លោក គុយ សុផល ត្រូវបានផ្ដល់ងារជា “សម្ដេច” និងតែងតាំងជាឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង

ឧកញ៉ា មហាមន្ត្រី គុយ សុផល ត្រូវបានព្រះមហាក្សត្រផ្ដល់គោរមងារជា “សម្តេចមហាមន្ត្រី គុយ សុផល” និងតែងតាំងមុខតំណែងជាឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង ជំនួសសម្ដេច គង់ សំអុល ដែលទទួលមរណភាព។ នេះបើព្រះរាជក្រឹត្យរបស់ព្រះមហាក្សត្រនៃកម្ពុជា ចំនួនពីរដាច់ដោយឡែកពីគ្នា។

ព្រះរាជក្រឹត្យទាំងពីរ ត្រូវបានធ្វើឡើង បន្ទាប់ពីមានសំណើក្រាបបង្គំទូលថ្វាយរបស់ សម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ។

គួរបញ្ជាក់ថា មុនការតែងតាំង សម្ដេចមហាមន្ត្រី គុយ សុផល មានតួនាទីជាទេសរដ្ឋមន្ត្រី ទទួលបន្ទុកកិច្ចការទូទៅអមក្រសួងព្រះបរមរាជវាំង។

នៅក្នុងព្រះរាជក្រឹត្យ បានឱ្យដឹងថា សម្ដេចមហាមន្ត្រី គុយ សុផល ជាថ្នាក់ដឹកនាំក្រសួងព្រះបរមរាជវាំង បានខិតខំប្រឹងប្រែងយ៉ាងសកម្ម និងលះបង់កម្លាំងកាយចិត្ត ទាំងថ្ងៃ ទាំងយប់ ក្នុងការបំពេញភារកិច្ចថ្វាយ ព្រះករុណាជាអម្ចាស់ជីវិតតម្កល់លើត្បូង ព្រះមហាក្សត្រនៃព្រះរាជាណាចក្រកម្ពុជា ថ្វាយសម្ដេចព្រះមហាក្សត្រី ព្រះវររាជមាតាជាតិ និងជូនក្រសួងព្រះបរមរាជវាំង នៅគ្រប់ពេលវេលា គ្រប់ទីកន្លែង យ៉ាងខ្ជាប់ខ្ជួនបានល្អប្រពៃ ប្រកបដោយមនសិការ និងការទទួលខុសត្រូវខ្ពស់ ទទួលបានលទ្ធផលគួរជាទីមោទនៈ និងជួយសម្របសម្រួលកិច្ចការជាមួយក្រសួងស្ថាប័នផ្សេងៗបានល្អប្រសើរ៕