កម្ពុជាមានឥស្សរ​ជន ៤រូប ដែលមានគោរមងារជា កិត្តិសង្គហបណ្ឌិត

«កិត្តិ​សង្គហ​បណ្ឌិត» ជាគោរមងារកិត្តយសដ៏ឧត្តុងឧត្តមនៃរាជបណ្ឌិត្យសភាកម្ពុជា។ គោរមងារ កិត្តិសង្គហបណ្ឌិត នេះ មានន័យថា បណ្ឌិត​ប្រកបដោយ​កិត្តិយស និង​មានចិត្ត​សប្បុរស​ក្នុងកា​រ​ជួយសង្គ្រោះ​អ្នកដទៃ។ បច្ចុប្បន្ន កម្ពុជាមានឥស្សរជនដែលមានគោរមងារជា កិត្តិសង្គហបណ្ឌិត ចំនួន ៤រូប។

១. សម្តេច ម៉ែន សំអន បានទទួលគោរមងារកិត្តិយសពីរាជបណ្ឌិត្យសភាកម្ពុជា ជា «កិត្តិសង្គហបណ្ឌិត» នៅថ្ងៃទី១២ ខែមេសា ឆ្នាំ២០១៨។ ដោយឡែក នៅថ្ងៃទី៨ ខែមេសា ឆ្នាំ២០២៣ ត្រូវបានព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ត្រាស់បង្គាប់ផ្តល់គោរមងារជា «សម្តេចកិត្តិសង្គហបណ្ឌិត»។ បច្ចុប្បន្ន សម្តេចកិត្តិសង្គហបណ្ឌិត ម៉ែន សំអន មានតួនាទីជា ឧត្តមប្រឹក្សាផ្ទាល់ព្រះមហាក្សត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

២. លោក ទេព ងន ដែលបានចូលបម្រើការងារក្នុងក្របខណ្ឌរដ្ឋ តាំងពីឆ្នាំ១៩៦៦ ត្រូវបានព្រះមហាក្សត្រ នៃព្រះរាជាណាចក្រកម្ពុជា ត្រាស់បង្គាប់ផ្ដល់គោរមងារកិត្តិយស នៃរាជបណ្ឌិត្យសភាកម្ពុជា ជា «កិត្តិសង្គហបណ្ឌិត» នៅថ្ងៃទី១៨ ខែកក្កដា ឆ្នាំ២០២០។ លោកកិត្តិសង្គហបណ្ឌិត ទេព ងន គឺជាអនុប្រធានទី២ នៃព្រឹទ្ធសភា។

៣.លោក គន់ គីម ដែលជាមន្ត្រីជាន់ខ្ពស់របស់រាជរដ្ឋាភិបាល មានឋានៈជាទេសរដ្ឋមន្ត្រីទទួលបន្ទុកបេសកកម្មពិសេស និងមានតួនាទីជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ ត្រូវបានព្រះមហាក្សត្រ ប្រោសព្រះរាជទានផ្តល់គោរមងារជា កិត្តិសង្គហបណ្ឌិត កាលពីថ្ងៃទី ២៩ ខែតុលា ឆ្នាំ២០២២។

៤.​នាយឧត្តសនីយ ហ៊ីង ប៊ុនហៀង អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការនៃបញ្ជាការដ្ឋានអង្គរក្ស ត្រូវបានព្រះមហាក្សត្រ ត្រាស់បង្គាប់ផ្តល់គោរមងារកិត្តិយសនៃរាជបណ្ឌិត្យសភាកម្ពុជាជា កិត្តិសង្គហបណ្ឌិត កាលពីពេលថ្មីៗនេះ។ នេះបើយោងតាមព្រះរាជក្រឹត្យលេខ នស/រកត/ ០២២៤/១៧៨ ចុះថ្ងៃទី១៣ ខែកុម្ភៈ ឆ្នាំ២០២៤។

គួរជម្រាបជូនថា បុគ្គលដែលអាចទទួលបានគោរមងារ កិត្តិសង្គហបណ្ឌិត គឺជាវរជនខ្មែរដែលបានធ្វើការបម្រើជាតិចាប់ពី ៣០ឆ្នាំឡើង ហើយមានគុណបំណាច់ និងស្នាដៃ ចំពោះប្រទេសជាតិលើវិស័យសង្គមកិច្ច វប្បធម៌ និងមនុស្សធម៌៕