សំបុត្រទស្សនាប្រកួតរវាង ម៉ិកស៊ិក និង ព័រទុយ​ហ្គាល់ ធ្លាក់ថ្លៃ ១០ ដង ក្រោយ Ronaldo អវត្តមាន

សំបុត្រទស្សនាការប្រកួតមិត្តភាពរវាងក្រុមជម្រើសជាតិ ម៉ិកស៊ិក​ ទល់នឹង ព័រទុយហ្គាល់ ត្រូវបានលក់បញ្ចុះតម្លៃរហូតដល់ទៅ ១០ ដង បើធៀបនឹងតម្លៃគ្រោងទុក បន្ទាប់ពីខ្សែប្រយុទ្ធ Cristiano Ronaldo អវត្តមាន។

យោងតាមសារព័ត៌មាន Sportskeeda បានឱ្យដឹង ថា ក្រុមជម្រើសជាតិ ម៉ិកស៊ិក នឹងប្រើប្រាស់កីឡដ្ឋាន Estadio Banorte ដែលផ្ទុកអ្នកទស្សនាបានជាង ៨ ម៉ឺននាក់ ដើម្បីទទួលក្រុមជម្រើសជាតិ ព័រទុយហ្គាល់ ក្នុងការប្រកួតមិត្តភាពនៅថ្ងៃទី ២៩ ខែ មីនា ឆ្នាំ ២០២៦។

យ៉ាងណាមិញ នាមុនក្រុមជម្រើសជាតិនីមួយៗ ប្រកាសបញ្ជីឈ្មោះ ខាងសហព័ន្ធបាល់ទាត់ ម៉ិកស៊ិក គ្រោងដាក់លក់សំបុត្រក្នុងតម្លៃថ្លៃបំផុតចំនួន ៥,៥០០ ដុល្លារអាមេរិក ប៉ុន្តែបន្ទាប់ពីអវត្តមានប្រធានក្រុមនៃក្រុមជម្រើសជាតិ ព័រទុយហ្គាល់ កីឡាករ Cristiano Ronaldo ពេលនេះសំបុត្របានបញ្ចុះមកត្រឹមតម្លៃ ៥០០ ដុល្លារអាមេរិកវិញ។

គួរបញ្ជាក់ ថា Ronaldo មិនមានឈ្មោះជាមួយក្រុមជម្រើសជាតិ ព័រទុយហ្គាល់ សម្រាប់ការប្រកួតមិត្តភាពទល់នឹងក្រុម ម៉ិកស៊ិក នៅថ្ងៃទី ២៩ ខែ មីនា និងក្រុម អាមេរិក នៅថ្ងៃទី ១ ខែ មេសា ខាងមុខនេះនោះទេ ដោយសារកីឡាករមានបញ្ហារបួសសាច់ដុំភ្លៅ។ បច្ចុប្បន្នខ្សែប្រយុទ្ធវ័យ ៤១ ឆ្នាំ កំពុងស្តារកាយសម្បទាររបស់ខ្លួន ដើម្បីឱ្យបានល្អប្រសើរមកវិញ មុនព្រឹត្តិការណ៍ World Cup 2026 មកដល់៕

ប្រែសម្រួល៖ សេម កុសល
ប្រភព៖ Sportskeeda