កីឡា

សមាជិកព្រះខ័នរាជស្វាយរៀង២រូបប្រាប់ពីចំណុចសំខាន់របស់គ្រូបង្វឹកថ្មី

បានផុស

៣ years មុន

នៅ

ថ្ងៃពុធ ២៨ មិថុនា ២០២៣

ដោយ

ក្លិបបាល់ទាត់ព្រះខ័នរាជស្វាយរៀងបានកំពុងហ្វឹកហាត់ការក្រោមការដឹកនាំរបស់លោក Pep Muñoz ជាគ្រូបង្វឹកថ្មីរយៈពេលប្រមាណ២ខែមកហើយដើម្បីត្រៀមសម្រាប់ការប្រកួតខេមបូឌានព្រីមៀរលីគរដូវកាលថ្មី ២០២៣-២៤។

ក្រោមការបង្វឹករបស់គ្រូបង្វឹកសញ្ជាតិអេស្ប៉ាញ កីឡាករវ័យក្មេងរបស់ព្រះខ័នរាជស្វាយរៀង២រូបបានចាប់អារម្មណ៍ចំពោះបច្ចេកទេស និងស្ទីលថ្មីនៅលើទីលាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យុវជនលេចធ្លោ មិន រតនៈ បានប្រាប់កម្ពុជាថ្មីថា ៖«សម្រាប់ខ្ញុំក៏ដូចជាក្រុមទាំងមូលគឺយើងយល់ចិត្តគ្នាបានច្រើន។ ពួកយើងចាប់បានច្រើន និងព្យាយាមលេងអ្វីដែលគ្រូបានប្រាប់។ គ្រូថ្មីមានលក្ខណៈពិសេសខុសពីគ្រូមុនគឺគាត់ឲ្យយើងលេងរក្សាបាល់ឲ្យច្រើន ហ៊ានលេង លេងខ្លីឲ្យមានគុណភាព»។

«សម្រាប់រដូវកាលថ្មីដែលមាន១០ក្រុមចូលរូមគឺជារឿងដ៏លំបាក ព្រោះក្រុមនីមួយៗសុទ្ធតែរៀបចំ និងត្រៀមខ្លូនបានល្អដូចគ្នា តែខ្ញុំនិងក្រុមទាំងមូលបេ្ដជ្ញាព្យាយាមធ្វើឲ្យបានល្អសម្រាប់រដូវកាលថ្មី»។ មិន រតនៈ បានបន្ថែម។

ជាមួយគ្នានេះ រី លាភផេង ខ្សែបម្រើការពារវ័យក្មេងលេខ៣២របស់ព្រះខ័នរាជស្វាយរៀងបានប្រាប់ថា អ្វីដែលរូបគេចាប់បានពីគន្លឹះសំខាន់ពីលោកគ្រូបង្វឹក Pep គឺការព្យាយាមលេងយល់ចិត្តគ្នា និងគ្រប់គ្រងបាល់ឲ្យបានច្រើននៅលើទីលាន។

សម្រាប់ការត្រៀមខ្លួននេះដែរ ក្លិបព្រះខ័នរាជស្វាយរៀង នឹងធ្វើដំណើរទៅប្រទេសថៃនៅដើមខែកក្កដាខាងមុខនេះដើម្បីប្រកួតកម្តៅសាច់ដុំ២ប្រកួតគឺ១ប្រកួតជាមួយក្លិបមកពីលីគកំពូល និង១ប្រកួតទៀតជាមួយក្លិបមកពីលីគទី២របស់ថៃ។

លោក Pep Muñoz បាននិយាយថា ៖«មិត្តភាពកម្តៅសាច់ដុំខាងមុខនេះជាពេលវេលាមួយដែលក្រុមរបស់យើងត្រូវស្វែងចិត្តគ្នាឲ្យកាន់តែល្អប្រសើរ។ គោលបំណងសំខាន់ចំពោះការប្រកួតមិត្តភាពនៅថៃគឺដើម្បីអភិវឌ្ឍស្មារតីក្រុម។ យើងនឹងចំណាយពេលវេលានៅជាមួយគ្នា និងមានការប្រកួតមិត្តភាព។ ជាសប្តាហ៍ដែលយើងពង្រឹងក្រុមមុនពេលរដូវកាលថ្មីចូលមកដល់។ នេះជាឱកាសល្អដែលក្រុមត្រូវបង្កើតគំនិតរួមគ្នា»។

ខេមបូឌានព្រីមៀរលីគរដូវកាល២០២៣-២៤ នឹងចាប់ផ្តើមនៅថ្ងៃសៅរ៍ ទី៥ ខែសីហា ឆ្នាំ២០២៣ ដោយមានក្លិបចំនួន១០ចូលរួមប្រកួតប្រជែង។ ក្លិបទាំង១០សុទ្ធតែបានតៀមខ្លូនបានយ៉ាងល្អសម្រាប់រដូវកាលថ្មី។

លោកគ្រូ Pep Muñoz មានបទពិសោធច្រើនក្នុងអាជីពជាគ្រូបង្វឹកក្នុងនោះលោកធ្លាប់ចំណាលពេល៤ឆ្នាំជាមួយក្រុមយុវជន U19 និង Barcelona B ដោយបានឈ្នះពានរង្វាន់ U19 UEFA Champion League ម្តង និងឈ្នះពានលីគ២ដង មុនទៅកាន់ប្រទេសចិន ដែលជាកន្លែងលោកចំណាយពេល ៧ឆ្នាំដឹកនាំក្រុមជាច្រើននៅទីនោះដូចជា Huanghai FC, Shandong Fc និងក្រុមជម្រើសជាតិចិន៕

អត្ថបទ៖ ផា រតនា

Related Topics:ក្លឹបបាល់ទាត់ព្រះខ័នរាជស្វាយរៀង

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា