រុស្ស៊ី អះអាង​ថា ខ្លួន​បាញ់​ស្ទាក់​​មីស៊ីល​អង់គ្លេស​២​គ្រាប់ និង​រ៉ុកកែត​អាមេរិក​៦​គ្រាប់

កង​កម្លាំង​ដែន​​​អាកាស​ក្រុង​មូស្គូ ស្ទាក់​ចាប់​បាន​មីស៊ីល​គ្រូសរបស់​អង់គ្លេស ចំនួន​២​គ្រាប់ និង​រ៉ុកកែត​អាមេរិក​ ៦​គ្រាប់ ដែល​បាញ់​ដោយ​​អ៊ុយក្រែន​ចូល​​ក្នុង​ទឹក​ដី​រុស្ស៊ី។ នេះ​បើ​យោង​​តាម​​របាយការណ៍​ក្រសួង​​ការពារ​ជាតិ​រុស្ស៊ី កាល​ពី​ថ្ងៃ​ទី​២១​ខែ​វិច្ឆិកា​ឆ្នាំ​២០២៤។

សេចក្ដី​ថ្លែងការណ៍​របស់​ក្រសួង​ការពារ​ជាតិ​រុស្ស៊ី បាន​រៀបរាប់​ថា៖ «ខែល​ការពារ​​​បាញ់​ទម្លាក់​​មីស៊ីល​គ្រូស Storm Shadow ចំនួន​២​គ្រាប់ ផលិត​ដោយ​ចក្រ​ភព​អង់គ្លេស, រ៉ុកកែត Himars ចំនួន​៦​គ្រាប់ ផលិត​ដោយ​សហរដ្ឋ​អាមេរិក និង​យាន​គ្មាន​មនុស្ស​បើក​ចំនួន ៦៧​គ្រឿង»។

រូបថតនៃកម្ទេចកម្ទីជាក់ស្តែងពីមីស៊ីល Storm Shadow ត្រូវបានបង្ហោះដោយអ្នកសរសេរប្លុកយោធាគាំទ្ររុស្ស៊ីនៅលើ​បណ្ដាញ​ទំនាក់ទំនង Telegram កាល​ពី​ថ្ងៃទី២០​ខែវិច្ឆិកា។

ការបង្ហោះនៅលើ Telegram បាន​បញ្ជាក់​ថា កម្ទេច​កម្ទី​ត្រូវបានរកឃើញនៅក្នុងភូមិ Marino ក្នុងតំបន់ Kursk នៃប្រទេសរុស្ស៊ី។ យ៉ាង​ណា ក្រសួងការពារជាតិរុស្ស៊ី មិនបាន​ប្រាប់​កាលពីថ្ងៃទី​២១​ខែវិច្ឆិកា​ថា គ្រាប់មីស៊ីលត្រូវបានបាញ់ទម្លាក់​​​នៅ​ឯណា​នោះទេ។

សូម​បញ្ជាក់​ថា មីស៊ីល Storm Shadow ផលិតដោយក្រុមហ៊ុនប្រព័ន្ធមីស៊ីលអឺរ៉ុប MBDA ដែល​បង្កើត​ឡើង​រួម​គ្នា​ដោយ​​បារាំង អង់គ្លេស និងអ៊ីតាលី។

យោងតាម ​​MBDA មីស៊ីល Storm Shadow ឬ​ហៅ​ថា SCALP មាន​ទម្ងន់ ១,៣​តោន អាច​បាញ់​​រយៈចម្ងាយឆ្ងាយ​លើស​ពី​ ២៥០​គីឡូម៉ែត្រ ហើយ​​មាន​តម្លៃ​​ប្រមាណ ១​លាន​ដុល្លារ​ក្នុង​១​គ្រាប់។ Storm Shadow ធ្លាប់​​ត្រូវបានប្រើប្រាស់នៅក្នុង​តំបន់​ឈូងសមុទ្រ​ពែក្ស ​អ៊ីរ៉ាក់ និងលីប៊ី។

បន្ទាប់​ពី​ការ​​បាញ់​​​​មីស៊ីល​លោក​ខាង​លិច​​​របស់​អ៊ុយក្រែន រុស្ស៊ី​​​​បាន​ធ្វើ​ការ​ឆ្លើយ​តប​ដោយ​ការ​​បាញ់​មីស៊ីល​​ Oreshnik ល្បឿន​លឿន​ជាង​សំឡេង​១០​ដង។ លោក វ្ល៉ាឌីមៀរ ពូទីន មេដឹក​នាំ​រុស្ស៊ី បាន​អះអាងថា ការវាយប្រហារនេះ គឺដើម្បីឆ្លើយតបទៅអ៊ុយក្រែន ដែលបាញ់មីស៊ីល ATACMS និង HIMARS ផលិតដោយសហរដ្ឋអាមេរិក និងមីស៊ីល Storm Shadow របស់ចក្រភពអង់គ្លេស ទៅលើទីតាំងយោធាក្នុងទឹកដីរុស្ស៊ីដែលអន្តរជាតិទទួលស្គាល់៕

ដោយ៖ ឈាង

ចុចអាន៖ មីស៊ីលរុស្ស៊ី បាញ់លើអ៊ុយក្រែន ជាមីស៊ីលហោះលឿនជាងសំឡេង១០ដង គ្មានអ្វីស្ទាក់ចាប់បាន