មន្រ្តីជាន់ខ្ពស់ក្រសួងព័ត៌មាន ជំរុញឲ្យមានការបណ្តុះបណ្តាលជំនាញសរសេរព័ត៌មានសេដ្ឋកិច្ចបន្ថែមទៀត

រដ្ឋលេខាធិការក្រសួងព័ត៌មាន ទទួលបន្ទុកកិច្ចការសមាគមសារព័ត៌មាន លោក សុខ ចាន់ភក្តី បានស្នើឲ្យមានការបណ្តុះបណ្តាល ជំនាញសារព័ត៌មានបន្ថែមទៀត និងរកវិធីធ្វើយ៉ាងណាឲ្យមានការផ្សព្វផ្សាយព័ត៌មានសេដ្ឋកិច្ចឲ្យបានច្រើន ដោយ​កាត់បន្ថយព័ត៌មានអវិជ្ជមានក្នុងសង្គម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានមានប្រសាសន៍បែបនេះ ក្នុងពិធីបិទវគ្គបណ្តុះបណ្តាលជំនាញសរសេរព័ត៌មានសេដ្ឋកិច្ច ក្រោមការរៀបចំរបស់សមាគមសហគ្រិន សារព័ត៌មានសេដ្ឋកិច្ចកម្ពុជា (CEMEA) និងសមាគមសហព័ន្ធសេវាកម្មពន្ឋដាកម្ពុជា(CTAFA) កាលពីថ្ងៃទី ១៥ សីហាកន្លងមកនេះ។

លោក សុខ ចាន់ភក្តីបានគាំទ្រនូវអនុសាសន៍របស់លោក នេត្រ ភក្រ្តារដ្ឋមន្រ្តីក្រសួងព័ត៌មាន ដែលចង់ឲ្យមានការផ្ស​ព្វផ្សាយព័ត៌មានសេដ្ឋកិច្ចឲ្យបានច្រើន និងគាំទ្រដល់ចក្ខុវិស័យសមាគម CEMEA លើផែនការក្នុងការផ្សព្វផ្សាយព័ត៌មានសេដ្ឋកិច្ចជាតិឲ្យបានទូលំទូលាយ ដើម្បីកាត់បន្ថយព័ត៌មានអវិជ្ជមាន ដែលមិនផ្តល់គុណាធិបតេយ្យដល់សង្គម។
លោកបន្តថា “ការបណ្តុះបណ្តាលជំនាញសរសេរព័ត៌មានសេដ្ឋកិច្ចសំខាន់ណាស់ ព្រោះវាស្របតាមយុទ្ធសាស្រ្តបញ្ចកោណទាំង៥ដំណាក់កាល ដែលនិយាយផ្តោតលើសេដ្ឋកិច្ច”។

លោកបន្តថា “យុទ្ធសាស្រ្តបញ្ចកោណ ដែលមាន៥ដំណាក់កាល ជាយុទ្ធសាស្រ្តមួយ ក្នុងការត្រួសត្រាយផ្លូវនាំកម្ពុជាឆ្ពោះទៅឆ្នាំ២០៥០ខាងមុខ ក្នុងការប្រែក្លាយកម្ពុជា ជាប្រទេសអភិវឌ្ឍន៍នៅឆ្នាំ២០៥០”។

លោក យិន លាងគង់ ប្រធានសមាគមសហគ្រិនសារព័ត៌មានសេដ្ឋកិច្ចកម្ពុជា(CEMEA) បានមានសំណូមពរឲ្យអ្នកសារព័ត៌មាន ដែលចង់សរសេរព័ត៌មានផ្នែកសេដ្ឋកិច្ច សូមចាប់ផ្តើមពីឥលូវនេះ ព្រោះការសរសេរព័ត៌មានសេដ្ឋកិច្ច មិនចាំបាច់ដល់អ្នកអ្នកសារព័ត៌មាន រៀនចប់បរិញ្ញាបត្រ ឬបណ្ឌិតផ្នែកសេដ្ឋកិច្ចនោះទេ។

លោកបន្តថា “ចក្ខុវិស័យសមាគមចង់ឃើញការផ្សព្វផ្សាយព័ត៌មានសេដ្ឋកិច្ចបានទូលំទូលាយ និងផ្សព្វផ្សាយព័ត៌មានវិជ្ជមានដល់សង្គមឲ្យបានច្រើន ជាជាងផ្សព្វផ្សាយតែពីភាពអវិជ្ជមានក្នុងសង្គម”។

លោក យិន លាងគង់ បានបន្តថា ដោយសារមើលឃើញអ្នកជំនាញសរសេរព័ត៌មាន ផ្នែកសេដ្ឋកិច្ចមានចំនួនមានកម្រិត ទើបសមាគម ចង់បណ្តុះបណ្តាល អ្នកសារព័ត៌មានឲ្យមានជំនាញសរសេរព័ត៌មានផ្នែកសេដ្ឋកិច្ចឲ្យបានច្រើន”៕