ក្រសួងសុខាភិបាល ពិភាក្សា លើបច្ចុប្បន្នភាពរបាយការណ៍វឌ្ឍនភាព សុខភាពសិក្សា ឆ្នាំ២០២៤

ដោយទទួលបានការអនុញ្ញាតពី សាស្ត្រាចារ្យ ឈាង រ៉ា រដ្ឋមន្ត្រី ក្រសួងសុខាភិបាល សាស្រ្តាចារ្យ យីត ស៊ុនណារ៉ា រដ្ឋលេខាធិការ ក្រសួងសុខាភិបាល និងជាប្រធានគណៈកម្មការសុខភាពសិក្សាប្រចាំ ក្រសួងសុខាភិបាល នាថ្ងៃទី ០៥ ខែមិថុនា ឆ្នាំ២០២៤ នេះ បានដឹកប្រជុំគណៈកម្មការសុខភាពសិក្សា លើកទី២ ដើម្បីពិភាក្សាទៅលើបច្ចុប្បន្នភាពរបាយការណ៍វឌ្ឍនភាព ស្តីពី សុខភាពសិក្សាប្រចាំឆ្នាំ២០២៤ នៅទីស្ដីការក្រសួងសុខាភិបាល។

កិច្ចប្រជុំលើកទី២នេះ បានបង្ហាញពីសមិទ្ធិផលទទួលបានពីរបាយការណ៍សុខភាពសិក្សាពីថ្នាក់រាជធានីខេត្ត និងលើកទិសដៅការងារបន្តស្របតាមផែនការជាតិសុខភាពសិក្សា ឆ្នាំ២០២១-២០៣០។

សាស្រ្តាចារ្យ បានណែនាំ និងផ្តល់អនុសាសន៍សម្រាប់ទិសដៅខាងមុខដូចជា៖

១. ពិនិត្យបន្ថែមលើសូចនាករសកម្មភាពក្នុងផែនការយុទ្ធសាស្រ្តជាតិសុខភាពសិក្សា និងពិនិត្យមើលសូចនាករដែលបានអនុវត្តហើយត្រូវបន្តបន្ថែមឱ្យកាន់តែប្រសើរ និងសូចនាករដែលត្រូវរៀបចំផែនការសម្រាប់អនុវត្តបន្ត

២. ផ្តល់ជូននូវទម្រង់របាយការណ៍ និងមធ្យោបាយក្នុងការរាយការណ៍វឌ្ឍនភាពសុខភាពសិក្សាពីគ្រប់អង្គភាព រាជធានី-ខេត្ត និង

៣. ការបែងចែកមុខងារសហការទៅឱ្យកម្មវិធីជាតិ និងនាយកដ្ឋានចំណុះដែលពាក់ព័ន្ធនូវភារកិច្ចទទួលខុសត្រូវដើម្បីឆ្លើយតបនឹងគោលដៅផែនការយុទ្ធសាស្រ្តជាតិសុខភាពសិក្សា ឆ្នាំ២០២១-២០៣០។

គួរបញ្ជាក់ថា កិច្ចប្រជុំនេះមានការចូលរួមពីសមាជិកគណៈកម្មការសុខភាពសិក្សាដែលមកពីអង្គភាពថ្នាក់កណ្តាលពាក់ព័ន្ធ នៃក្រសួងសុខាភិបាល ព្រមទាំង ប្រធានមន្ទីរសុខាភិបាលរាជធានីខេត្ត ក៏ដូចជាក្រុមការងារសុខភាពសិក្សា ២៥ រាជធានីខេត្ត បានចូលរួមតាមប្រព័ន្ធនិមិត្ត Zoom ដែលមានចំនួនសរុប ៧២ រូប៕