ឆ្លង ០៣ នាក់​ថែម​​​ទៀតព្រឹកនេះ អ្នក​ឆ្លងកូវិដ​បំប្លែង​ខ្លួន​ឡើង​ដល់​​ ០៦ នាក់

ភ្នំពេញ៖ ការ​រកឃើញ​ ៣ករណីថ្មីបន្ថែមនៅ​ថ្ងៃ​នេះ កម្ពុជា​មាន​អ្នក​ឆ្លង​កូវី​ដបំប្លែង​ខ្លួន​ឡើង​ដល់ ០៦ នាក់។

ថ្លែងនៅក្នុងសន្និសីទសារព័ត៍មាននៅព្រឹកថ្ងៃទី២៣កម្ភៈ លោកជំទាវ ឱ វណ្ណឌីន​បានមានប្រសាសន៍ថារហូតមកដល់ពេលនេះក្រសួងបានរកឃើញមេរោគបម្លែងខ្លួន ចំនួន៦ករណីក្នុង​ប្រទេស​កម្ពុជា។ ក្នុងនោះ៣ករណីបានព្យាបាលជាសះស្បើយចាក​ចេញពីមន្ទីរពេទ្យ និង៣ករណីថ្មីទៀតទើបរកឃើញនៅថ្ងៃទី២២កម្ភៈឆ្នាំ២០២១នៅក្នុងព្រឹត្តិការណ៍សហគមន៍២០កុម្ភៈ និង​កំពុងដាក់ព្យាបាលនៅមណ្ឌលសុខភាពចាក់អង្រែ។

លោកស្រី វេជ្ជបណ្ឌិត លី អាយលែន ប្រធានអង្គការសុខភាពពិភពលោកប្រចាំប្រទេសកម្ពុជាបានទទួលស្គាល់ថាជំងឺបម្លែងខ្លួននេះជាមេរោគដ៏កាចសាហាវ និងចម្លងឆាប់រហ័សជាងធម្មតា។ ប្រជាពលរដ្ឋត្រូវបង្កើនការប្រុងប្រយ័ត្នទ្វេរដងនិងខ្លាំងក្លាជាងមុនបន្ថែមទៀត ព្រោះមេរោគនេះកំពុងធ្វើចរាចរណ៍នៅគ្រប់ទីកន្លែងដែលអាចចម្លងទៅលើមនុស្សបានគ្រប់បេលវេលា។

លោកស្រី ឱ វណ្ណឌីន បាន​ក្រើន​រំលឹក​ដល់​ពលរដ្ឋ​កម្ពុជា សូមឲ្យប្រជាពលរដ្ឋកុំភ្លេចខ្លួន កុំមើលស្រាលនិងកុំសន្តិភាពនិយមជាមួយនឹងជំងឺកូវីដ១៩នោះទេត្រូវអនុវត្តនូវិធាបការ៣កុំនិង៣ការពារឲ្យបនាខ្ជាប់ខ្ជួនជាទីបំផុត»។

លោកស្រីថា៣ការពាររួមមាន ពាក់ម៉ាស លាងដៃជាមួយសាប៊ូ ជែលនិងទឹកអាកុលនិងរក្សាគម្លាតសុវត្តិភាពបុគ្គល១ម៉ែត្រកន្លះ។ ចំណែក៣កុំវិញកុំទៅកន្លែងដែលមានការបិទជិត កុំទៅកន្លែងដែលមានមនុស្សចូលរួមច្រើនកកកុញពេកនិងកុំធ្វើការចាប់ដៃគ្នឬអោបគ្នាជាដើម។

គួរបញ្ជាក់ថាគិតត្រឹមព្រឹកថ្ងៃទី២៣ ខែកុម្ភៈ ឆ្នាំ២០២១នេះ កម្ពុជារកឃើញអ្នកឆ្លងកូវីដ១៩ ថ្មីចំនួន៥៩៣នាក់ ក្នុងនោះអ្នកជាសះស្បើយចំនួន ៤៧៥នាក់ និងអ្នកជំងឺចំនួន ១១៦នាក់កំពុងសម្រាកនៅមន្ទីរពេទ្យ ក្នុងនោះឆ្លងក្នុងសហគមន៍២០កុម្ភៈ កើនឡើង៩៩ករណី៕

អត្ថបទ៖ សំអឿន