក្សាទុកជាទ្រព្យសម្បត្តិរបស់រដ្ឋ និងប្រើប្រាស់ក្នុងគោលបំណងពីរគឺ: ១) ជាព្រលានយន្តហោះបម្រុង និង ២) ជាទីកន្លែងសាធារណៈសម្រាប់ប្រជាពលរដ្ឋទូទៅបានចូលកំសាន្តនិងហាត់កីឡា។»។

អាកាសយានដ្ឋានអន្តរជាតិភ្នំពេញ ត្រូវបានបើកដំណើរការសាកល្បងឡើងវិញក្នុងទម្រង់ជាសួនសាធារណៈ សម្រាប់សាធារណជនចូលកម្សាន្តរយៈពេល៩ថ្ងៃ ចាប់ពីថ្ងៃទី១១ ដល់ថ្ងៃទី១៩ ខែមេសា ឆ្នាំ២០២៦ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ។ របាយការណ៍ផ្លូវការ បានឱ្យដឹងថា ត្រឹមរយៈពេល៧ថ្ងៃ នៃការបើកដំណើការសាកល្បងគឺមានប្រជាពលរដ្ឋជាង១៧ម៉ឺននាក់បានចូលទៅកម្សាន្ត។  

អាកាសយានដ្ឋានអន្តរជាតិភ្នំពេញ ដែលមាន​ឈ្មោះ​ដើម​ថា អាកាស​យាន​ដ្ឋាន​​អន្តរជាតិ​ពោធិ៍ចិនតុង បានចាប់ផ្ដើមសាងសង់នៅ​ឆ្នាំ​១៩​៥៧ និង​សម្ពោធ​ដាក់​ឱ្យ​ដំណើរការ​នៅឆ្នាំ​១៩៥៩។ ឆ្លងកាត់របបដឹកនាំជាច្រើនរបប និងបម្រើការហោះហើរជាង៦០ឆ្នាំ អាកាសយានដ្ឋានដ៏ចំណាស់នេះ បានបិទប្រតិបត្តិការហោះហើរទាំងស្រុងនៅថ្ងៃទីិ៩ ខែកញ្ញា ឆ្នាំ២០២៥ នៅពេលដែលកម្ពុជា បើកប្រតិបត្តិការហោះហើរនៅអាកាសយានដ្ឋានថ្មី គឺអាកាសយានដ្ឋានអន្តរជាតិតេជោ លំដាប់4F នៅភាគខាងត្បូងរាជធានីភ្នំពេញ៕

ដោយ៖ ង៉ិល ណារ៉ាត់