កូរ៉េខាងជើងបង្កើតទិវា “មីស៊ីលជាតិ”

យោងតាមការចុះផ្សាយរបស់ទូរទស្សន៍ជប៉ុន NHK បានឲ្យដឹងថា ប្រទេសកូរ៉េខាងជើងបានកំណត់ថ្ងៃឈប់សម្រាកថ្មីមួយទៀតដើម្បីរំឭកដល់ការបាញ់មីស៊ីលផ្លោងឆ្លងទ្វីប (ICBM) កាលពី ៤ ឆ្នាំមុន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កូរ៉េខាងជើងកាលពីថ្ងៃទី ២៩ ខែវិច្ឆិកា ឆ្នាំ ២០១៧ បានបាញ់សាកល្បងមីស៊ីល Hwasong-15 ដែលបានធ្លាក់ចូលសមុទ្រជប៉ុន ។ ទីក្រុងព្យុងយ៉ាងបានអះអាងថា មីស៊ីល ICBM មានសមត្ថភាពទៅដល់ដីគោកអាមេរិកទាំងមូល ។

NHK បានរាយការណ៍ថា កូរ៉េខាងជើងកំណត់យកថ្ងៃទី ២៩ ខែវិច្ឆិកាជាថ្ងៃអបអរការអភិវឌ្ឍរ៉ុកកែតរបស់ប្រទេសជាតិ ។

នៅឯសមាជគណបក្សពលករកំពុងកាន់អំណាចរបស់កូរ៉េខាងជើងកាលពីខែមុនមេដឹកនាំលោក គីម ជុងអ៊ុន បាននិយាយថា ការបាញ់សាកល្បងដោយជោគជ័យនេះបានប្រកាសទៅកាន់ពិភពលោកថា ការបង្កើតសមត្ថភាពនុយក្លេអ៊ែររបស់ប្រទេសត្រូវបានបញ្ចប់ ។ លោកបានសង្កត់ធ្ងន់ថា លោកក៏នឹងអភិវឌ្ឍកម្មវិធីនុយក្លេអ៊ែរ និងមីស៊ីលបន្ថែមទៀតផងដែរ ។

ចំណែកសាស្រ្តាចារ្យរងនៃសាកលវិទ្យាល័យ Keio លោក Isozaki Atsuhito អ្នកជំនាញកិច្ចការកូរ៉េខាងជើងបាននិយាយថា កូរ៉េខាងជើងមិនព្រមប្រកាន់ជំហរខ្លាំងក្លាក្នុងពេលពិភាក្សាជាមួយអតីតប្រធានាធិបតីអាមេរិក ដូណាល់ ត្រាំ នោះទេ ។

លោកបាននិយាយថា ក្រុងព្យុងយ៉ាងប្រហែលជាកំណត់ថ្ងៃរំឭកខួបនេះស្របតាមគោលនយោបាយគណបក្ស ។

លោក Isozaki បានបន្ថែមទៀតថា ប្រទេសកូរ៉េខាងជើងបានបញ្ជាក់សារជាថ្មីពីសារៈសំខាន់នៃថ្ងៃឈប់សម្រាកនេះនៅលើប្រតិទិនរបស់ខ្លួន ហើយថានេះអាចបង្ហាញពីឆន្ទៈរបស់ប្រទេសដើម្បីបង្កើនអំណាចយោធារបស់ខ្លួនបន្ថែមទៀត ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ស្ថានភាពអាមេរិក និងកូរ៉េខាងជើងនៅតែជាប់គាំង ខណៈលោក គីម បដិសេធការរំសាយអាវុធនុយក្លេអ៊ែរ

ចុចអាន ៖ គីម ជុងអ៊ុន៖ ទោះអ្នកណាកាន់អំណាចក៏ដោយ អាមេរិកនៅតែជា “សត្រូវធំបំផុត” របស់កូរ៉េខាងជើង