នាយកដ្ឋាននីតិកម្ម ពង្រឹងការកសាងលិខិតបទដ្ឋានគតិយុត្តគាំទ្រការងារនីតិកម្ម

នាយកដ្ឋាននីតិកម្ម នៃក្រសួងអប់រំ យុវជន និងកីឡា បានរៀបចំសិក្ខាសាលា ស្តីពី “ការកសាងលិខិតបទដ្ឋានគតិយុត្តគាំទ្រការងារនីតិកម្ម និងអភិវឌ្ឍសមត្ថភាពលើការងារកំណែទម្រង់វិមជ្ឈការ និងវិសហមជ្ឈការវិស័យអប់រំ” រយៈពេល ២ថ្ងៃ នៅសាលាគរុកោសល្យ និងវិក្រឹតការខេត្តកំពត។

ពិធីបិទសិក្ខាសាលា បានប្រព្រឹត្តទៅនារសៀលថ្ងៃទី៨ ខែធ្នូ ឆ្នាំ២០២៣ ស្ថិតក្រោមអធិបតី លោក សេរី ជំនះ រដ្ឋលេខាធិការក្រសួងអប់រំ យុវជន និងកីឡា។

សិក្ខាសាលានេះ រៀបចំឡើងក្នុងគោលបំណងពង្រឹង និងលើកកម្ពស់ការយល់ដឹងរបស់បុគ្គលិកអប់រំ សំដៅបំពេញការងារឱ្យបានកាន់តែល្អប្រសើរ ព្រមទាំងឆ្លើយតបទៅនឹងកំណែទម្រង់វិស័យអប់រំ និងដើម្បីកសាងផែនការសម្រាប់នាយកដ្ឋាននីតិកម្មអនុវត្តនៅ ឆ្នាំ២០២៤ ខាងមុខ។

អង្គសិក្ខាសាលាបានសម្រេចនូវលទ្ធផលមានជាអាទិ៍៖

– សេចក្តីព្រាងសៀវភៅណែនាំបច្ចេកទេស ស្តីពីគោលការណ៍ បែបបទ និងនីតិវិធីនៃការអនុវត្តមុខងារវិស័យអប់រំ

– សេចក្តីព្រាងផែនការកសាងលិខិតបទដ្ឋានគតិយុត្តរបស់ក្រសួងអប់រំ យុវជន និងកីឡា ឆ្នាំ២០២៤-២០២៨

– ការរៀបចំរបាយការណ៍បឋមលើផលប៉ះពាល់នៃសេចក្តីព្រាងច្បាប់ ស្តីពីការអប់រំកាយ និងកីឡា

– សេចក្តីព្រាងសេចក្តីណែនាំ ស្តីពីចំណាត់ការបុគ្គលិកដែលជាប់ពាក់ព័ន្ធបណ្តឹងនៅតុលាការ។