ឆ្នាំក្រោយ ថៃ បន្ថែមថ្ងៃឈប់សម្រាករឹតច្រើន ដើម្បីឲ្យទេសចរដើរលេង ជួយសេដ្ឋកិច្ច

ជាមួយគោលបំណងធំដើម្បីជំរុញទេសចរណ៍និងសេដ្ឋកិច្ច គណៈរដ្ឋមន្ត្រីថៃ បានអនុម័តបន្ថែមថ្ងៃឈប់សម្រាកសម្រាប់ឆ្នាំក្រោយ ធ្វើឲ្យឆ្នាំ២០២៥ ប្រទេសថៃ មានថ្ងៃឈប់សម្រាកជាសាធារណៈកើនដល់២១ថ្ងៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឧបនាយករដ្ឋមន្ត្រី Phumtham Wechayachai និយាយកាលពីថ្ងៃចន្ទទី១៨ខែវិច្ឆិកាថា ថ្ងៃឈប់សម្រាកបន្ថែមនៅឆ្នាំក្រោយ គឺបូកទាំងថ្ងៃចន្ទទី២ខែមិថុនាដើម្បីភ្ជាប់ជាមួយថ្ងៃទី៣ខែមិថុនាដែលជាពិធីបុណ្យចម្រើនព្រះជន្មព្រះមហាក្សត្រិយានី ហើយថៃនឹងឲ្យឈប់នៅថ្ងៃទី១១ខែសីហាទៀត ដើម្បីភ្ជាប់ជាមួយថ្ងៃទី១២ខែសីហាដែលជាទិវាមាតា ដើម្បីឲ្យចុងសប្តាហ៍មានរយៈពេលរហូតដល់ទៅ៤ថ្ងៃ ឬគេនិយមហៅថា Long Weekend ងាយស្រួលសម្រាប់អ្នកទេសចរណ៍ធ្វើដំណើរកម្សាន្ត ជាពិសេសអ្នកចង់ទៅលេងឆ្ងាយៗ។

ថ្ងៃឈប់សម្រាកបន្ថែមមួយទៀតគឺថ្ងៃសុក្រទី២ខែមករាឆ្នាំ២០២៦ ដូច្នេះគេអាចឈប់សម្រាកចូលឆ្នាំថ្មីឆ្នាំសកលបានដល់ទៅ៥ថ្ងៃ ពោលគឺចាប់ពីថ្ងៃទី៣១ខែធ្នូឆ្នាំ២០២៥ ដល់ថ្ងៃទី៤ខែមករាឆ្នាំ២០២៦។

ការ​ប្រកាស​ថ្ងៃ​ឈប់​សម្រាក​បន្ថែម​នេះ ​ក៏​ស្រប​នឹង​ចំណាត់​ការ​របស់​រដ្ឋបាល​របស់នាយក​រដ្ឋមន្ត្រី Paetongtarn Shinawatra ផងដែរដែលប្រកាសដាក់​ឆ្នាំ​ក្រោយ​ ឲ្យក្លាយជា​ឆ្នាំ​ទេសចរណ៍ និង​កីឡា​។

សូមបញ្ជាក់ថា គិតត្រឹមពេលនេះ ប្រទេសថៃ បានទទួលភ្ញៀវទេសចរប្រហែល៣០លាននាក់ហើយ ពោលគឺជិតសម្រេចបានគោលដៅពេញមួយឆ្នាំរបស់រដ្ឋាភិបាល ដែលកំណត់ទទួលទេសចរចំនួន៣៦.៧លាននាក់៕

អត្ថបទ៖ សុខ សុវណ្ណ

ចុចអាន៖ ឆ្នាំ២០២៤ មន្ត្រីរាជការ និយោជិត កម្មករ ឈប់សម្រាកលើសឆ្នាំមុន ១ថ្ងៃ