ព័ត៌មានអន្ដរជាតិ

អាមេរិក បញ្ចេញកញ្ចប់ជំនួយ១ពាន់លានដុល្លារថែមទៀតឲ្យទៅអ៊ីស្រាអែល

បានផុស

២ years មុន

នៅ

ថ្ងៃពុធ ១៥ ឧសភា ២០២៤

ដោយ

Chheang

រដ្ឋបាលលោក ចូ បៃឌិន កាលពីថ្ងៃទី១៤ ខែឧសភា បានជូនដំណឹងទៅកាន់សភាអាមេរិក អំពីកញ្ចប់ជំនួយសព្វាវុធថ្មីតម្លៃជាង១ពាន់លានដុល្លារ ដែលខ្លួនគ្រោងនឹងបញ្ជូនឲ្យទៅអ៊ីស្រាអែល។ នេះបើយោងតាមការចុះផ្សាយរបស់សារព័ត៌មាន The National នៅថ្ងៃទី១៥ ខែឧសភា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណាត់ការថ្មីរបស់អាមេរិក ធ្វើឡើងមិនបានប៉ុន្មានបន្ទាប់ពីការប្រកាសផ្អាកដឹកអាវុធទៅអ៊ីស្រាអែល កាលពីដើមខែឧសភា ដែលធ្វើឡើងដោយលោកប្រធានាធិបតី ចូ បៃឌិន ជុំវិញករណីបើកការវាយប្រហារទ្រង់ទ្រាយធំនៅក្នុងក្រុង Rafah នៃតំបន់កាហ្សា។ លោក ចូ បៃឌិន ធ្លាប់និយាយប្រាប់សារព័ត៌មាន CNN ថា អាមេរិកនឹងបន្តការផ្អាកដឹកអាវុធ ប្រសិនបើអ៊ីស្រាអែលនៅតែរឹងរូសប្រើប្រាស់អាវុធអាមេរិកខុសពីច្បាប់អន្តរជាតិ ដើម្បីវាយប្រហារក្នុងតំបន់ដែលមានជនស៊ីវិលរស់នៅ។

បើតាមប្រភពដែលបង្ហើបប្រាប់ The National បានឲ្យដឹងថា ជំនួយជាង១ពាន់លានដុល្លាររបស់អាមេរិក មានដូចជា គ្រាប់កាំភ្លើងរថក្រោះតម្លៃ៧០០លានដុល្លារ រថយន្តយោធាតម្លៃ៥០០លានដុល្លារ និងកាំភ្លើងធំតម្លៃ៦០លានដុល្លារ។ យ៉ាងណាមិញ គម្រោងនៃកញ្ចប់ជំនួយនេះ មិនទាន់ប្រកាសជាសាធារណៈដោយសេតវិមានអាមេរិកនោះឡើយ។ មួយវិញទៀត ក៏គ្មានការបង្ហាញថា កញ្ចប់ជំនួយជាង១ពាន់លានដុល្លារនេះ នឹងត្រូវដឹកទៅអ៊ីស្រាអែលនៅពេលណាដែរ។

លោក ចូ បៃឌិន ប្រធានាធិបតីអាមេរិក និងលោក Benjamin Netanyahu នាយករដ្ឋមន្ត្រីអ៊ីស្រាអែល (រូបភាព៖ GPO)

សូមបញ្ជាក់ថា កាលពីថ្ងៃទី១៣ ខែឧសភា លោក Jake Sullivan ទីប្រឹក្សាសន្តិសុខជាតិអាមេរិក បានអះអាងថា អាមេរិកនឹងនៅតែបន្តជំនួយយោធាក្នុងទំហំទឹកប្រាក់ ២៦ពាន់លានដុល្លារ ដែលត្រូវបានអនុម័តកាលពីខែមេសា សម្រាប់កងកម្លាំងអ៊ីស្រាអែលដដែល។ ប៉ុន្តែសេតវិមាន បានផ្អាកការដឹកបញ្ជូនគ្រាប់បែក ក៏ព្រោះតែអាមេរិកមិនចង់ឲ្យគ្រាប់បែកទាំងនោះទម្លាក់ចូលក្នុងតំបន់ប្រជុំជន ដែលពោរពេញទៅដោយជនស៊ីវិលនោះទេ៕

ដោយ៖ ឈាង

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា