សម្ដេចធិបតី ហ៊ុន ម៉ាណែត ៖ វប្បធម៌សន្ទនា វាដើរទាល់តែភាគីទាំងពីរ ឯកភាពគ្នា និងយល់គ្នា

សម្តេចមហាបវរធិបតី ហ៊ុន ម៉ាណែត​ នាយករដ្ឋមន្ត្រី​នៃកម្ពុជា បានលើកឡើងថា វប្បធម៌សន្ទនា កើតឡើងបានទាល់តែភាគីទាំងពីរ ឯកភាពគ្នា និងយល់គ្នា។ ការលើកឡើងនេះ គ្រាដែលសម្ដេចធិបតី ហ៊ុន ម៉ាណែត អញ្ជើញជួបសំណេះ សំណាលជាមួយកម្មករ-និយោជិតចំនួន ១៨,០៩៩នាក់ នៅតាមបណ្តារោងចក្រ-សហគ្រាស នៅរាជធានីភ្នំពេញ នាព្រឹកថ្ងៃទី ៣ ខែតុលា ឆ្នាំ ២០២៣នេះ។

សម្ដេចធិបតី ហ៊ុន ម៉ាណែត រំលឹកថា កាលពីពេលថ្មីៗនេះ មានស្ត្រីអ្នកនយោបាយ នៃអតីតគណបក្សប្រឆាំងមួយរូប ដឹកនាំមនុស្សមួយក្រុមតូចធ្វើបាតុកម្ម ប្រឆាំងនឹងវត្តមានរបស់សម្ដេចនៅសហរដ្ឋអាមេរិក តែក្រោយមកស្ត្រីអ្នកនយោ បាយដដែល ក៏បានលើកឡើងថា រាជរដ្ឋាភិបាលថ្មី គួរតែមានវប្បធម៌សន្ទនា។

សម្ដេចធិបតី ហ៊ុន ម៉ាណែត បានលើកឡើងថា វប្បធម៌សន្ទនា អាចកើតទៅបានទាល់តែភាគីទាំងពីរ ឯកភាពគ្នា និងយល់គ្នា។ សម្ដេច បន្ថែមបែបនេះថា «អាហ្នឹងវប្បធម៌សន្ទនា វាដើរទាល់តែភាគីទាំងពីរ ឯកភាពគ្នា យល់គ្នា មែនទេ? ចង់ត្រូវគ្នា ពួកម៉ាកឈ្លោះគ្នាត្រូវគ្នា កុំមកជេរពីនាយហើយ មកបបួលត្រូវគ្នា អត់ត្រូវទេណា៎ មកដល់ជេរឯងកប់ៗ ហើយ មកបបួលឯងត្រូវ អត់ត្រូវទេ»។

សម្ដេចធិបតី ហ៊ុន ម៉ាណែត បានរំលឹកដែរថា វប្បធម៌សន្ទនានេះ ត្រូវបានសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា បង្កើតឡើងជាមួយលោក សម រង្ស៊ី អតីតប្រធានគណបក្សសង្រ្គោះជាតិ។ ប៉ុន្តែក្រោយមក វប្បធម៌សន្ទនានេះ ត្រូវបានបរាជ័យទៅវិញ ដោយសារតែទង្វើលោក សម រង្ស៊ី ៕