គ្រូបង្រៀនម្នាក់ត្រូវប្រជាជនថៃសុំថត ព្រោះស្មានថាជាលោក ប្រាយុទ្ធ

បុរសជនជាតិថៃម្នាក់ធ្លាប់ក្លាយជាចំណាប់អារម្មណ៍មហាជន ពេលដែលរូបភាពរបស់លោកត្រូវគេបង្ហោះលើ​អ៊ីនធឺណិត​ ដោយប្រៀបធៀបមុខមាត់ដូចបេះដាក់ទៅនឹងនាយករដ្ឋមន្ត្រី​ចាំផ្ទះ​លោក ប្រាយុទ្ធ ចាន់អូចា។

ក្រោយភាពល្បីល្បាញរបស់លោកបានសាយភាយ ​ក្រុមអ្នកសារព័ត៌មាន Matichon បានទៅដល់ទីតាំងផ្ទាល់ដោយ​ធ្វើការ​សម្ភាសន៍​លើរូបលោក ទើបដឹងថាលោកគឺជា​គ្រូ​អប់រំ​កាយ​នៅ​ខេត្ត Nong Khai។

លោកមានឈ្មោះថា ខាំ ខៀន អាយុ​៥៤​ឆ្នាំ ជា​គ្រូបង្រៀន​ឯកទេស ប្រធានក្រុមអប់រំសុខភាព និងអប់រំកាយ នៅសាលា Pathumthep Wittayakarn ស្រុក Muang ខេត្ត Nong Khai។ បន្ទាប់ពីចាប់ផ្តើម​មាន​និន្នាការ​លើ​អ៊ីនធឺណិត រូបគាត់មានគេមកសុំថតរូបនិង​សុំ​បាន​ហត្ថលេខា។ ប៉ុន្តែ​គាត់​បានប្រាប់មកវិញថា ត្បិតថារីករាយដែលមុខដូច​លោកប្រាយុទ្ធ ប៉ុន្តែគាត់មិន​ចង់​យក​ខ្លួន​ឯង​ទៅប្រៀប​នឹង​នាយក​រដ្ឋមន្ត្រី​ទេ។

គ្រូអប់រំកាយ និងធ្លាប់ជាមេបញ្ជាការមុខវិជ្ជាយោធានៃសាលារូបនេះ និយាយទាំងញញឹម​ថា “ដោយ​ផ្ទាល់ ខ្ញុំ​មិន​ដឹង​ថា​ខ្ញុំមុខដូចពិតឬអត់? ប៉ុន្តែ​ខ្ញុំ​ចូល​ចិត្ត​ឧត្ដមសេនីយ៍​ប្រាយុទ្ធ។ ក្រោយមកខ្ញុំត្រូវគេ​សុំ​ថត​រូប​និង​ហត្ថលេខានៅ​សាលា ឬទៅទិញ​អីវ៉ាន់ គេតែងតែនិយាយថា មុខស្រដៀង ហើយមុខបែបនេះអស់ពេលជាយូរមកហើយ”។

ទោះយ៉ាងណាក៏ដោយ ​រឿងរ៉ាវ​បុរស​គ្រូបង្រៀន​ខាងលើនេះបានកើតឡើងតាំង​ពីឆ្នាំ ២០១៤ ក្នុងពេលដែល​លោក​ឧត្ដមសេនីយ៍ប្រាយុទ្ធ​ទើបឡើងកាន់តំណែងនាយករដ្ឋមន្ត្រីថៃ​ដំបូងៗមក​ម្ល៉េះ។ ស្របពេលដែលលោកគ្រូ​អ្នកគ្រូ​សុទ្ធតែថា​បុគ្គលិកលក្ខណៈ ឥរិយាបថ និងរូបរាងស្រដៀងរបស់គាត់ គឺដូចគ្មានខុសគ្នាឡើយ។

យ៉ាងណាមិញ ត្បិតថារូបភាពរបស់លោកកើតឡើងអស់រយៈពេល៩ឆ្នាំហើយក្ដី ប៉ុន្តែភាពល្បីល្បាញរបស់គាត់នៅបន្តមានមកដល់សព្វថ្ងៃនេះ។ ក្នុងនោះ មនុស្សជាច្រើននៅតែសុំថតរូប​ និងហត្ថលេខាដោយផ្ទាល់ ហើយប្រៀបប្រដូចទៅនឹងលោកប្រាយុទ្ធជារឿយៗផងដែរ៕

អត្ថបទ៖ សាង ស្រីល័ក្ខ

ចុចអាន៖បុត្រា ៤អង្គរបស់ស្ដេចថៃ Maha Vajiralongkorn ដែលនិរទេសទៅអាមេរិក បច្ចុប្បន្នកាន់មុខតំណែងសំខាន់អ្វីខ្លះ?