ឱកាសកុមារី ទទួលវ៉ាក់សាំងមាត់ស្បូន ឥតគិតថ្លៃ ឆ្នាំ២០២៣

បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី និងរដ្ឋមន្ត្រីក្រសួងអប់រំ យុវជន និងកីឡា បានជម្រាបជូន លោក លោកស្រីប្រធានមន្ទីរអប់រំ យុវជន និងកីឡារាជធានី ខេត្ត អំពី ការផ្តល់វ៉ាក់សាំងបង្ការជំងឺមហារីកមាត់ស្បូនដល់កុមារីអាយុ ៩ឆ្នាំ ដែលកំពុងសិក្សានៅតាមសាលាបឋមសិក្សាសាធារណៈ និងឯកជន ទូទាំងប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោង លិខិតលេខ ១២០សអបស ចុះថ្ងៃទី១៧ ខែសីហា ឆ្នាំ២០២៣ របស់ក្រសួងសុខាភិបាល បណ្ឌិតសភាចារ្យ ហង់ជួន ណារ៉ុន សូមជម្រាប លោក លោកស្រីប្រធាន ជ្រាបថា ក្រសួងសុខាភិបាលនឹង ធ្វើយុទ្ធនាការផ្តល់វ៉ាក់សាំងបង្ការជំងឺមហារីកមាត់ស្បូន ដល់កុមារីអាយុ ៩ឆ្នាំ ដែលកំពុងសិក្សានៅតាមសាលាបឋមសិក្សាសាធារណៈ និងឯកជនទូទាំងប្រទេស ចាប់ពីខែតុលា ឆ្នាំ២០២៣ ខាងមុខនេះ និងឆ្នាំបន្តបន្ទាប់។

រដ្ឋមន្ត្រីក្រសួងអប់រំ បានបញ្ជាក់បន្ថែមថា ទន្ទឹមនឹងនេះ មន្ទីរអប់រំ យុវជន និងកីឡា ត្រូវផ្ដល់កិច្ចសហការដូចជា៖ ១. ស្រង់ស្ថិតិកុមារីអាយុ ៩ឆ្នាំ ដែលកំពុងសិក្សានៅតាមសាលាបឋមសិក្សាសាធារណៈ និងឯកជននីមួយៗ ដូចតារាងជូនភ្ជាប់។ ២. ផ្សព្វផ្សាយដល់គ្រប់សាលាបឋមសិក្សាទាំងអស់អំពី អត្ថប្រយោជន៍ នៃការចាក់វ៉ាក់សាំងបង្ការជំងឺមហារីកមាត់ស្បូន នៅតាមសាលារៀនផ្ទាល់ និង៣. ណែនាំមាតាបិតា អ្នកអាណាព្យាបាល ឱ្យនាំកូនស្រីអាយុ ៩ឆ្នាំ ដែលខកខានមិនបានចាក់វ៉ាក់សាំងនៅតាមសាលារៀន ឱ្យនាំកូនទៅទទួលការចាក់វ៉ាក់សាំងនៅតាមមណ្ឌលសុខភាព។