បន្ទាប់ពីបំផ្លិចបំផ្លាញ​នៅដែនដី Puerto Rico ព្យុះ Ernesto បង្កើន​​ឥទ្ធិពល​​សំដៅ​ Bermuda

បន្ទាប់ពីបានធ្វើឱ្យមនុស្សរាប់សែននាក់នៅ​ដែន​ដី​​ Puerto Rico​​​ របស់​សហរដ្ឋ​អាមេរិកស្ថិតនៅ​តំបន់​ការីបប៊ីន (Caribbean) ប្រឈម​ការ​ខ្វះខាត​​ថាមពលនិងទឹកស្អាតប្រើប្រាស់ ខ្យល់ព្យុះ Ernesto បានវិវដ្តទៅជាព្យុះប្រភេទទី២កាលពីយប់ថ្ងៃព្រហស្បតិ៍ នឹង​មាន​ទិស​​ឆ្ពោះទៅ​ដែន​ដី ​Bermuda ស្ថិត​នៅ​សមុទ្រ​អាត្លង់ទិក​ខាងជើង​និង​ស្ថិតក្រោម​ការ​គ្រប់​គ្រង​​របស់​អង់គ្លេស​​​។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​APនៅថ្ងៃទី១៦ខែសីហានេះ។

ការ​ព្រមានពី​ខ្យល់ព្យុះ​ Ernesto បាន​ចូល​ជា​ធរមាន​សម្រាប់​ដែន​ដី Bermuda ដែលត្រូវ​បាន​គេ​រំពឹង​ថា​នឹង​បោក​បក់​មក​ជិតតំបន់ប្រជុំ​កោះនេះ​នៅ​ថ្ងៃ​សៅរ៍។ ព្យុះនេះមានចំងាយប្រហែល៦៦០គីឡូម៉ែត្រភាគនិរតីនៃទីក្រុង Bermuda កាលពីល្ងាចថ្ងៃព្រហស្បតិ៍ ដែលខ្យល់បក់អតិបរមាបានកើនឡើងដល់១៥៥ គីឡូម៉ែត្រក្នុងមួយម៉ោង ហើយព្យុះនេះកំពុងផ្លាស់ទីពី​ភាគខាងជើងទៅ​ភាគឦសានក្នុងល្បឿន២២គីឡូម៉ែត្រក្នុងមួយម៉ោង​លើផ្ទៃទឹក។

​ព្យុះ​​ Ernesto ត្រូវបានគេព្យាករណ៍ថា អាចឈានដល់ប្រភេទ៣នៅថ្ងៃសុក្រ ហើយបន្ទាប់មកចុះខ្សោយនៅពេលវាខិតជិតដល់ដែន​ដី ​Bermuda ដែលត្រូវបានព្យាករណ៍ថានឹងបង្ក​ឱ្យ​មាន​ភ្លៀងធ្លាក់ពី១៥ទៅ៣០សង់ទីម៉ែត្រ ជាមួយនឹងភ្លៀងរហូតដល់ ៣៨សង់ទីម៉ែត្រនៅក្នុងតំបន់ដាច់ស្រយាល។

កាលដែលព្យុះErnestoបានបក់កាត់ ដែន​ដី Puerto Rico កាលពីថ្ងៃព្រហស្បតិ៍ ប្រជាជនជាង២៩ម៉ឺន​នាក់ក្នុងចំណោមប្រជាជន ១,៤លាននាក់នៅតែមិនមានថាមពលប្រើប្រាស់ ខណៈមនុស្សរាប់រយពាន់នាក់ក៏គ្មានទឹកស្អាតប្រើប្រាស់ផងដែរ៕

អត្ថបទ៖ ប៊ុន សុភាព