សៀមរាប ជាទីសោយសុខនៃទេសចរ ព្រោះមិនត្រឹមជាតំបន់ប្រវត្តិសាស្ត្រ តែក៏ជាកន្លែងដើរលេងដ៏សម្បូរបែប

បើនិយាយពីខេត្តសៀមរាប យើងមិនអាចពិពណ៌នាគ្រប់ជ្រុងជ្រោយ ពីសក្តានុពលនៃខេត្តទេសចរណ៍មួយនេះបានទេ ក៏ព្រោះតែទឹកដីនៃខេត្តមួយនេះ មិនត្រឹមតែជាកន្លែងប្រមូលផ្តុំដោយតឹកតាងប្រវត្តិសាស្ត្រ សម្បត្តិវប្បធម៌ អរិយធម៌ និងកេរតំណែលរាប់មិនអស់ប៉ុណ្ណោះទេ នៅមានធនធានធម្មជាតិដ៏មានតម្លៃ និងការកម្សាន្តសម្បូរបែបផ្សេងទៀត។

សម្រាប់ដំណើរកម្សាន្តទៅខេត្តទេសចរណ៍មួយនេះ យើងអាចជ្រើសរើសការសម្រាកលំហែដ៏សម្បូរបែប អាចទស្សនាប្រាសាទបុរាណផង អាចលំហែកាយនៅរមណីយដ្ឋានធម្មជាតិ/កែច្នៃផង ហើយថែមទាំងអាចជ្រើសកម្សាន្តសកម្មភាពផ្សេងទៀត តាំងពីព្រឹកដល់យប់ជាមួយនឹងតំបន់យុវវ័យដ៏ពេញនិយម ក្នុងក្រុងសៀមរាប។

ដំណើរកម្សាន្តបែបស្វែងយល់ពីប្រវត្តិសាស្ត្រ
១. ប្រាសាទបុរាណ
ដោយសារតែសៀមរាប ជាអតីតររាជធានីដ៏រុងរឿងរបស់ខ្មែរ ឆ្លងកាត់ច្រើនសម័យកាលមកហើយ ទើបយើងឃើញមាន សំណង់ប្រាសាទរាប់រយ នៅលើទឹកដីចំណាស់មួយនេះ ដោយរាប់ចាប់ពីសំណង់ប្រាសាទល្បីៗ រហូតដល់ប្រាសាទតូចៗ ផ្សេងទៀត។ ជាទូទៅ គោលដៅទី១របស់ទេសចរជាតិ និងអន្តរជាតិ គឺប្រាសាទអង្គរវត្ត និងទស្សនាប្រាសាទនានា តាមបណ្តោយផ្លូវវង់តូច ក៏ដូចជាផ្លូវវង់ធំបរិវេណតំបន់ប្រាសាទអង្គរធំ។

២. សារមន្ទីរ
ក្រៅពីសំណង់ប្រាសាទ ទឹកដីនៃអរិយធម៌នេះ ក៏មានរក្សាទុកនូវបុរាណវត្ថុដ៏មានតម្លៃជាច្រើន នៅតា​មសារមន្ទីរជាតិអង្គរ។ លើសពីនេះ ទេសចរក៏អាចទៅទស្សនាវត្ថុចាស់ៗ នៅសារមន្ទីរ​វិមានសុខា ដែលជាកន្លែងឯកជន របស់បុរសម្នាក់ដែលជាអ្នកចូលចិត្តប្រមូលទុករបស់ចាស់ៗ តាំងពីមុនសម័យឆ្នាំ១៩៧០។​

ដំណើរកម្សាន្តបែបធម្មជាតិ
១. ឧទ្យានជាតិភ្នំគូលែន
ឧទ្យានជាតិភ្នំគូលែន ត្រូវបានគេស្គាល់ថាជាតំបន់ធម្មជាតិដ៏ធំ និងជាទីតាំងប្រវត្តិសាស្រ្តដ៏សំខាន់មួយ ដែលមានសំណង់ ប្រាសាទបុរាណរាប់សិបប្រាសាទ និងស្ថានីយបុរាណជាច្រើនកន្លែង នៅលើខ្នងភ្នំគូលែន។ ជាទូទៅ ទេសចរដែលមក កម្សាន្តនៅទីនេះ ក្រៅពីមកទស្សនាសំណង់ប្រាសាទបុរាណ គឺច្រើនតែចូលទៅសម្រាកទទួលទានអាហារ និងកម្សាន្តទឹក ជ្រោះ ក្នុងតំបន់ភ្នំដ៏ធំនេះ។

២. កំពង់ភ្លុក
ឃុំ​កំពង់​ភ្លុក គឺជា​ឃុំ​មួយ​នៅ​ជាប់​នឹង​មាត់បឹង​ទន្លេសាប​ ដែលមាន​ព្រៃ​លិច​ទឹក​រាប់រយ​ហិក​តា លាត​សន្ធឹង​ពណ៌ ​ខៀវស្រងាត់ គួរ​ជាទី​គយគន់​ ពិសេសអំឡុងរដូវវស្សា។ អ្នករស់នៅឃុំនេះ ច្រើនជាអ្នកប្រក​បរបរ​នេសាទ​ និងដឹក​​ទេសចរ​​ កម្សាន្ត​នៅ​តំបន់​ព្រៃ​លិច​ទឹក​ ដែលជា​តំបន់​អេកូ​ទេសចរណ៍ធម្មជាតិ​។ ទេសចរដែលមកកាន់ទីនេះ តែងកម្សាន្តដោយការ ជិះទូកកាត់តំបន់ព្រៃលិចទឹកដ៏ធំ នៃសហគមន៍នេះ គយគន់ទេសភាព និងជីវចម្រុះ។​

៣. បារាយណ៍ទឹកថ្លា ឫបារាយខាងលិច​
បារាយណ៍ទឹកថ្លា កសាងឡើងនៅសតវត្សទី១១ (ពីឆ្នាំ១០០២​ដល់ឆ្នាំ ១០៦៦) ក្នុងរាជកាលព្រះបាទសូរ្យវរ្ម័នទី១ ​​(ពីឆ្នាំ១០០២ដល់ឆ្នាំ១០៥០) ហើយ​បានបញ្ចប់ជាស្ថាពរ នៅក្នុងរជ្ជកាល​បន្ទាប់គឺរជ្ជកាលព្រះបាទឧទ័យា​ទិត្យវរ័្មនទី២ ដែលត្រូវជាព្រះរាជបុត្រ​ព្រះអង្គ (ពីឆ្នាំ ១០៥០ ដល់ឆ្នាំ ១០៦៦)។ បារាយណ៍នេះមានបណ្តោយប្រហែល ៨គីឡូម៉ែត្រ និងទទឹង ២គីឡូម៉ែត្រ ហើយបច្ចុប្បន្នបានក្លាយជាតំបន់ទេសចរណ៍ទាក់ទាញមួយរបស់ខេត្តសៀមរាប។

ដំណើរកម្សាន្តបែបពិចនិកកន្លែងកែច្នៃ
បើសិនជាចង់កម្សាន្តបែបសម្រាកលំហែកាយ ជួបជុំមិត្តភក្តិ និងក្រុមគ្រួសារ មានការទទួលទាន និងអាចធ្វើសកម្មភាព ជាច្រើនផ្សេងទៀត គឺអាចជ្រើសរើសរមណីយដ្ឋានកែច្នៃ ដូចជានៅរមណីយដ្ឋានត្រាវកុដ ឬនៅរមណីយដ្ឋានភ្នំក្រោម។

ខេត្តសៀមរាប នៅមានសកម្មភាពកម្សាន្តជាច្រើនផ្សេងទៀត ដូចជាការជិះបាឡុងហោះ នៅក្រុងអង្គរ ចូលរួមនឹងការកម្សាន្តប្លែកៗតាមកន្លែងឯកជន​ រីស៊ត និងកាន់តែពិសេស សម្រាប់ការកម្សាន្តតំបន់យុវវ័យនាពេលរាត្រី។​
ដូច្នេះ​សម្រាប់ដំណើរកម្សាន្តទៅខេត្តសៀមរាប យើងអាចចំណាយពេលរីករាយ តាំងពីព្រឹកដល់យប់ និងសម្បូរបែបទៀតផង៕

អត្ថបទ៖ សុធាវី