Hwa Sa រួចទោស​ចោទ​ប្រកាន់ ក្រោយបញ្ចេញសកម្មភាពអាសអាភាស​កំឡុង​ពេល​សម្តែង

Hwa Sa សមាជិកក្រុម MAMAMOO ដែលត្រូវបានចោទប្រកាន់ពីបទបង្កកាយវិការអាសអាភាសក្នុងអំឡុងពេលសម្តែង ត្រូវបានជម្រះពីការចោទប្រកាន់របស់នាងហើយនាពេលនេះ។

កាលពីថ្ងៃទី ៣១ ខែតុលា ការិយាល័យរដ្ឋអាជ្ញាក្រុងសេអ៊ូលភាគខាងកើត​ បានពិនិត្យលទ្ធផលស៊ើបអង្កេតដែលសន្និដ្ឋានថា ប៉ូលិសបានសម្រេចចិត្តមិនកាត់ទោស Hwa Sa ពីបទចោទប្រកាន់អាសអាភាស ក្នុងអំឡុងពេលសម្តែងឡើយ។

កាលពីខែឧសភា Hwa Sa បានសម្តែងបទចម្រៀងទោលរបស់នាងមានចំណងជើងថា “Don’t” នៅមហោស្រពរបស់ Sungkyunkwan University អំឡុងពេលថតរឿង “Dance Singer Travel Group” របស់ tvN ។ ក្នុងអំឡុងពេលនៃការសម្តែងនេះ សកម្មភាពរបស់នាងបានបង្កើតភាពចម្រូងចម្រាស ខណៈដែលនាងពាក់ព័ន្ធនឹងការលិតម្រាមដៃ និងយកអណ្តាតអូសចុះក្រោមកៀករាងកាយរបស់នាងយ៉ាងគឃ្លើន។

ក្រោយមក សមាគមសិទ្ធិមនុស្សរបស់មាតាបិតាសិស្សបានដាក់ពាក្យប្តឹង Hwa Sa ពីបទបង្កកាយវិការអាសអាភាសអំឡុងពេលសម្តែងរបស់នាង។

បន្ទាប់ពីមានពាក្យបណ្តឹង Hwa Sa ក្នុងតួនាទីជាជនជាប់ចោទ បានសហការជាមួយប៉ូលិសក្នុងការស៊ើបអង្កេត ដោយផ្តល់ព័ត៌មានអំពីចេតនា និងបរិបទនៃការអនុវត្តរបស់នាង។ នៅថ្ងៃទី ២៦ ខែមុនប៉ូលិសបានកំណត់ថាវាពិបាកក្នុងការទទួលស្គាល់ចេតនាឧក្រិដ្ឋកម្មណាមួយហើយសម្រេចចិត្តមិនកាត់ទោស Hwa Sa ដោយជម្រះការចោទប្រកាន់របស់នាងតែម្ដង៕

ប្រែសម្រួល៖ សាង ស្រីល័ក្ខ

ចុចអាន៖YG បញ្ចាក់សារថ្មីថា គ្រោង​បន្ត​កុងត្រា​ជាមួយ​ក្រុម​ Blackpink