​មេឃុំល្វេជំរុញឱ្យពលរដ្ឋទៅបោះឆ្នោត​កុំជឿតាមការញុះញង់របស់ក្រុមប្រឆាំង​

លោក ឡុច លីម មេឃុំល្វេ ស្រុកកោះសូទិន ខេត្តកំពង់ចាម ​បានជំរុញឱ្យប្រជាពលរដ្ឋ​ទៅបោះឆ្នោត​ឱ្យបានគ្រប់គ្នា កុំជឿតាមការញុះញង់របស់ក្រុមប្រឆាំង ​ដែលបំផុសកុំឱ្យទៅបោះឆ្នោត ឬបំផ្លាញ​សន្លឹក​ឆ្នោត ក្នុងការបោះឆ្នោតជ្រើសរើសតំណាងរាស្ត្រនីតិកាលទី ៧ ខាងមុខនេះ។

មានប្រសាសន៍ក្នុងបទសម្ភាសន៍ជាមួយសារព័ត៌មានកម្ពុជាថ្មី លោកមេឃុំ ឡុច លីម បានឱ្យដឹងថា អាជ្ញាធរឃុំតែងតែ​ជួយសម្របសម្រួលធ្វើឯកសារចុះឈ្មោះបោះឆ្នោតរបស់ប្រជាពលរដ្ឋ និងបានណែនាំ​ប្រជាពល​រដ្ឋ​ឱ្យទៅបោះឆ្នោតកុំឱ្យជឿជនអគតិមួយចំនួន​ដែលបានបំផុសមិនឱ្យទៅបោះឆ្នោត ឬបំផ្លាញសន្លឹកឆ្នោត។

លោក ឡុច លីមមានប្រសាសន៍ថា៖ «ខ្ញុំបានបានណែនាំជាហូរហែរថា ​សំខាន់ប្រជាពលរដ្ឋម្នាក់ ជាសន្លឹកឆ្នោតមួយសន្លឹក ​អញ្ចឹងប្រជាពលរដ្ឋម្នាក់ គឺមានសិទ្ធិជ្រើសរើសតំណាងរបស់យើងមួយ​ដែលល្អប្រសើរ​ ដើម្បីដឹកនាំប្រទេស អភិវឌ្ឍប្រទេសឱ្យបានល្អប្រសើរ»។

លោកមេឃុំបានបញ្ជាក់ថា នៅពេលបោះឆ្នោតជ្រើសរើសតំណាងរាស្ត្រនីតិកាលទី ៧ ខាងមុខនេះ ឃុំល្វេក៏បានត្រៀមការពារដែរជួយ​សម្របសម្រួលឱ្យ​គណៈកម្មាធិការរៀបចំការ​បោះឆ្នោតដំណើរ​ការបានល្អ៕