រុស្ស៊ីនិងលោកខាងលិច ដោះដូរអ្នកទោសគ្នា ក្នុងទ្រង់ទ្រាយធំបំផុត ចាប់តាំងពីសង្គ្រាមត្រជាក់​

ការដោះដូរអ្នកទោសទ្រង់ទ្រាយធំបំផុតរវាងរុស្ស៊ី និងប្រទេសលោកខាងលិច ចាប់តាំងពីសម័យសង្រ្គាមត្រជាក់មក បានធ្វើឡើងកាលពីថ្ងៃព្រហស្បតិ៍ទី១ខែសីហាឆ្នាំ២០២៤ នៅអាកាសយានដ្ឋានទីក្រុងអង់ការ៉ានៃប្រទេសតួកគី ដោយក្នុងនោះមានអ្នកទោសសរុប ២៤នាក់ ត្រូវបានដោះលែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីសេតវិមាន, អ្នកទោសលោកខាងលិចចំនួន១៦នាក់ ត្រូវបានដោះលែងហើយធ្វើដំណើរវិលត្រឡប់ទៅអឺរ៉ុបនិងសហរដ្ឋអាមេរិក ខណៈក្នុង​នោះបុគ្គលដែលគេចាប់អារម្មណ៍បំផុតគឺ​អ្នក​យក​ព័ត៌មាន Wall Street Journal ឈ្មោះ Evan Gershkovich និងអតីតទ័ពម៉ារីនអាមេរិក Paul Whelan រីឯអ្នកទោសរុស្ស៊ីចំនួន៨នាក់ ត្រូវបានដោះលែងពីពន្ធនាគារសហរដ្ឋអាមេរិក ន័រវែស អាល្លឺម៉ង់ ប៉ូឡូញនិងស្លូវេនី។

ការដោះដូរនេះកើតឡើង បន្ទាប់ពីមានលេចចេញនូវព័ត៌មានថា សកម្មជននិងអ្នកកាសែតប្រឆាំងដែលជាប់ពន្ធនាគារនៅក្នុងប្រទេសរុស្ស៊ី ត្រូវបានបញ្ជូនចេញពីពន្ធនាគារបច្ចុប្បន្ន ទៅកាន់ទីតាំងដែលគេមិនស្គាល់ ហើយត្បិតការផ្ទេរចេញពីពន្ធនាគារដោយសម្ងាត់បែបនេះ មិនមែនជារឿងថ្មីនៅក្នុងប្រទេសរុស្ស៊ីក៏ដោយ ប៉ុន្តែការបាត់ខ្លួនអ្នកទោសល្បីៗច្រើននាក់ គឺជារឿងដែលគេសង្ស័យខ្លាំង។

សូមបញ្ជាក់ថា ការដោះដូរអ្នកទោសល្បីឈ្មោះចុងក្រោយបង្អស់ គឺធ្វើឡើងនៅឯអាកាសយានដ្ឋាន អាបូ ដាប៊ី នៃប្រទេសអារ៉ាប់រួម ក្នុងខែធ្នូឆ្នាំ២០២២ ពេលតារាបាល់បោះអាមេរិក Brittney Griner ត្រូវបានដោះដូរជាមួយអ្នកលក់អាវុធរុស្ស៊ី Viktor Bout ដែលជាប់ឃុំក្នុងពន្ធនាគារអាមេរិកអស់រយៈពេល១២ឆ្នាំមកហើយ។

ចំណែកការដោះដូរអ្នកទោសទ្រង់ទ្រាយធំស្រដៀងនឹងពេលនេះមួយលើកទៀត គឺបានកើតឡើងនៅទីក្រុងវីយែននៃប្រទេសអូទ្រីសក្នុងឆ្នាំ២០១០ ពេលដែលចារកម្មរុស្ស៊ីចំនួន១០នាក់ ត្រូវបានដោះដូរជាមួយភ្នាក់ងារសម្ងាត់លោកខាងលិចចំនួន៤នាក់៕

អត្ថបទ៖ សុខ សុវណ្ណ

ចុចអាន៖ រុស្ស៊ី និងអ៊ុយក្រែន បញ្ចប់សកម្មភាព ដោះដូរអ្នកទោសរបស់ពួកគេ ទៅវិញទៅមក