ជីវិតកម្សាន្ដ

ហ៊ិន ច័ន្ទនីរ័ត្ន បំពេញក្តីស្រមៃថ្ងៃរៀបមង្គលការស្លៀករ៉ូបកូនក្រមុំរចនាដោយស្នាដៃកូនខ្មែរ

បានផុស

២ years មុន

នៅ

ថ្ងៃអង្គារ ២៦ ធ្នូ ២០២៣

ដោយ

ដូចទស្សនិកជនដឹងហើយថា កាលពីថ្ងៃទី ២២ ខែធ្នូ ឆ្នាំ ២០២៣ កន្លងទៅ ជាថ្ងៃសិរីសួស្ដី នៃអាពាហ៍ពិពាហ៍របស់ពិធីការិនី ហ៊ិន ច័ន្ទនីរ័ត្ន និង ស្វាមីលោក ឌី ពេជ្រ ដែលបានរៀបចំឡើងយ៉ាងអធិកអធមស្ថិតនៅគេហដ្ឋានដ៏ធំស្កឹមស្កៃនារាជធានីភ្នំពេញ។

ចំពោះទិដ្ឋភាព នៃថ្ងៃអាពាហ៍ពិពាហ៍របស់អ្នកនាង ហ៊ិន ច័ន្ទនីរ័ត្ន និងស្វាមី គេសង្កេតឃើញមានការរៀបចំតែងលម្អរោងជ័យយ៉ាងស្រស់ស្អាត ប្រណិត និងសម្រិតសម្រាំងជាទីបំផុត។ ទន្ទឹមនោះដែរ អ្នកគាំទ្រ និងមហាជន ក៏ចាប់អារម្មណ៍យ៉ាងខ្លាំង បន្ទាប់ពីបានឃើញកូនក្រមុំ-កំលោះ ១ គូ នេះបង្ហាញខ្លួនក្នុងឈុតរៀបការ និងឈុតប្រពៃណីតាមទំនៀមទម្លាប់របស់ខ្មែរ។

អ្វីដែលកាន់តែពិសេសថែមទៀតមានការបង្ហើបពីមិត្តភ័ក្ដិស្និទ្ធស្នាលថា ថ្ងៃមង្គលការ ពិធីការិនីអ្នកនាង ហ៊ិន ច័ន្ទនីរ័ត្ន បានបំពេញតាមក្តីស្រមៃរបស់ខ្លួនដោយស្លៀករ៉ូបរចនាឡើងជាស្នាដៃកូនខ្មែរ។ បើតាមការបញ្ជាក់ពី កញ្ញា ណាក់ ស្រីណា ដែលបានចូលរួមធ្វើជាអ្នកកំដរ ហ៊ិន ច័ន្ទនីរ័ត្ន និយាយឲ្យដឹងថា «គាត់ (នីរ័ត្ន) ប្រាប់ខ្ញុំថា គាត់ចង់ស្លៀករ៉ូបដែលកាត់ដេរដោយស្នាដៃកូនខ្មែរ នៅថ្ងៃរៀបការរបស់គាត់ គាត់មិនចង់ទិញរ៉ូបដែលមានតម្លៃថ្លៃពីក្រៅប្រទេសឡើយ»។

គួររំលឹកថា នៅថ្ងៃរៀបអាពាហ៍ពិពាហ៍របស់ ហ៊ិន ច័ន្ទនីរ័ត្ន និង លោក ឌី ពេជ្រ កាលពីថ្មីៗនេះ មានការផ្តល់នូវកិត្តិយសអញ្ជើញចូលរួមដ៏ខ្ពង់ខ្ពស់ពីសំណាក់ សម្ដេចតេជោ ហ៊ុន សែន អតីត នាយករដ្ឋមន្ត្រី នៃកម្ពុជា និងមន្ត្រីថ្នាក់ដឹកនាំនៅតាមស្ថាប័នធំៗ មួយចំនួន ព្រមទាំងសមាជិកគ្រួសារ រួមនឹងភ្ញៀវកិត្តិយស ក៏ដូចជាមិត្តក្នុងរង្វង់សិល្បៈយ៉ាងច្រើនកុះករផងដែរ៕

អត្ថបទ ៖ ចាន់រ៉ា