សម្ដេច ហ៊ុន ម៉ាណែត នឹងទៅបំពេញទស្សនកិច្ចផ្លូវការនៅប្រទេសបារាំង ក្នុងបំណងពង្រឹងកិច្ចសហប្រតិការលើវិស័យសំខាន់ៗ

នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានផ្ញើសារលិខិតជូនលោក អេម៉ានុយអែល ម៉ាក្រុង​ ប្រធានាធិបតីបារាំង​ ដើម្បីឆ្លើយតបចំពោះការអញ្ជើញសម្ដេច ទៅបំពេញទស្សនកិច្ចផ្លូវការ នៅប្រទេសបារាំង ក្នុងពេលឆាប់ៗនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី ៣១ ខែធ្នូ ឆ្នាំ ២០២៣កន្លងទៅនេះ លោកប្រធានាធិបតីបារាំង ម៉ាក្រុង បានសរសេរលិខិតអញ្ជើញសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ទៅបំពេញទស្សនកិច្ចផ្លូវការ នៅប្រទេសបារាំង ចាប់ពីថ្ងៃទី ១៨ ដល់ថ្ងៃទី ១៩ ខែមករា ឆ្នាំ ២០២៤ខាងមុខ។  

ក្នុងលិខិតនោះ ប្រធានាធិបតីបារាំង បានលើកឡើងថា ដំណើរទស្សនកិច្ចលើកទីមួយរបស់សម្ដេចធិបតី ហ៊ុន ម៉ាណែត ក្នុងនាមជានាយករដ្ឋមន្ត្រី ទៅប្រទេសបារាំងឆាប់ៗនេះ នឹងអនុញ្ញាតឲ្យជំរុញទៅមុខយ៉ាងជាក់ស្តែង នូវវិស័យសំខាន់ៗជាច្រើន ដែលជាគ្រឹះនៃទំនាក់ទំនងរវាងប្រទេសទាំងពីរ ជាអាទិ៍ វិស័យសេដ្ឋកិច្ច អភិវឌ្ឍន៍ យោធា បេតិកភណ្ឌ និងហ្រ្វង់កូហ្វូនី ជាដើម។

សារលិខិតរបស់សម្ដេចធិបតី ហ៊ុន ម៉ាណែត នៅថ្ងៃទី ៨ ខែមករា ឆ្នាំ ២០២៤នេះ បានសរសេរថា សម្ដេច ថ្លែងអំណរគុណប្រធានាធិបតីបារាំង ដែលបានអញ្ជើញសម្ដេចទៅបំពេញទស្សនកិច្ចផ្លូវការ នៅប្រទេសបារាំង ចាប់ពីថ្ងៃទី ១៨ ដល់ថ្ងៃទី ១៩ ខែមករា ឆ្នាំ ២០២៤ខាងមុខ។ នេះជាកិត្តិយសដ៏ធំធេង ហើយសម្ដេចទទួលយកឱកាសនេះ ជាមួយនឹងការប្តេជ្ញាចិត្តដ៏ខ្លាំងក្លា ដើម្បីពិភាក្សា និងពង្រឹងទំនាក់ទំនងទ្វេភាគី នៃប្រទេសទាំងពីរ កម្ពុជា-បារាំង។

សម្ដេចនាយករដ្ឋមន្ត្រី បានសរសេរថា ព្រះរាជទស្សនកិច្ចរបស់ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅទីក្រុងប៉ារីស កាលពីពេលថ្មីៗនេះ បានបង្ហាញពីការបោះជំហានដ៏សំខាន់មួយ ឆ្ពោះទៅរកការពង្រឹងភាពជាដៃគូរវាងប្រជាជាតិទាំងពីរ។

ក្នុងសារលិខិតដដែល សម្ដេចធិបតី ហ៊ុន ម៉ាណែត គូសបញ្ជាក់ថា «ក្នុងការបន្តនូវសន្ទុះនេះ ទស្សនកិច្ចរបស់ខ្ញុំ មានគោលបំណងពង្រឹងកិច្ចសហប្រតិបត្តិការ ឲ្យកាន់តែស៊ីជម្រៅបន្ថែមទៀត លើវិស័យសំខាន់ៗ ដោយផ្តោតជាពិសេសលើបញ្ហាការប្រឈមផ្នែកបរិស្ថាន នាពេលបច្ចុប្បន្ន ជាពិសេសបញ្ហាអន្តរកាលថាមពល និងការប្រែប្រួលអាកាសធាតុ ព្រមទាំងការលើកស្ទួយសន្តិភាព នៅលើពិភពលោក»។

ម៉្យាងទៀត ការពង្រឹងទំនាក់ទំនងសេដ្ឋកិច្ច ការចែករំលែកយុទ្ធសាស្ត្រអភិវឌ្ឍន៍ប្រកបដោយចីរភាព កិច្ចសហប្រតិបត្តិការលើវិស័យការពារជាតិ ការលើកតម្កើងបេតិកភណ្ឌវប្បធម៌របស់ប្រទេសទាំងពីរ និងការលើកកម្ពស់ហ្វ្រង់កូហ្វូនី គឺជាសសរស្តម្ភ នៃទំនាក់ទំនងទ្វេភាគីរបស់កម្ពុជា-បារាំង។

សម្ដេចធិបតី ហ៊ុន ម៉ាណែត ជឿជាក់ថា ការពិភាក្សារវាងសម្ដេច និងលោក ម៉ាក្រុង នឹងរួមចំណែកឲ្យមានការយល់គ្នាកាន់តែស៊ីជម្រៅ និងនាំមកនូវគំនិតផ្តួចផ្តើមរួម ដែលនឹងផ្តល់អត្ថប្រយោជន៍ដល់ប្រទេសទាំងពីរ។

«កម្ពុជា ប្តេជ្ញាចិត្តនឹងបន្តចូលរួមក្នុងកិច្ចខិតខំប្រឹងប្រែងនេះ ដោយទទួលស្គាល់នូវសារៈសំខាន់ នៃភាពជាដៃគូរបស់យើង សម្រាប់ប្រជាជនរបស់យើង និងសម្រាប់សហគមន៍អន្តរជាតិ។ ខ្ញុំរង់ចាំជួប និងពិភាក្សាប្រកបដោយផ្លែផ្កាជាមួយឯកឧត្តម»។ នេះជាការគូសបញ្ជាក់បន្ថែម ក្នុងសារលិខិតរបស់សម្ដេចធិបតី ហ៊ុន ម៉ាណែត៕