ជនចំណាកស្រុកជាង ៥០០ នាក់ចូលចតនៅ អង់គ្លេស តាមទូកតូចៗ

យោងតាមការិយាល័យនាយករដ្ឋមន្ត្រីអង់គ្លេសបានឲ្យដឹងថា ជនចំណាកស្រុកជាង ៥០០ នាក់បានឆ្លងកាត់ដែនទឹកអង់គ្លេសតាមទូកតូចៗ ។ នេះបើយោងតាមការចេញផ្សាយរបស់សារពត៌មាន BBC​ នៅថ្ងៃទី​២២ ខែមីនា​នេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទូកចំនួន ១០ គ្រឿងត្រូវស្ទាក់ចាប់បាន ខណៈដែលឆ្លងពីប្រទេសបារាំងចូលដែនទឹកអង់គ្លេសដោយមានជនចំណាកស្រុកចំនួន ៥១៤ នាក់នៅលើទូកដែលជាចំនួនជនចំណាកស្រុកចូលមកអង់គ្លេសប្រចាំថ្ងៃច្រើនបំផុត ។ រហូតមកដល់ពេលនេះ មានជនចំណាកស្រុកចូលមកអង់គ្លេសចំនួន ៤,០៤៣ នាក់ហើយ ពោលខ្ពស់ជាងកាលពីឆ្នាំមុនទៅទៀត ដែលមានត្រឹមតែ ៣,៦៨៣ នាក់ប៉ុណ្ណោះ ។

ពាក់ព័ន្ធនឹងបញ្ហានេះដែរ លោកនាយករដ្ឋមន្ត្រី Rushi Sunak បានប្តេជ្ញាថានឹងបញ្ឈប់ទូកជនចំណាកស្រុកដែលជាការសន្យាដ៏សំខាន់មួយក្នុងចំណោមការសន្យាចំនួន ៥ កាលពីឆ្នាំមុន និងធ្វើការយ៉ាងជិតស្និទ្ធជាមួយប៉ូលិសបារាំងដើម្បីធ្វើឲ្យជនចំណាកស្រុកដែលឆ្លងដែនមានការថយចុះ រួមទាំងរឹតបន្តឹងច្បាប់ និងកិច្ចព្រមព្រៀងជាមួយដៃគូអន្តរជាតិ ដើម្បីជួយសង្គ្រោះជីវិតមនុស្ស និងបញ្ឈប់ទូកទាំងនោះពីការឆ្លងដែនដ៏គ្រោះថ្នាក់ ។

គួរបញ្ជាក់ថា ជនចំណាកស្រុកចំនួន ២៧៧ នាក់បានស្លាប់នៅលើផ្លូវសមុទ្រមេឌីទែរ៉ាណេក្នុងឆ្នាំនេះ ដោយមិនគិតពីការលិចកប៉ាល់ថ្មីៗបំផុតនេះនោះទេ ខណៈពេលដែលការមកដល់បានថយចុះ ៧០ ភាគរយធៀបនឹងឆ្នាំ ២០២៣ តែអត្រាមរណភាពមិនធ្លាក់ចុះនោះទេ ៕

អត្ថបទ ៖ ប៊ុន សុភាព