កម្ពុជា ចិន រួមគ្នាលុបបំបាត់ភាពងងឹតដោយជំងឺភ្នែកឡើងបាយនៅខេត្តកំពង់ស្ពឺ

បន្ទាប់ពីទទួលបានជោគជ័យនៅខេត្តព្រៃវែង ក្រសួងសុខាភិបាលនៃព្រះរាជាណាចក្រកម្ពុជា និងមូលនិធិ GX របស់​ចិនបានចុះហត្ថលេខាលើអនុស្សរណៈនៃការយោគយល់គ្នាសម្រាប់គម្រោងលុបបំបាត់ភាពងងឹតដោយជំងឺភ្នែកឡើងបាយ
នៅខេត្តកំពង់ស្ពឺ ដែលគម្រោងនេះនឹងរួមចំណែកដ៏សំខាន់ក្នុងការលើកកម្ពស់ប្រព័ន្ធសេវាសុខាភិបាលឈានទៅសម្រេចគោលដៅលុបបំបាត់ភាពពិការភ្នែកដែលអាចបង្ការបាននាឆ្នាំ២០៣០ នៅកម្ពុជា ព្រមទាំងឈានទៅសម្រេចការគ្របដណ្តប់សុខភាពជាសកល ពោលគឺគ្មាននរណាម្នាក់ត្រូវបានទុកចោលដោយមិនបានទទួលសេវាថែទាំសុខភាព
នោះទេ។

កាលពីថ្ងៃទី២៩កក្កដា ឆ្នាំ២០២៤ ក្រសួងសុខាភិបាល និងមូលនិធិGX របស់សាធារណរដ្ឋប្រជាមានិតចិននៅថ្ងៃទី២៩ ខែកក្កដា ឆ្នាំ២០២៤នេះ បានប្រារព្វពិធីអបអរសាទរការបញ្ចប់គម្រោងលុបបំបាត់ភាពពិការភ្នែកដោយជំងឺភ្នែកឡើងបាយ នៅខេត្តព្រៃវែងដោយជោគជ័យ។ បន្ទាប់ពីការអនុវត្តគម្រោងអស់រយៈពេល១៨ខែប្រកបដោយលទ្ធផលគួរជាទីមោទនៈ។

គម្រោងនេះបានផ្តល់ការពិនិត្យព្យាបាល និងវះកាត់ជំងឺភ្នែកឡើងបាយដោយឥតគិតថ្លៃដល់ប្រជាជននៅខេត្តព្រៃវែង និងបណ្តាខេត្តជុំវិញ បានចំនួន ៣៨៩១ករណី និងពិនិត្យព្យាបាលបញ្ហាសុខភាពភ្នែកផ្សេងៗទៀត បានចំនួន ៥៣៦៧នាក់
ការចុះអនុស្សារណៈនេះបានធ្វើឡើងកាលពីរសៀលថ្ងៃទី២៩កក្កដានៅក្នុងជំនួបពិភាក្សាការងាររវាងលោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាលជាមួយលោក LEUNG Chun Ying ប្រធានមូលនិធិ GX និងជាអនុប្រធានគណៈកម្មាធិការជាតិនៃសន្និសីទប្រឹក្សានយោបាយប្រជាជនចិននៅទីស្តីការក្រសួង។

នាឱកាសនៃជំនួប លោករដ្ឋមន្ត្រីបានសម្ដែងនូវការអរគុណយ៉ាងជ្រាលជ្រៅចំពោះការចូលរួមចំណែករបស់មូលនិធិ
GX នៅក្នុងការគាំទ្រទៅដល់វិស័យសុខាភិបាលកម្ពុជា នាពេលកន្លងមកជាពិសេសការរួមចំណែករបស់មូលនិធិ នៅក្នុងការផ្តល់សេវាពិនិត្យ និងព្យាបាលជំងឺភ្នែកឡើងបាយ ជូនដល់ប្រជាពលរដ្ឋកម្ពុជាដែលរស់នៅតាមបណ្តាខេត្តគោលដៅមួយចំនួន។

ជាការឆ្លើយតប លោក ប្រធានមូលនិធិ GX បានសម្តែងនូវការអរគុណជូនចំពោះលោករដ្ឋមន្ត្រី ដែលបានអនុញ្ញាតឱ្យលោក និងសហការី ចូលជួបសម្តែងការគួរសម និងបានបញ្ជាក់ជំហរយ៉ាងមុតមាំរបស់មូលនិធិ ក្នុងការបន្តកិច្ចសហប្រតិបត្តិការ និងពង្រីកវិសាលភាពនៃកិច្ចសហប្រតិបត្តិការជាមួយក្រសួងសុខាភិបាល។

លោករដ្ឋមន្ត្រី បានថ្លែងអំណរគុណយ៉ាងជ្រាលជ្រៅដល់ប្រជាជន និងរដ្ឋាភិបាលសាធារណរដ្ឋប្រជាមានិតចិន ជាពិសេសមូលនិធិ GX ដែលបានចូលរួមចំណែកជាមួយនឹងកិច្ចខិតខំប្រឹងប្រែងរបស់ក្រសួងសុខាភិបាលសំដៅលើកកម្ពស់សុខុមាលភាព គុណភាពសេវាសុខាភិបាល និងការអភិវឌ្ឍធនធានមនុស្សសុខាភិបាលដើម្បីឈានទៅសម្រេចបាននូវការគ្របដណ្តប់សុខភាពជាសកលស្របតាមយុទ្ធសាស្រ្តបញ្ចកោណ នៃរាជរដ្ឋាភិបាលអាណត្តិទី៧នេះ៕

អត្ថបទ៖ សំអឿន