ជីវិតកម្សាន្ដ

នៅចាំគាត់ទេ ! អតីតតារាកំប្លែងនាយ គ្រោង តើពេលនេះសុខទុក្ខយ៉ាងណាហើយ?

បានផុស

២ years មុន

នៅ

ថ្ងៃអង្គារ ២៨ ឧសភា ២០២៤

ដោយ

ទស្សនិកជនធ្លាប់ដឹងហើយថា លោក ឡាំ ប៊ុនសេន ហៅនាយ គ្រោង អតីតតារាកំប្លែងជើងចាស់អំឡុងទសវត្សរ៍ ៩០ កន្លងមកមានឈ្មោះបោះសំឡេងយ៉ាងខ្លាំងកាលដែលលោកនៅមានសមត្ថភាពកំប្លែង និងសម្តែងលើវិថីសិល្បៈ ប៉ុន្តែរយៈពេលជិត ២០ ឆ្នាំចុងក្រោយមក លោកតា គ្រោង ក៏បានបាត់មុខពីវិស័យសិល្បៈទាំងស្រុង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកតា គ្រោង ក៏ជាសិល្បករខ្មែរម្នាក់ ដែលបានធ្វើឲ្យប្រជាជនរាប់លាននាក់មានស្នាមញញឹមតាមរយៈទេពកោសល្យកំប្លុកកំប្លែងរបស់គាត់នាពេលកន្លងមកជាមួយនាយ កុយ ,នាយ ក្រឹម និងនាយ ចាប ចៀន ជាដើម។ ថ្វីត្បិតបច្ចុប្បន្នគាត់មានវ័យជរាបន្តិចមែន តែលោកតាហាក់នៅនឹករលឹកដល់អាជីពសិល្បៈ។

បន្ទាប់ពីបាត់វត្តមានកំប្លែងមួយសន្ទុះធំ ស្រាប់តែអតីតតារាកំប្លែងនាយ គ្រោង មុននេះ បានបង្ហាញវត្តមានដោយធ្វើដំណើរពីខេត្តកំពង់ស្ពឺមកដល់ភ្នំពេញ។ ជាក់ស្តែងបើតាមរយៈការបង្ហោះវីដេអូខ្លីមួយរបស់អ្នកនាង នៅ សូនីតា បានឲ្យដឹងថា តារាកំប្លែងនាយ គ្រោង ពេលនេះលោកមានវ័យចំណាស់ជាងមុនច្រើន ខណៈសុខភាពនាយ គ្រោង មានភាពរឹងមាំធម្មតា។

អតីតតារាកំប្លែងជើងចាស់ នាយ គ្រោង បានបញ្ជាក់ថា មកដល់ពេលនេះលោកមានវ័យ ៧២ ឆ្នាំហើយ ដោយបច្ចុប្បន្នលោករស់នៅឯស្រុកកំណើតខេត្តកំពង់ស្ពឺ។ ក្រោយឃើញបែបនេះ បានធ្វើឲ្យទស្សនិកជនមួយចំនួនបង្ហាញក្តីនឹករលឹក និងជូនពរឲ្យលោកតា គ្រោង មានសុខភាពល្អ និងរឹងមាំ ខណៈខ្លះទៀត ក៏ចង់ឃើញលោកវិលរកអាជីពសម្តែងវិញផងដែរ។

គួរបញ្ជាក់ថា អតីតតារាកំប្លែងជើងចាស់លោក ឡាំ ប៊ុនសេន ហៅនាយ គ្រោង កន្លងមកធ្លាប់បានប្រាប់លោកកើតជំងឺទឹកនោមផ្អែមយូរឆ្នាំហើយ ប៉ុន្តែលោកមិនបានប្រាប់ឲ្យមហាជនបានដឹងឡើយ។ គិតមកដល់ពេលនេះជិត ២០ ឆ្នាំហើយ ដែល នាយគ្រោង បានបាត់មុខពីសិល្បៈ ដែលដំបូងឡើយ នាយ គឺជាក្រុមកំប្លែងប្រចាំស្ថានីយទូរទស្សន៍ជាតិកម្ពុជាជាមួយនាយ ខ្ជិប នាយ តឹង នាយ ចាបចៀន តាមឿក យាយ ណាង យាយ អឿន ,តាវីតាមីនសេ ជាដើម៕

អត្ថបទ ៖ ចាន់រ៉ា