គ្រោះរញ្ជួយដីកម្រិត៥,៣ រ៉ិចទ័រ វាយប្រហារប៉ាគីស្ថាននិងតំបន់កាស្មៀរឥណ្ឌា​

រញ្ជួយដីកម្រិត ៥,៣ រ៉ិចទ័របានអង្រួនផ្នែកខ្លះនៃប្រទេសប៉ាគីស្ថាន និងតំបន់ភ្នំហិម៉ាឡៃនៃតំបន់កាស្មៀរកាលពីព្រឹកថ្ងៃអង្គារ ដោយបានធ្វើឱ្យអ្នកស្រុកមានការភ័យស្លន់ស្លោ​ ខណៈមិន​ទាន់​មាន​របាយការណ៍​ភ្លាមៗ​អំពី​ការ​ខូច​ខាតនៅឡើយទេ។​ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី២១ខែសីហានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណុចកណ្តាលនៃការរញ្ជួយដីនេះ គឺនៅភាគនិរតីនៃតំបន់កាស្មៀរ ដែលជាតំបន់មានជនជាតិមូស្លីមដ៏ច្រើនលើសលប់ ពាក់កណ្ដាលរវាងប្រទេសឥណ្ឌា និងប៉ាគីស្ថាន ដែល​ប្រទេស​ទាំងពីរបានទាមទារកាន់កាប់វាទាំងស្រុង។

យោងតាមមជ្ឈមណ្ឌលជាតិតាមដានការរញ្ជួយដីនៅរដ្ឋធានីអ៊ីស្លាម៉ាបាដរបស់ប្រទេសប៉ាគីស្ថាន ជម្រៅនៃការរញ្ជួយនេះគឺ២០គីឡូម៉ែត្រ។ ការញ័របានជះឥទ្ធិពលនៅលើទូទាំងប្រទេសប៉ាគីស្ថាន រួមទាំងទីក្រុងអ៊ីស្លាម៉ាបាដ តំបន់មួយចំនួននៅភាគខាងកើតនៃខេត្ត Punjab រួមទាំងភាគពាយ័ព្យនៃខេត្ត Khyber Pakhtunkhwa ជាប់ព្រំដែនអាហ្វហ្គានីស្ថាន។ ទោះយ៉ាងណាព័ត៌មានលម្អិតអំពីការស្លាប់ រងរបួស និងការខូចខាតនៅក្នុងគ្រោះរញ្ជួយដីនេះមិនទាន់ត្រូវរាយការណ៍នៅឡើយនោះទេ។

គួរបញ្ជាក់ផងដែរថា កាលពីឆ្នាំ២០០៥ការរញ្ជួយដីកម្រិត ៧,៦ រ៉ិចទ័រក្នុងបានសម្លាប់មនុស្សរាប់ពាន់នាក់នៅប៉ាគីស្ថាន និងតំបន់កាស្មៀរ៕

អត្ថបទ៖ ប៊ុន សុភាព