ក្រសួងមហាផ្ទៃដាក់ចេញយុទ្ធសាស្ត្រថ្មីមួយសម្រាប់ការអនុវត្តការងាររបស់ក្រសួង ក្នុងអាណត្តិនេះ

ក្រសួងមហាផ្ទៃ បានដាក់ចេញនូវយុទ្ធសាស្រ្តថ្មីមួយ ដែលជាផែនទីសម្រាប់ការអនុវត្តតួនាទីភារកិច្ចរបស់ក្រសួងមហាផ្ទៃ ក្នុងអាណត្តិរាជរដ្ឋាភិបាល នីតិកាលទី៧នេះ ហើយយុទ្ធសាស្ត្រនេះ ជាផ្នែកមួយដ៏សំខាន់នៃការរួមចំណែកសម្រេចបានយុទ្ធសាស្រ្តបញ្ចកោណ របស់រាជរដ្ឋាភិបាល។

ថ្លែងក្នុងឱកាសបើកសន្និបាតត្រួតពិនិត្យលទ្ធផលការងារ ឆ្នាំ២០២៣ និងលើកទិសដៅការងារ ឆ្នាំ២០២៤ របស់ក្រសួងមហាផ្ទៃ នៅព្រឹកថ្ងៃទី២៨ ខែកុម្ភៈ ឆ្នាំ២០២៤ លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានលើកឡើងពីលទ្ធផលការងារសំខាន់ៗដែលក្រសួងសម្រេចបាន ទាំងនៅក្នុងកំឡុងចុងនីតិកាលទី៦ និងដើមនីតិកាលទី៧ នៃឆ្នាំ២០២៣ និងភាពចាំបាច់នៃការដាក់ចេញយុទ្ធសាស្ត្រពាក់ព័ន្ធសម្រាប់ជាផែនទីបង្ហាញផ្លូវច្បាស់លាស់ក្នុងការអនុវត្តការងារ ក្រោមដែនសមត្ថកិច្ចក្រសួងមហាផ្ទៃ។

លោកឧបនាយករដ្ឋមន្ត្រី ស សុខា បានថ្លែងថា រាជរដ្ឋាភិបាល នីតិកាលទី៧នេះ បានដាក់ចេញយុទ្ធសាស្ត្របញ្ចកោណ ដំណាក់កាលទី១ សម្រាប់កំណើន ការងារ សមធម៌ ប្រសិទ្ធភាព និងចីរភាព ដោយផ្តោតទៅលើវិស័យអាទិភាពចំនួន៥ គឺ មនុស្ស ផ្លូវ ទឹក ភ្លើង និងបច្ចេកវិទ្យា សំដៅកសាងមូលដ្ឋានគ្រឹះឆ្ពោះទៅសម្រេចបានចក្ខុវិស័យកម្ពុជា ឆ្នាំ២០៣០ ជាប្រទេសមានចំណូលមធ្យមកម្រិតខ្ពស់ និងឆ្នាំ២០៥០ ជាប្រទេសមានចំណូលខ្ពស់។

ឈរលើមូលដ្ឋាននេះ ក្រសួងមហាផ្ទៃ ក៏បានរៀបចំ និងដាក់ចេញផែនការយុទ្ធសាស្ត្រថ្មីមួយស្តីពីការលើកកម្ពស់ការគ្រប់គ្រងរដ្ឋបាលដែនដី សន្តិសុខជាតិ សណ្ដាប់ធ្នាប់សាធារណៈ និងសុវត្ថិភាពសង្គម សម្រាប់ធ្វើជាផែនទីបង្ហាញផ្លូវច្បាស់លាស់មួយសម្រាប់ការអនុវត្ត ពីឆ្នាំ២០២៤ ដល់ឆ្នាំ២០២៨ ដែលជាផ្នែកមួយដ៏សំខាន់នៃការរួមចំណែកឱ្យសម្រេចបាននូវយុទ្ធសាស្រ្តបញ្ចកោណ។ នេះជាការថ្លែងឱ្យដឹងដោយលោកឧបនាយករដ្ឋមន្ត្រី ស សុខា។

ដូច្នេះ តាមរយៈសន្និបាតត្រួតពិនិត្យលទ្ធផលការងារ ឆ្នាំ២០២៣ និងលើកទិសដៅការងារ ឆ្នាំ២០២៤ ពេលនេះ លោក ស សុខា ក្នុងនាមជារដ្ឋមន្ត្រីក្រសួងមហាផ្ទៃ បានជំរុញឱ្យអង្គសន្និបាតផ្ដោតការយកចិត្តទុកដាក់លើការពិនិត្យពិភាក្សាលើប្រធានបទសំខាន់ៗ ដើម្បីកំណត់វិធានការចាំបាច់សម្រាប់ដោះស្រាយបញ្ហាប្រឈមនានា ដែលបានជួបប្រទះកន្លងមក ព្រមទាំងពិនិត្យពិភាក្សាលើតម្រូវការចាំបាច់នានា ដែលធានាដល់ការអនុវត្តផែនការយុទ្ធសាស្ត្រស្តីពី ការលើកកម្ពស់ការគ្រប់គ្រងរដ្ឋបាលដែនដី សន្តិសុខជាតិ សណ្តាប់ធ្នាប់សាធារណៈ និងសុវត្ថិភាពសង្គមនេះ ឱ្យមានប្រសិទ្ធភាពខ្ពស់៕