កីឡា

Ronaldo ជិតបំបែកកំណត់ត្រាថ្មីមួយនៅលីគ អារ៉ាប៊ីសាអ៊ូឌីត

បានផុស

១២ ខែ មុន

នៅ

ថ្ងៃព្រហស្បតិ៍ ៤ មេសា ២០២៤

ដោយ

តារាបាល់ទាត់ឆ្នើម Cristiano Ronaldo ធ្វើបានយ៉ាងល្អ ក្រោយស៊ុតបញ្ចូលទី៣គ្រាប់ និងបញ្ចូនបាល់ឲ្យមិត្តរួមក្រុមបាន២លើក ក្នុងជំនួបរវាងក្រុម Al-Nassr យកឈ្នះក្រុម Abha ៨-០ កាលពីយប់ថ្ងៃទី៣ ខែមេសា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ថិតក្នុងវ័យ៣៩ឆ្នាំ តារាជើងស៊ុត Cristiano Ronaldo កំពុងឆ្ពោះទៅកាន់ការបំបែកកំណត់ត្រាជាកីឡាករស៊ុតបញ្ចូលទីច្រើនជាងគេបំផុតក្នុង១រដូវកាលនៃលីគបាល់ទាត់កំពូលអារ៉ាប៊ីសាអ៊ូឌីត។ គិតចាប់តាំងពីឆ្នាំ១៩៧៦ ជាឆ្នាំដែលលីគបាល់ទាត់ប្រទេសអារ៉ាប៊ីសាអ៊ូឌីតត្រូវបានបង្កើតឡើងជាផ្លូវការ មានតែកីឡាករ Abderrazak Hamdallah ម្នាក់ប៉ុណ្ណោះអាចរកគ្រាប់បាល់ច្រើនជាងគេក្នុង១រដូវកាលគឺចំនួន៣៤គ្រាប់ក្នុងរដូវកាលឆ្នាំ២០១៩ ក្នុងនាមជាខ្សែប្រយុទ្ធរបស់ក្លិប Al-Nassr។

ខ្សែប្រយុទ្ធម៉ារ៉ុក វ័យ៣៣ Hamdallah ក៏ជាកីឡាករឆ្នើម១រូបនៅលីគអារ៉ាប៊ីសាអ៊ូឌីតផងដែរ ខណៈរូបគេធ្លាប់ឈ្នះស្បែកជើងមាស៣លើក បន្ទាប់ពីផ្លាស់មកលេងនៅទីនេះតាំងពីឆ្នាំ២០១៨ ហើយបច្ចុប្បន្នកំពុងលេងឲ្យក្លិប Al-Ittihad។

គិតត្រឹមសប្ដាហ៍ទី២៦ កីឡាករ Ronaldo រកគ្រាប់បាល់បាន២៩គ្រាប់ ហើយរូបគេត្រូវការតែ៦គ្រាប់ទៀតប៉ុណ្ណោះ ដើម្បីបំបែកកំណត់ត្រាជាអ្នកស៊ុតបញ្ចូលទីច្រើនបំផុតក្នុង១រដូវកាល។ ការប្រកួតរដូវកាលនេះ នៅសល់៨សប្ដាហ៍ទៀតទើបចប់ ដូច្នេះមានន័យថា រូបគេមានភាគរយខ្ពស់ក្នុងការប្រកួតកំណត់ត្រា។

ប្រសិនបើមិនមានបញ្ហារបួស កីឡាករ Cristiano Ronaldo អាចបំបែកកំណត់ត្រានេះបាន នោះរូបគេនឹងត្រូវបានចារជាប្រវត្តិសាស្រ្ដ ក្ន្នុងលីគអារ៉ាប៊ីសាអ៊ូឌីត ជាកីឡាកររកគ្រាប់បាល់បានច្រើនគេ ក្នុងរយៈ៤៨ឆ្នាំ។

មិនត្រឹមតែជាអ្នកស៊ុតបញ្ចូលទីច្រើនជាងគេក្នុងរដូវកាលនេះទេ កីឡាករ Ronaldo ក៏ជាកីឡាករបញ្ជួនបាល់ឲ្យមិត្តរួមក្រុមស៊ុតបញ្ចូលទីច្រើនជាងគេផងដែរគិតត្រឹមសប្ដាហ៍ទី២៤៕