មីស៊ីលរុស្ស៊ី បាញ់លើអ៊ុយក្រែន ជាមីស៊ីលហោះលឿនជាងសំឡេង១០ដង គ្មានអ្វីស្ទាក់ចាប់បាន

តាមការបញ្ជាក់ពីមេដឹកនាំវិមានក្រឹមឡាំង វ្ល៉ាឌីមៀរ ពូទីន កាលពីថ្ងៃព្រហស្បតិ៍ទី២១ខែវិច្ឆិកាឆ្នាំ២០២៤, មីស៊ីលដែលរុស្ស៊ីបាញ់លើអ៊ុយក្រែនថ្មីៗនេះ គឺជាមីស៊ីលល្បឿនលឿនជាងសំឡេងរយៈចម្ងាយមធ្យម Oreshnik ដែលលើពិភពលោក គ្មានប្រព័ន្ធណាមួយអាចស្ទាក់ចាប់មីស៊ីលនេះបានទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមលោកពូទីន, Oreshnik គឺជាមីស៊ីលជំនាន់ថ្មីដ៏ទំនើប ធ្វើដំណើរលឿនជាងសំឡេង១០ដង ពោលគឺហោះក្នុងល្បឿន២.៥ទៅ៣គីឡូម៉ែត្រក្នុងមួយវិនាទី។

លោកអះអាងថា ការវាយប្រហារនេះ គឺដើម្បីឆ្លើយតបទៅអ៊ុយក្រែន ដែលបាញ់មីស៊ីល ATACMS និង HIMARS ផលិតដោយសហរដ្ឋអាមេរិក និងមីស៊ីល Storm Shadow របស់ចក្រភពអង់គ្លេស ទៅលើទីតាំងយោធាក្នុងទឹកដីរុស្ស៊ីដែលអន្តរជាតិទទួលស្គាល់។

ពាក់ព័ន្ធការសងសឹករបស់រុស្ស៊ី កងទ័ពអាកាសអ៊ុយក្រែនទទួលស្គាល់ថា ទីក្រុង Dnipro ពិតជាគោលដៅក្នុងការវាយប្រហារនោះមែន ហើយមិនមែនត្រឹមមីស៊ីល Oreshnik ប៉ុន្តែនៅមានមីស៊ីលជាច្រើនប្រភេទទៀត ដែលរុស្ស៊ីបាញ់មកដូចជា Kh-101 ជាដើម។

ស្របពេលជាមួយគ្នានោះដែរ លោក ពូទីន ព្រមានថា ប្រទេសណាក៏ដោយ ឲ្យតែផ្តល់អាវុធជួយអ៊ុយក្រែនយកមកបាញ់ចូលដីរុស្ស៊ី ទីក្រុងមូស្គូនឹងសងសឹក ដោយវាយប្រហារទីតាំងយោធារបស់ប្រទេសនោះវិញ។

ប្រធានាធិបតីរូបនេះព្រមានថា «យើងនឹងកំណត់គោលដៅ នៅពេលយើងធ្វើតេស្តប្រព័ន្ធមីស៊ីលថ្មីបំផុតបន្ថែមទៀត។ នេះគឺដោយសារតែមានការគំរាមកំហែងដល់សន្តិសុខរបស់សហព័ន្ធរុស្ស៊ីមិនចេះឈប់។ ​យើង​ជឿជាក់​ថា ​យើង​មាន​សិទ្ធិ​ប្រើប្រាស់​អាវុធ​ប្រឆាំង​ទីតាំង​យោធា​នៃ​ប្រទេស​ទាំងឡាយណា ​ដែល​អនុញ្ញាតឲ្យ​ប្រើ​អាវុធ​របស់​ពួកគេ​ប្រឆាំង​នឹងទីតាំង​របស់​យើង​»​។

មិនត្រឹមប៉ុណ្ណឹង លោកពូទីន ថែមទាំងបានចង្អុលចំឈ្មោះសហរដ្ឋអាមេរិក ផងដែរថា ជាអ្នកបំផ្លាញប្រព័ន្ធសន្តិសុខអន្តរជាតិ បង្កើនហានិភ័យនៃជម្លោះពិភពលោក៕

អត្ថបទ៖ សុខ សុវណ្ណ

ចុចអាន៖ ពូទីន គំរាមសងសឹកប្រទេសណាក៏ដោយ ឲ្យតែជួយអាវុធអ៊ុយក្រែន