អាជ្ញាធរជាតិប្រយុទ្ធប្រឆាំងគ្រឿងញៀន សម្ពោធដាក់ឱ្យប្រើប្រាស់កម្មវិធីទូរសព្ទដៃ NoDrung

នៅព្រឹកថ្ងៃទី២៣ ខែមេសា ឆ្នាំ២០២៤នេះ អាជ្ញាធរជាតិប្រយុទ្ធប្រឆាំងគ្រឿងញៀន បានសម្ពោធដាក់ឱ្យប្រើប្រាស់កម្មវិធីទូរសព្ទដៃ NoDrung ក្រោមអធិបតីភាពរបស់លោក នេត្រ ភត្រា រដ្ឋមន្ត្រីក្រសួងព័ត៌មាន។

កម្មវិធីនេះ ក្នុងគោលបំណងលើកកម្ពស់ប្រសិទ្ធភាព និងវិសាលភាពនៃការផ្សព្វផ្សាយអប់រំពីផលប៉ះពាល់ និងគ្រោះថ្នាក់នៃគ្រឿងញៀន។ កម្មវិធីទូរសព្ទដៃ (APP) ដែលមានឈ្មោះ NODrugs មានមាតិកាធំៗចំនួន៤ រួមមាន ការមើលវីដេអូខ្លី ដែលមានលក្ខណៈកំសាន្ត និងអប់រំ។ មើលព័ត៌មានថ្មីៗ និងទាន់ហេតុការណ៍, សិក្សាអំពីផលប៉ះពាល់ពីការប្រើប្រាស់គ្រឿងញៀន និងស្វែងរកព័ត៌មានពាក់ព័ន្ធនឹងមជ្ឈមណ្ឌលព្យាបាល និងនីតិសម្បទាអ្នកញៀនគ្រឿងញៀន។

ទន្ទឹមនឹងនេះ NoDrugs អាចឱ្យប្រជាពលរដ្ឋគ្រប់រូប ធ្វើការរាយការណ៍នូវរាល់ករណីគ្រឿងញៀនទូទាំងប្រទេស ទៅកាន់អាជ្ញាធរជាសម្ងាត់ និងឆាប់រហ័ស។ ជាពិសេស រាយការណ៍បានទូទាំង២៥រាជធានី/ខេត្ត នៃប្រទេសកម្ពុជា និងសួរជាសំណួរផ្សេងៗដែលទាក់ទងនឹងបញ្ហាគ្រឿងញៀន។ ព្រមទាំងទទួលបានការឆ្លើយតប ឬកិច្ចអន្តរាគមន៍ពាក់ព័ន្ធនឹងករណីគ្រឿងញៀន។

កម្មវិធីទូរសព្ទដៃមួយនេះ (NoDrugs) អាចឱ្យលោកអ្នករាយការណ៍បានតាមរយៈសារជាអក្សរ សារជាសម្លេង សារជារូបភាព សារជាវីដេអូ និងទីតាំងនៅលើផែនទី Google Map៕