សន្តិសុខសង្គម

ជនដៃដល់ ឧកញ៉ា ស្រី ស៊ីណា និងបក្សពួកពីរនាក់ទៀត ត្រូវបានបញ្ជូនខ្លួនទៅកាន់អយ្យការអមសាលាដំបូងរាជធានីភ្នំពេញ

បានផុស

២ years មុន

នៅ

ថ្ងៃពុធ ១៩ មិថុនា ២០២៤

ដោយ

ភ្នំពេញ ៖ នគរបាលបានបញ្ជូនខ្លួនឧកញ៉ា ស្រី ស៊ីណា និងមនុស្សពីរនាក់ទៀត ដែលម្នាក់គឺជាអ្នកដឹកទៅធ្វើសកម្មភាពបាញ់ប្រហារ និងម្នាក់ទៀតជាអ្នកដឹកគេចខ្លួនក្រោយធ្វើសកម្មភាព ទៅកាន់អយ្យការអមសាលាដំបូងរាជធានីភ្នំពេញ ដើម្បីអនុវត្តតាមនីតិវិធីច្បាប់ នៅរសៀលថ្ងៃទី១៩ ខែមិថុនា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឆាយ ហុង ព្រះរាជអាជ្ញារង និងជាអ្នកនាំពាក្យនៃអយ្យការអមសាលាដំបូងរាជធានីភ្នំពេញបានឲ្យដឹងថា សំណុំរឿងទើបតែបញ្ជូនមកដល់ស្ថាប័នអយ្យការ។ នៅក្នុងដំណាក់កាលនគរបាលសំណុំរឿងបាច់ប្រហារនេះត្រូវបាននគរបាលធ្វើសេចក្ដីសន្និដ្ឋាន និងចោទប្រកាន់កសាងសំណុំរឿងករណីមនុស្សឃាតគិតទុកជាមុន។ ទោះជាយ៉ាងណានៅរសៀលថ្ងៃទី១៩ មិថុនានេះ តំណាងអយ្យការមិនទាន់ធ្វើការចោទប្រកាន់ជាផ្លូវការនៅឡើយទេ។

ឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញបានឲ្យដឹងថា ករណីឃាតកឈ្មោះ ស្រី ស៊ីណា សមត្ថកិច្ចបានរៀបចំសំណុំរឿង សាក្សី និងភស្តុតាងមួយចំនួន ដោយអនុវត្តនូវវិធានការជំនាញ និងវិធានការច្បាប់យ៉ាងតឹងរ៉ឹងបំផុតចំពោះករណីបាញ់ប្រហារនៅខណ្ឌច្បារអំពៅនេះ។

គួររំលឹកផងដែរ ករណីឃាតកម្មគិតទុកជាមុននេះបានកើតឡើងកាលពីរសៀលថ្ងៃទី១៧ ខែមិថុនា ឆ្នាំ២០២៤ នៅក្នុងបុរី ប៉េង ហួត បឹងស្នោ គម្រោងទី៧ ស្ថិតក្នុងសង្កាត់និរោធ ខណ្ឌច្បារអំពៅ ដែលបណ្តាលឲ្យមនុស្ស២នាក់បានស្លាប់ និងមានអ្នករងរបួសម្នាក់ ចំពោះខ្មាន់កាំភ្លើងជាឃាតកត្រូវបាននគរបាលចាប់ខ្លួនក្រោយប្រព្រឹត្តិបទល្មើស និងរត់គេចខ្លួនតាមរថយន្តដល់ស្រុកអង្គស្នួល ខេត្តកណ្តាល និងបានឃាត់ខ្លួនជនសង្ស័យមួយចំនួននៅក្នុងករណីនេះផងដែរ៕

ដោយ ៖ សុភា