ជីវិតកម្សាន្ដ

Taylor Swift និងមិត្តប្រុស កំពុងផ្អែមល្ហែមនៅសិង្ហបុរី ក្រោយប្រគំតន្រ្តីចប់សព្វគ្រប់

បានផុស

២ years មុន

នៅ

ថ្ងៃសុក្រ ១៥ មីនា ២០២៤

ដោយ

តារាចម្រៀងប៉ុប Taylor Swift និងមិត្តប្រុសជាកីឡាករបាល់អោប Travis Kelce បានទទួលទានអាហារពេលល្ងាចនៅភោជនីយដ្ឋានជប៉ុនដ៏ធំមួយក្នុងប្រទេសសិង្ហបុរី ខណៈនៅក្នុងទីក្រុងអ្នកទាំងពីរកំពុងមានដំណើរកម្សាន្តយ៉ាងស្បាយរីករាយ ក្រោយប្រគំតន្រ្តី Eras Tour បានចប់សព្វគ្រប់។

យោងតាមសារព័ត៌មាន The Straits Times បានឲ្យដឹងថា គូស្នេហ៍ទាំងពីរបានអង្គុយជាមួយក្រុមរបស់ពួកគេនៅតុមូលមួយនៅជ្រុងមួយនៃ Koma Singapore ដែលជាភោជនីយដ្ឋានជប៉ុនទំនើប នៅក្នុងរមណីយដ្ឋានរួមបញ្ចូលគ្នា Marina Bay Sands ។ សម្រាប់យប់ថ្ងៃទី ០៨ ខែមិនា Taylor Swift បានពាក់រ៉ូបពណ៌សដ៏មានមន្តស្នេហ៍ តុបតែងជាមួយនឹងលំនាំផ្កា ចំណែក Kelce ជ្រើសរើសអាវពណ៌ស និងខោពណ៌ប្រផេះ។ នេះជាការមកកាន់ភោជនីយដ្ឋានលើកទីពីររបស់ពួកគេ បន្ទាប់ពីនាងក៏ត្រូវបានគេប្រទះឃើញនៅទីនោះ កាលពីថ្ងៃទី ២៨ ខែកុម្ភៈ ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើសពីនេះទៀតដែរ អ្នកគាំទ្របានឃើញពេលវេលាដ៏ស្និទ្ធស្នាលរវាងគូស្នេហ៍មួយគូនេះ រួមទាំងការឱបក្រសោបនៅពេលពួកគេដើរចាប់ដៃគ្នានៅផ្សារទំនើបមួយកាលពីយប់ថ្ងៃទី ០៧ ខែមីនា។ Swift បានស្លៀករ៉ូបពណ៌ខ្មៅក្នុងឱកាសនោះ ហើយមិត្តប្រុស ស្លៀកអាវពណ៌ត្នោតខ្ចី និងខោពណ៌ខ្មៅ។

បន្ទាប់ពីការសម្តែងរបស់នាងនៅថ្ងៃទី ០៨ ខែមីនា Swift ត្រូវបានគេឃើញប្រញាប់ប្រញាល់ទៅជួប Kelce ខាងក្រោយឆាក ជាកន្លែងដែលអ្នកទាំងពីរបានឱបនិងថើបយ៉ាងស្មោះស្ម័គ្រ។ ក្នុងនោះដែរ គេក៏រលឹកនូវពេលវេលាដែល Kelce ធ្លាប់បានចូលរួមការប្រគំតន្ត្រីរបស់ Swift នៅទីក្រុងស៊ីដនី ជាកន្លែងដែលគាត់បានលើកទឹកចិត្តនាងពីតង់ VIP ។ អ្នកទាំងពីរត្រូវគេប្រទះឃើញថើបគ្នានៅក្រោយឆាកបន្ទាប់ពីការសម្ដែងចប់។

របាយការណ៍មួយទៀតក៏បង្ហាញបន្ថែមទៀតថា ដើម្បីឲ្យមិត្តប្រុសហ៊ឺហា Taylor Swift ចាយលុយសុទ្ធ ៥០ម៉ឺនដុល្លារ ច្នៃម៉ូដសំលៀកបំពាក់ឲ្យ Travis ថែមទៀតផង។ ក្នុងពេលដែល ការរៀបចំហិរញ្ញវត្ថុគឺជាផ្នែកមួយនៃច្បាប់ផ្សេងៗដែលគូស្នេហ៍បានបង្កើតសម្រាប់ភាពជាដៃគូរបស់ពួកគេ។

យ៉ាងណាមិញ ស្នេហារវាង Taylor Swift និង Travis Kelce បានរីកដុះដាលបន្ទាប់ពី Kelce ចាប់ភ្នែកលើនាងក្នុងអំឡុងពេលការប្រគំតន្ត្រី Eras Tour នៅ Kansas ក្នុងខែកក្កដា ឆ្នាំ២០២៣។ ការជ្រើសរើសឯកជនភាពពីដំបូង គូស្នេហ៍មួយគូនេះមិនបានបង្ហាញឡើយ ក្រោយមក ទើបចេញជាសាធារណៈជាមួយនឹងទំនាក់ទំនងរបស់ពួកគេនៅក្នុងខែកញ្ញាតែម្ដង ៕