ព្យុះកំណាច កម្ទេចផ្ទះជិត ១ ០០០ខ្នង នៅអាហ្រ្វិកខាងត្បូង

ផ្ទះជិត១ ០០០ខ្នងក្នុងទីក្រុង Cape Town នៃប្រទេសអាហ្វ្រិកខាងត្បូងត្រូវបានបំផ្លាញដោយខ្យល់បោកបក់ខ្លាំង បង្ខំឲ្យមនុស្សប្រហែល ៤ ០០០ នាក់ផ្លាស់ទីលំនៅ ខណៈទីក្រុងនេះប្រឈមនឹងអាកាសធាតុអាក្រក់ពេញមួយសប្ដាហ៍។ នេះបើយោងតាមការចេញផ្សាយរបស់ទីភ្នាក់ងារពត៌មាន AP នៅថ្ងៃអង្គារទី០៩ខែកក្កដាឆ្នាំ២០២៤​។

យោងតាមក្រសួងឧតុនិយមអាហ្រ្វិកខាងត្បូង, ទីក្រុង Cape Town និងតំបន់ជុំវិញ នឹងត្រូវរងការវាយប្រហារពីព្យុះកំណាចរហូតដល់ថ្ងៃសុក្រ ដោយនឹងមានភ្លៀងធ្លាក់ជញ្ជ្រំ ខ្យល់បក់ខ្លាំង ទឹកជំនន់ និងបំណាក់ដី។ អាជ្ញាធរទីក្រុងនេះក៏បានព្រមានអំពីរលកសមុទ្រខ្ពស់ៗ ហើយស្នើឲ្យប្រជាជនស្ថិតនៅឲ្យឆ្ងាយពីមាត់ឆ្នេរផងដែរ។

លើសពីនេះ មនុស្សរាប់ពាន់នាក់បានផ្លាស់ទីលំនៅនៅក្នុងទីប្រជុំជន Khayelitsha ជាយក្រុង Cape Town បន្ទាប់ពីខ្យល់បក់ខ្លាំងបានបំផ្លាញផ្ទះសម្បែង និងសំណង់នានា។ តំបន់ផ្សេងទៀតត្រូវបានជន់លិច និងមានការដាច់ចរន្តអគ្គិសនី ខណៈអង្គការផ្តល់ជំនួយក្នុងស្រុក Gift of the Givers បានផ្តល់អាហារ ១០ ០០០កញ្ចប់ និងភួយ ៣ ០០០ ដល់ជនភៀសខ្លួននៅ Khayelitsha ។

សូមបញ្ជាក់ថា ទីក្រុង Cape Town នៅចុងភាគនិរតីនៃទ្វីបអាហ្រ្វិក តែងតែរងការវាយប្រហារពីគ្រោះធម្មជាតិ ដែលរឹតតែបង្កើនផលលំបាកទៅដល់ប្រជាពលរដ្ឋក្រីក្រដែលតាំងទីលំនៅខុសច្បាប់នៅក្នុងទីក្រុងនេះ៕

អត្ថបទ៖ ប៊ុន សុភាព