អាជ្ញាធរប្រាប់ឱ្យពលរដ្ឋប្រើផ្លូវ​ល្បឿនលឿនបណ្ដោះអាសន្ន

លោក វ៉ី សំណាង អភិបាលខេត្ត​កំពង់ស្ពឺនៅព្រឹកថ្ងៃអាទិត្យទី ៣០ ខែកក្កដានេះ បានប្រាប់ឱ្យប្រជាពរដ្ឋដែលធ្វើដំណើរតាមផ្លូវជាតិលេខ ៤ ប្រើប្រាស់ផ្លូវល្បឿនលឿនបណ្ដោះអាសន្ន ខណៈទឹកជំនន់ទឹកភ្លៀងលិចគីឡូម៉ែត្រលេខ ១១៦ ក្នុងភូមិសាស្ត្រខេត្តព្រះសីហនុ។

ដោយសារ​ភ្លៀង​ធ្លាក់ច្រើនថ្ងៃជាប់ៗ​គ្នា​ បង្ក​ឲ្យ​មាន​ជំនន់​ទឹកភ្លៀង​ហូរ​កាត់​ផ្លូវជាតិ​លេខ​៤នៅចំណុចមួយចំនួន រហូតឈានដល់ការផ្អាកចរាចរណ៍ជាបណ្ដោះអាសន្នដើម្បីកុំឱ្យខូចខាតផ្លូវ។

ក្រសួងធនធានទឹក នឹងឧតុនិយមបានបញ្ជាក់ថា នៅថ្ងៃទី ៣០ ខែកក្កដា ឆ្នាំ២០២៣ ព្រឹក ស្ថានភាពទឹកនៅស្ទឹងសំរោង ក្នុងឃុំបាក់រទេះ ស្រុកកំពង់សិលា ខេត្តព្រះសីហនុ ទឹកបានឡេីងដល់កម្ពស់ ៥,៧៧ ម៉ែត្រ/៦,០០ ម៉ែត្រ ទឹកបានហូរកាត់ផ្លូវប្រវែងចន្លោះពី ៥០ម៉ែត្រទៅ១០០ម៉ែត្រ ដែលជាចំណុចជូនដំណឹងដល់បងប្អូនផ្អាកដំណើរការឆ្លងកាត់ជាបណ្ណោះអាសន្ន។

កាលពីថ្ងៃទី ២៩ ខែកក្កដា ស្ថានភាព​ទឹកភ្លៀង​បាន​ធ្លា​ក់ជាប់ៗ​គ្នា​ប៉ុន្មាន​ថ្ងៃនេះ ធ្វើ​ឲ្យ​មាន​ជំនន់​ទឹកភ្លៀង​ហូរ​កាត់​ផ្លូវជាតិ​លេខ​៤ ចន្លោះ​គីឡូម៉ែត្រ​លេខ (១០៧-១០៨) ជាប់​ព្រំប្រទល់​រវាង​ឃុំ​យាយ​ម៉ៅ​ពេជ្រនិល ស្រុក​ភ្នំស្រួច និង​ឃុំ​អូរ​បាក់រទេះ ស្រុក​កំពង់​សិលា ខេត្ត​ព្រះសីហនុ​៕