ក្រុមការងារក្រសួងព័ត៌មាន រកឃើញព័ត៌មានមិនពិត ៣០ករណី អំឡុងពេលឃោសនាបោះឆ្នោត ៦ថ្ងៃ

មន្ត្រីជាន់ខ្ពស់ក្រសួងព័ត៌មាន បានអះអាងថា ក្រុមការងារត្រួតពិនិត្យប្រព័ន្ធផ្សព្វផ្សាយក្នុងអំឡុងពេលយុទ្ធនាការឃោសនា និងការបោះឆ្នោតជ្រើសតាំង តំណាងរាស្ត្រ នីតិកាលទី ៧ បានរកឃើញព័ត៌មានមិនពិតពាក់ព័ន្ធនឹងការឃោសនាបោះឆ្នោតចំនួន ៣០ករណី​។

លោក ផុស សុវណ្ណ ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្នាព័ត៌មាន និងសោតទស្សន៍ បានឲ្យដឹងថា ក្នុងរយៈពេល ៦ថ្ងៃ នៃយុទ្ធនាការឃោសនាបោះឆ្នោត ក្រុមការងាររបស់លោក បានរកឃើញព័ត៌មាន​មិនពិត​ពាក់ព័ន្ធនឹងការឃោសនាចំនួន​ ៣០ករណី​ ហើយបាន​បញ្ជូន​ទៅ​ក្រុម​ការងារចាត់វិធានការចំនួន ២ករណី ដោយ ១ករណីតាមបណ្ដាញសង្គម Tik Tok និងមួយករណីទៀត តាមបណ្ដាញសង្គមហ្វេសប៊ុក។

លោក ផុស សុវណ្ណ មានប្រសាសន៍ប្រាប់កម្ពុជាថ្មី នៅព្រឹកថ្ងៃទី ៧ ខែកក្កដានេះថា «ការងារនេះ ពីថ្ងៃទី ១ មកហ្នឹង ដូចជាមានតែ ៣០ករណីទេ ហើយយើងបានធ្វើការងារទៅតាមយន្ដការ ដែលយើងមានដូចជាប្រកាសអន្តរក្រសួងលេខ ១៧០ហ្នឹង គឺយើងបានបញ្ជូនទៅឲ្យសមត្ថកិច្ចមានវិធានការ គឺគណៈកម្មការដែលធ្វើការតាមមុខការរៀងៗខ្លួន អ្នកដែលមាន»។

សម្រាប់ព័ត៌មានមិនពិត ដែលត្រូវបានរកឃើញទាំង ៣០ករណីនោះ ប្រភពសុទ្ធតែមិនមានការចុះបញ្ជីនៅក្រសួងព័ត៌ មាន។ ដូច្នេះ ក្រុមការងាររបស់ក្រសួងព័ត៌មាន បានបញ្ជូនករណីទាំងនោះ ឲ្យអគ្គស្នងការដ្ឋាននគរបាលជាតិ ដើម្បីតាមដាន និងមានវិធានការបន្ត៕