ក្រុមហ៊ុនប្រទេសលោកខាងលិចខាតបង់ប្រាក់ជាង ១០៣ ពាន់លានដុល្លារ ក្រោយដកការវិនិយោគចេញពី រុស្ស៊ី

កាសែត The New York Times បានរាយការណ៍កាលពីថ្ងៃអាទិត្យថា ក្រុមហ៊ុនលោកខាងលិចដែលបានប្រកាសដកខ្លួនចេញពីប្រទេសរុស្ស៊ី បន្ទាប់ពីផ្ទុះប្រតិបត្តិការសឹករបស់លោកប្រធានាធិបតី វ្ល៉ាឌីមៀរ ពូទីន ក្នុងឆ្នាំ ២០២២ បានទទួលរងការខាតបង់ទឹកប្រាក់ជាង ១០៣ ពាន់លានដុល្លារ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុនលោកខាងលិចជាច្រើនបានចាប់ផ្តើមដកការវិនិយោគរបស់ពួកគេ ក៏ដូចជាបិទហាង និងផ្អាកការលក់ដូរនៅក្នុងប្រទេសរុស្ស៊ី ក្រោមសម្ពាធពីអ្នកវិនិយោគ និងអ្នកប្រើប្រាស់ដែលមិនពេញចិត្តចំពោះរុស្ស៊ីដែលបើកការវាយលុកលើអ៊ុយក្រែន ។

តាមរយៈរបាយការណ៍នេះបានកត់សម្គាល់ថា រុស្ស៊ីក៏ទទួលបានអត្ថប្រយោជន៍ជាច្រើនផងដែរ បន្ទាប់ពីការចាកចេញរបស់ក្រុមហ៊ុនលោកខាងលិចទាំងនោះ ជាពិសេសចំណូលពីការកំណត់លក្ខខណ្ឌសម្រាប់ក្រុមហ៊ុនអាជីវកម្មដែលដកខ្លួនចេញពីរុស្ស៊ី ។

គួរឲ្យដឹងថា បន្ទាប់ពីផ្ទុះប្រតិបត្តិការសឹករបស់រុស្ស៊ីទៅលើអ៊ុយក្រែននៅថ្ងៃទី២៤ ខែកុម្ភៈ ឆ្នាំ ២០២២ មក ប្រទេសលោកខាងលិចបានពង្រីកបញ្ជីទណ្ឌកម្មយ៉ាងចាស់ដៃប្រឆាំងនឹងរដ្ឋាភិបាលទីក្រុងមូស្គូ ជាពិសេសសហភាពអឺរ៉ុប (EU) បានអនុម័តកញ្ចប់ទណ្ឌកម្មចំនួន ១១ លើករួចមកហើយ ៕​

ប្រែសម្រួល៖ នាង រតនៈ

ប្រភព៖ Sputnik